نۇر-سۇلتان قالاسىنىڭ ترياتلون پاركىندە ەل تاۋەلسىزدىگىنىڭ 30 جىلدىعىنا وراي قىسقى ترياتلوننان جارىس ءوتتى. «سۋپەر سپرينت» قاشىقتىعى بويىنشا كاسىپقويلار مەن اۋەسقويلار اراسىندا وتكەن جارىستىڭ ۇيىمداستىرۋشىلارى – نۇر-سۇلتان قالاسىنىڭ اكىمدىگى مەن نۇر-سۇلتان قالاسىنىڭ ترياتلون فەدەراتسياسى.

شارانىڭ سالتاناتتى اشىلۋ راسىمىنە قر سپورت جانە دەنە شىنىقتىرۋ ىستەرى كوميتەتىنىڭ ءتوراعاسى سەرىك ساپيەۆ، نۇر-سۇلتان قالاسى دەنە شىنىقتىرۋ جانە سپورت باسقارماسىنىڭ باسشىسى سامات ەرعاليەۆ جانە نۇر-سۇلتان قالاسى ترياتلون فەدەراتسياسىنىڭ پرەزيدەنتى ەرجان ءبىرجانوۆ، «تەڭ مۇمكىندىكتەر الەمى» قورىنىڭ باسشىسى نۇرگۇل ۇلجەكوۆا قاتىستى.
جارىسقا تەك ەلوردالىقتار عانا ەمەس، سونداي-اق ەلىمىزدىڭ ءار وڭىرىنەن 200-گە جۋىق سپورتشى جينالدى. قاتىسۋشىلار جۇگىرۋدەن 2 شاقىرىم، ۆەلوجارىستان 3 شاقىرىم، شاڭعى جارىسىنان 2،5 شاقىرىم قاشىقتىقتا باق سىنادى. قاشىقتىقتى بەلگىلەنگەن ۋاقىتتان كەشىكتىرمەي اياقتاعان جەكە جارىستىڭ ءاربىر قاتىسۋشىسى مارە سىزىعىندا مەدالدارمەن ماراپاتتالدى.
جاس ساناتتارى بويىنشا I، II، III ورىن العان سپورتشىلار 23-25 اقپاندا نۇر-سۇلتان قالاسىنىڭ ترياتلون فەدەراتسياسىنىڭ كەڭسەسىندە ارنايى ماراپاتتالاتىن بولادى. سونداي-اق ءىس-شارانىڭ قوناقتارى مەن قاتىسۋشىلارى ءۇشىن قوعامدىق تاماقتانۋ ايماعى (دالالىق اس ءۇي) ۇيىمداستىرىلدى.
ايتا كەتەيىك، جارىستان تۇسكەن قاراجات «سالاماتتى بولاشاق» – «سپورت بارشاعا» الەۋمەتتىك جوباسىن قولداۋ ءۇشىن «تەڭ مۇمكىندىكتەر الەمى» قايىرىمدىلىق قورىنا اۋدارىلاتىن بولادى.