ارىق-ناۋا جەلىلەرىن، نوسەر كارىزى جۇيەسىن تازارتۋ، سول سياقتى نوسەر كارىزدەرى مەن تازارتۋ قۇرىلىس­تارىن سالۋ، قورعاۋ بوگەتىن رەكونسترۋكتسيالاۋ سەكىلدى ءىس-شارالاردىڭ كەشەندى جوسپارى بەكىتىلدى. قالادا سۋ تاسقىنىنىڭ ءقاۋپى بار ۋچاسكەلەر سانى وتكەن جىلدارمەن سالىستىرعاندا 8 ۋچاسكەگە ازايدى. سۋ تاسقىنىنا قارسى ءىس-شارالار اكىمدىكتە وتكەن كەڭەستە تالقىلاندى. جيىنعا ەلوردا اكىمى التاي كولگىنوۆ تجد، «قازسۋشار» رمك، «قازگيدرومەت» رمك وكىلدەرى، ۆەدومستۆولىق باعىنىستى قۇرىلىمدىق بولىمشەلەر جانە ت.ب. قاتىستى.

وسىلايشا، استانا سۋ قويماسىنىڭ جوسپارلى جۇمىس كەستەسى بەكىتىلدى. وتكەن جىلدىڭ كۇزىنەن باستاپ ەكولوگيا، گەولوگيا جانە تابيعي رەسۋرستار مينيسترلىگى سۋ جينايتىن قۇرىلعىسى بار قورعانىس بوگەتىن قايتا قۇرۋ بويىنشا قۇرىلىس-مونتاج جۇمىستارىن جۇرگىزۋدە. بۇل رەتتەگىشتىڭ وتكىزۋ قابىلەتىن ارتتىرادى.
سۋ تاسقىنىنىڭ الدىن الۋ جانە سالدارىن جويۋ ءۇشىن ينەرتتى ماتەريالدار قورى دايىندالدى. ازاماتتىق قورعاۋ ورگاندارى، كوممۋنالدىق قىزمەتتەر تۇراقتى دايىندىققا كەلتىرىلدى. قاردى ۋاقىتىلى تازالاۋ ەرەكشە باقىلاۋعا الىندى. بۇگىنگى تاڭدا قالا اۋماعىنان 2،6 ملن تەكشە مەتردەن استام قار شىعارىلدى. كۇن سايىن قالانى سانيتارلىق تازالاۋعا 1100 بىرلىك ارنايى تەحنيكا مەن 2 مىڭ جول جۇمىسشى شىعادى. «قازگيدرومەت» رمك دەرەكتەرى بويىنشا توپىراقتىڭ قاتۋ تەرەڭدىگى 73 سم قۇرايدى، بۇل وتكەن جىلدىڭ سايكەس كەزەڭىمەن سالىستىرعاندا 40%-عا ارتىق.
قالا باسشىسى قورعانىس بوگەتىن قايتا قۇرۋ بويىنشا كونتررەتتەگىشتە جۇرگىزىلىپ جاتقان جۇمىستاردى ەرەكشە باقىلاۋعا الۋدى، مايبالىق كولىنەن نۇرا-ەسىل ارناسىنا دەيىنگى ارالىقتا تازارتۋ جۇمىستارىن باستاۋدى، تۇرعىن ءۇي الاپتارىنا ەرەكشە نازار اۋدارۋدى تاپسىردى. «وتكەن جىلى جاۋىن-شاشىن كوپ بولدى، سۋ تاسقىنىنا قارسى ءىس-شارالار بويىنشا ۇلكەن جۇمىستار جۇرگىزىلىپ، سۋ باسۋدىڭ الدىن الدىق. بيىل جەر قىرتىسىنىڭ قاتۋى تەرەڭىرەك ەكەنىن ەسكەرۋ قاجەت. سوندىقتان سۋ باسۋ ءقاۋپىن ازايتۋ قاجەت. قالانىڭ تۇرعىن ءۇي الاپتارىنا ەرەكشە نازار اۋدارۋ كەرەك» دەپ اتاپ ءوتتى ەلوردا اكىمى.