قازاقستاننىڭ تۇڭعىش پرەزيدەنتى – ەلباسى كىتاپحاناسىنىڭ قورى نۇر-سۇلتان قالاسىنىڭ اكىمى التاي كولگىنوۆتىڭ يدەياسىنان تۋعان «ەلوردا ارحيتەكتورى» فوتوجيناعىمەن تولىقتى.

جيناقتا ەركە ەسىلدىڭ جاعاسىنا قونىستانعان ەلىمىزدىڭ باس قالاسىنىڭ العاش كىرپىشى قالانعان ساتتەن بۇگىنگە دەيىنگى تىنىس-تىرشىلىگى بۇكپەسىز باياندالعان. ءبىر سوزبەن ايتقاندا، قازاقستان استاناسىنىڭ تاريحىن فوتوسۋرەتتەر ارقىلى سويلەتكىزگەن بىرەگەي البوم دەسەك تە بولادى.
كىتاپتىڭ العاشقى بەتتەرىنەن جيىرماسىنشى عاسىردىڭ سوڭىنداعى ­نۇرسۇلتان نازارباەۆتىڭ جاڭادان بوي كوتەرىپ كەلە جاتقان ۇكىمەت ءۇيىنىڭ قۇرىلىسىن باقىلاۋعا العانىن اڭعارۋعا بولادى. سونىمەن قاتار ءتۇرلى مەملەكەتتىك ماڭىزى بار وبەكتىلەر مەن ءبىرسىپىرا مادەني-اعارتۋشىلىق وشاقتارىنىڭ لەنتاسىن قيعان تاريحي فوتوسۋرەتتەر دە از ەمەس.
ەلباسى ءوزىنىڭ ءبىر سوزىندە باس قالانىڭ دامۋ فيلوسوفياسىن وتە انىق جانە بەينەلى تۇردە ايقىنداپ: «جاڭا استانانىڭ سالىنۋىمەن قازاقستاننىڭ جاڭا ءداۋىرى باستالدى. بىرىنشىدەن، تاۋەلسىزدىكتىڭ العاشقى جىلدارىنان باستاپ مەملەكەتتىلىگىمىزدىڭ بارلىق ينستيتۋتتارى ورنىقتى. ەلوردامىز بۇكىل الەم تانىعان جاڭا ساياسي ورتالىققا اينالدى. مۇندا جاڭا كەڭىستىك، جاڭا كوورديناتتار جۇيەسى، جاڭا ۋاقىت پايدا بولدى. بۇل جالپى جاڭارۋ مەن جاڭا ءتارتىپتىڭ پايدا بولۋىنا سەرپىن بەرەدى» دەپ ايتقان.
ايتا كەتەيىك، ەلباسى كىتاپحاناسى مۋزەيىنىڭ جاڭا عيماراتىندا دا ەلوردانىڭ قۇرىلۋ، دامۋ كەزەڭدەرى ايقىن ءارى زاماناۋي تەحنولوگيالاردىڭ كومەگىمەن ۇسىنىلعان. «ستراتەگ جولى» زالىندا ينتەراكتيۆتى فورماتتا ەلباسىنىڭ كوپتەگەن ەسكيز-سىزباسىمەن تانىسۋعا بولادى. ال مەپپينگ-شوۋدا گرافيكالىق انيماتسيالارعا جان ءبىتىپ، قازاقستان استاناسىنىڭ 1998 جىلدان بەرگى ادام سەنگىسىز جىلدامدىقپەن دامىعان تاريحي وتكەلدەرى كەسكىندەلەدى.