ەلوردادا ەسكى ۇيلەر ازايىپ بارادى. وتكەن جىلى اپاتتى ۇيلەردە تۇراتىن 400 وتباسى جاڭا ۇيلەرگە كوشىرىلسە، بيىل 257 وتباسىن جاڭا پاتەرلەرگە كوشىرۋ جوسپارلانىپ وتىر. توزىعى جەتكەن ۇيلەردى سىرىپ، قاجەتتى باسپانالار تۇرعىزۋ «نۇرلى جەر» تۇرعىن ۇي-كوممۋنالدىق دامۋ باعدارلاماسى اياسىندا جۇزەگە اسىرىلىپ جاتىر.

اۋدان اكىمدەرىنىڭ ەسەپتىك كەزدەسۋلەرىندە تۇرعىندار تاراپىنان كوپ قويىلعان سۇراقتاردىڭ ءبىرى – اپاتتى ۇيلەردىڭ سىرىلۋى، ونىڭ يەلەرىنىڭ جاڭا پاتەرلەرگە قونىستانۋ جايى. باس قالادا ابدەن توزىعى جەتكەن مۇنداي تۇرعىنجايلاردىڭ سانى 200-گە جۋىق.

جەرگىلىكتى بيلىك بەكىتكەن جوسپار بويىنشا اپاتتى جاعدايداعى 5 ءۇي (209 پاتەرلىك) – 2020 جىلى، 4 ءۇي (216 پاتەرلىك) – 2021 جىلى، 16 ءۇي (125 پاتەرلىك) 2022 جىلى سىرىلۋى ءتيىس.
وسىنداي ۇيلەردىڭ ءبىرى – بايقوڭىر اۋدانىندا ورنالاسقان يانۋشكەۆيچ كوشەسى، ء12-ۇي. 5 قاباتتى 18 بولمەلى عيمارات 1963 جىلى سالىنعان. ونىڭ قابىرعاسى جارىلىپ، كىرپىشتەرى تۇسە باستاعان. كەي تەرەزەلەر تاسپەن قالانىپ، بەكىتىلىپ تاستالعان. عيماراتتىڭ سىرتقى ۇسقىنسىزدىعى ءوز الدىنا، پودەزد ءىشى دە كوزگە كورگىسىز: قابىرعالارى ورمەكشى تورىمەن تورلانعان، ءار جەردە توك سىمدارى ىرسيىپ شىعىپ تۇر، اجەتحانا مەن قولجۋعىش شۇڭعىلشاسىن توت باسقان. جاتاقحانا تۇرعىندارى، مىنە، وسىنداي جاعدايدا بۇعان دەيىن تۇرىپ كەلدى.
– بۇل ۇيدە جانە يانۋشكەۆيچ كوشەسى، 12/1 ۇيدە 330 وتباسى ءومىر سۇرگەن. ءقازىر ولاردىڭ كوپشىلىگى قاراساي باتىر كوشەسىندە جاڭادان سالىنعان تۇرعىن ۇيگە كوشىرىلدى. 20 وتباسى ر.قوشقارباەۆ داڭعىلى بويىنداعى ۇيگە ورنالاستى. 2020 جىلى ء12-ۇيدىڭ تۇرعىندارى تولىق كوشىرىلدى، 12/1 ءۇي تۇرعىندارىن جاڭا قونىسقا كوشىرۋ 2021 جىلدىڭ جوسپارىنا ەنگىزىلدى. قالا اكىمدىگى بۇل جۇمىستاردى جۇيەلى تۇردە جۇزەگە اسىرىپ كەلەدى، – دەدى بايقوڭىر اۋداندىق ينسپەكتسيا ءبولىمىنىڭ باسشىسى بەكزات تامشىباي.
– البەتتە، ابدەن توزىعى جەتكەن ءقاۋىپتى جەردە تۇرىپ جاتقان تۇرعىندار جاڭا ۇيگە كوشۋدى كوپتەن كۇتتى. ەندى، مىنە، جاڭا قونىسقا كوشىپ، قۋانىپ جاتىرمىز. ءقازىر مۇندا ەشكىم قالعان جوق. ءبىز وسى ۇيدە 22 جىل تۇردىق، بالالارىمىز وسى جەردە ەرجەتتى، – دەيدى جاتاقحانانىڭ بۇرىنعى تۇرعىنى اۋلەتباي ءايتىموۆ. ونىڭ ايتۋىنشا، ادامدار ەسكى قونىستارىنان وسىدان ءبىر اي بۇرىن كوشكەن.
بەكزات تامشىبايدىڭ ايتۋىنشا، قازىرگى كۇنى بايقوڭىر اۋدانىندا 441 كوپقاباتتى ءۇي بار، ولاردىڭ 206-سى – جاڭا عيمارات، تاعى 174 ءۇيدىڭ كۇيى قاناعاتتاندىرارلىق، ال 53 ءۇي جوندەۋدى قاجەت ەتەدى. ەندى ەشقانداي جوندەۋگە جارامايتىن 4 ءۇيدى سىرۋ قاجەت. بۇل جۇمىستار الداعى كۇندەردىڭ ەنشىسىنە قالدىرىلعان.
– 2020-2025 جىلدارعا ارنالعان «نۇرلى جەر» تۇرعىن ۇي-كوممۋنالدىق دامۋ مەملەكەتتىك باعدارلاماسىنا سايكەس، ءۇيدىڭ 61 پايىزدان ارتىق توزىعى جەتسە جانە ول ۆەدومستۆوارالىق كوميسسيانىڭ شەشىمى بويىنشا اپاتتى دەپ تانىلسا، سىرىلۋعا جاتادى. وسىعان وراي، 2021 جىلى – يانۋشكەۆيچ كوشەسى، 12/1 ءۇي; 2022 جىلى – يانۋشكەۆيچ كوشەسى، 10/2 ءۇي، يانۋشكەۆيچ كوشەسى، 10/3 ءۇي جانە سەيفۋللين كوشەسى، 54/2 ءۇي سىرىلاتىن بولادى، – دەدى ول.
ءۇيدى اپاتتى دەپ تانۋ ءۇشىن تۇرعىندار اكىمدىككە قاجەتتى قۇجاتتار تاپسىرۋى ءتيىس. ماسەلەن، باسپانانىڭ توزىعى جەتكەندىگىن راستايتىن انىقتاما قورىتىندىسى تۋرالى ءوتىنىش; ءوتىنىش بەرۋشى ءتولقۇجاتىنىڭ كوشىرمەسى; نىساننىڭ ورنالاسقان جەرى تۋرالى انىقتاما; جىلجىمايتىن مۇلىكتىڭ تەحنيكالىق پاسپورتىنىڭ كوشىرمەسى.
– سونداي-اق جوعارىدا اتالعان قۇجاتتارعا ءۇيدىڭ اپاتتىلىعىن ايقىندايتىن فوتوفاكت قوسا بەرۋ قاجەت. بۇل قۇجاتتاردىڭ ءبارى جيناقتالعان سوڭ، ماسەلە ۆەدومستۆوارالىق كوميسسيانىڭ قاراۋىنا شىعارىلادى، ناقتى شەشىمدى كوميسسيا قابىلدايدى، – دەدى مامان.