ءتۇرى: اقجول تور ماقالالارى
جولدانعان ۋاقىتى: 02:00 - 2021/02/23
«بىلتىر ەلىمىزدە ابايدىڭ 175 جىلدىعى كەڭىنەن اتالىپ ءوتتى. سونىڭ اياسىندا اۋقىمدى جۇمىس اتقارىلدى» دەپ جازدى سەنات ءتوراعاسى Facebook جەكە پاراقشاسىندا.
«دەگەنمەن ۇلى ويشىلدىڭ وسيەتتەرىن دارىپتەۋ جولىندا ءبىر جىلمەن شەكتەلىپ قالۋعا بولمايتىنى تۇسىنىكتى. ويتكەنى ءبىزدىڭ ۇلتتىق بولمىسىمىز بەن دۇنيەتانىمىمىزدىڭ قالىپتاسۋىندا حاكىم ابايدىڭ ءرولى ەرەكشە. ءبىز بويىمىزدى دا، ويىمىزدى دا اباي سوزدەرىنە قاراپ تۇزەيمىز. سوندىقتان اقىن مۇراسىن دارىپتەۋ، اسىرەسە، ونى وسكەلەڭ ۇرپاقتىڭ ساناسىنا ءسىڭىرۋ قاشاندا ماڭىزدى.
وسى ورايدا ەلوردامىزداعى مۋزىكالىق جاس كورەرمەن تەاترىنىڭ يگىلىكتى ءىسىن ەرەكشە اتاپ وتكىم كەلەدى. تاياۋدا اتالعان ونەر ورداسىندا «اباي-توعجان» قويىلىمىن تاماشالاپ، كەرەمەت رۋحاني كەشتىڭ كۋاسى بولدىم. بۇعان دەيىن كوبىنە اقىننىڭ ۇلعايعان شاعىن كورىپ كەلسەك، بۇل جولى ءبىز جاس ابايدى كوردىك. ونىڭ كەمەڭگەر بولىپ قالىپتاسۋىنىڭ العاشقى كەزەڭدەرىنە ۇڭىلدىك. اقىن ليريكاسىنىڭ باستاۋىنا نازار اۋداردىق. سول سەبەپتى اتالعان سپەكتاكلدى ابايتانۋ ىلىمىنە تىڭ سەرپىن بەرگەن تۋىندى دەپ قابىلدايمىن.
شىن مانىندە، ويشىلدىڭ ءومىر جولى – كۇرەسكە تولى كۇردەلى جول. ونى اباي مەن توعجاننىڭ ماحابباتىنان دا اڭعارۋ قيىن ەمەس. سونداي كەزەڭدەر اقىن فيلوسوفياسىنىڭ قالىپتاسۋىنا ۇلكەن اسەرىن تيگىزگەنى ءسوزسىز. قويىلىمدا سونىڭ ءبارى ەرەكشە تاپقىرلىقپەن سۋرەتتەلگەن» دەيدى ماۋلەن اشىمباەۆ.
سەنات ءتوراعاسى مۋزىكالىق جاس كورەرمەن تەاترىنىڭ اشىلعانىنا كوپ بولا قويماسا دا، ءبىرشاما قويىلىمداردى ابىرويمەن ساحنالاپ شىققانىن اتاپ ءوتتى. ولاردىڭ ىشىندە مۇقاعاليدىڭ، ءشامشىنىڭ شىعارماشىلىعىنا ارنالعان قويىلىمدار دا بار. بۇدان بولەك ول تەاتر ارتىستەرىنىڭ شەبەرلىگىنە دە توقتالىپ ءوتتى.
«وسى رەتتە تەاتردىڭ اكتەرلەر قۇرامىنا دا توقتالا كەتكەن ءجون. ولاردىڭ قاتارىندا سامال ەسلياموۆا، ايان وتەپبەرگەن ، اسىلحان تولەپوۆ سياقتى بەلگىلى دارىن يەلەرىمەن بىرگە جاس تالانتتار دا بار. ونەرسۇيەر قاۋىمعا عاجايىپ كوڭىل كۇي سىيلاپ جۇرگەن تەاتر اكتەرلەرىنە جانە وسى ۇجىمنىڭ باسشىسى، كاسىبي رەجيسسەر، شەبەر ۇيىمداستىرۋشى اسحات ماەميروۆ ايرىقشا العىسىمىزدى بىلدىرەمىز.
تەاتر – كلاسسيكالىق ونەر. ال كلاسسيكا قاشاندا بيىك تۇرادى. سول سەبەپتى جاس تەاتردىڭ عۇمىرى ۇزاق بولارىنا سەنەمىز جانە سوعان تىلەكشىمىز. الار اسۋلارىڭىز كوپ بولسىن. ىندەتتەن تەزىرەك قۇتىلىپ، زال كورەرمەنگە لىق تولاتىن كۇن تۋسىن. قازاق ونەرى جاساي بەرسىن!» دەلىنگەن م.اشىمباەۆتىڭ جازباسىندا.
