ءتۋريزمنىڭ بارلىق سالاسىن دامىتۋعا مۇمكىندىگى بار ەلىمىزدە ارقا توسىندەگى ارۋ قالا نۇر-سۇلتاننىڭ تۋريزم شارۋاشىلىعىن جانداندىرۋداعى ىقپالى مول. سەبەبى توعىز جولدىڭ تورابىنا ورنالاسقان جاڭا استانانىڭ جۇرت نازارىن اۋداراتىن جەرلەرى از ەمەس. ونىڭ ۇستىنە ەۋروپاداعى قاۋىپسىزدىك جانە ىنتىماقتاستىق ۇيىمىنىڭ ءسامميتى، ەحرو كورمەسى سياقتى حالىقارالىق ماڭىزى زور شارالاردىڭ وتكىزىلۋى باس قالانىڭ بەدەلىن بيىكتەتە تۇسكەن.

سونداي-اق دۇنيەجۇزىلىك تۋريس­تىك ۇيىمنىڭ جاھاندىق ءسامميتى بيىل قازان ايىندا نۇر-سۇلتان قالاسىندا وتەدى. سەگىزىنشى مارتە وتكىزىلگەلى وتىرعان بۇل فورۋم ورتالىق ازيادا تۇڭعىش رەت
ۇيىمداستىرىلاتىندىعىن ەسكەرسەك، نۇر-سۇلتاننىڭ تۋريزم سالاسىنداعى الەۋەتى تىپتەن ارتا تۇسكەلى تۇر.
نۇر-سۇلتان قالاسىنىڭ ينۆەس­تيتسيالار جانە كاسىپكەرلىكتى دامىتۋ باسقارماسىنىڭ ساناعىنا قاراعاندا، 2019 جىلدىڭ ءبىرىنشى توقسانىندا ەلورداداعى تۋريستىك ورىندارعا 186 مىڭ تۋريست كەلگەن. ونىڭ 30 پايىزىن شەتەلدىك تۋريستەر قۇراسا، ەل ىشىندە دە ەلورداعا ساياحاتتاي كەلەتىندەردىڭ سانى وتكەن جىلعى وسى مەزگىلدەرىمەن سالىستىرعاندا ارتا تۇسكەنى بايقالادى. ارينە، التى اي قىس بولاتىن استانامىز­دا قاڭتاردان ناۋرىزعا دەيىن اۋا رايىنىڭ قولايسىز ەكەنىن ەسكەرسەك، 3 اي ىشىندە 200 مىڭعا جۋىق ءتۋريستىڭ كەلۋى – قۋانارلىق جاعداي.
جالپى قازاقستان جونىنەن العاندا، تۋريزم – ەندى جاندانىپ كەلە جاتقان سالا. ۇكىمەت وسىدان ون شاقتى جىل بۇرىن ءتۋريزمدى دامىتۋ جوسپارىن جاساعانىمەن، ونىڭ ءونىمى ويداعىداي بولعان جوق. تەك سوڭعى جىلدارى بۇل تۇيىنگە باسا نازار اۋدارىلىپ، ەل ءتۋريزمىن ەلوردادان باستاپ ەكپىن الدىرۋ كۇن تارتىبىنە قويىلعالى ءبىراز جۇمىستار ىستەلدى. مۇنىڭ جاندى مىسالى رەتىندە ۇكىمەتتىڭ وسىدان بىرنەشە جىل بۇرىن ەلوردادا ءتۋريزمدى دامىتۋدىڭ 2020 جىلعا دەيىنگى جول كارتاسى جوباسىن جاساعانىن اتاۋعا بولادى. وسى جوسپاردا نۇر-سۇلتاندا مەديتسينالىق ءتۋريزمدى دامىتۋ قاجەتتىلىگى دە قاراستىرىلعان ەدى. سەبەبى قازاقستان 2016 جىلى مەديتسينالىق تۋريزم بويىنشا تمد ەلدەرى اراسىندا رەسەي مەن ۋكراينادان كەيىن ۇزدىك ۇشتىكتىڭ قاتارىنان كورىندى. ونىڭ ۇستىنە، باس شاھاردا زاماناۋي مەديتسينالىق ورتالىقتار كوبەيىپ عانا قويماي، كارديو، ونكو جانە نەيروحيرۋرگيالىق كومەك كورسەتۋ ءىسى قارقىندى دامىپ كەلەدى.
حالىقارالىق Medical Tourism Index قوعامدىق ۇيىمى جانە حالىقارالىق مەديتسينالىق تۋريزم قاۋىمداستىعىنىڭ وكىلدەرى 2025 جىلعا قاراي مەديتسينالىق ءتۋريزم­نىڭ اينالىمى ءۇش تريلليون دوللار بولادى دەگەن بولجام جاسادى. قازاقستاننىڭ دا بۇل سالادان ءوز ۇلەسىن الۋىنا قاجەتتى مۇمكىندىكتەرى بار ەكەنىن ەسكەرگەن ەلىمىزدىڭ قۇزىرلى ورىندارى ەڭ اۋەلى استانامىزداعى دەنساۋلىق ساقتاۋ سالاسىنىڭ ارتىقشىلىقتارىن انىقتاپ، وتاندىق جانە شەتەلدىك پاتسيەنتتەرگە ۇسىنىلاتىن مەديتسينالىق قىزمەتتەردىڭ ساپاسىن سارالاعان بولاتىن. مەديتسينالىق ورتالىقتاردا كورسەتىلەتىن قىزمەت تۇرلەرىن مەيلىنشە ساپالىلاندىرۋدىڭ تەتىكتەرى دە تەكسەرۋدەن وتكىزگەن ەدى. ناتيجەسىندە 2018 جىلى ەلىمىزدەگى 25 كلينيكالىق ورتالىقتا وزبەكستان،
قىرعىزستان، تاجىكستان، رەسەي سياقتى كورشى ەلدەردەن كەلگەن 2500-گە جۋىق شەتەلدىك ەمدەلگەن. مۇنىڭ باسىم كوپ ساندىسى نۇر-سۇلتان قالاسىندا ەم العانىن ەسكەرسەك، باس قالانىڭ مەديتسينالىق ءتۋريزمدى دامىتۋداعى مۇمكىندىگى بارعان سايىن جوعارىلاپ بارا جاتقانى بايقالادى. جاقىندا مەملەكەت باسشىسى قاسىم-جومارت توقاەۆ تا باس قالاداعى مەديتسينالىق تۋريزم ورتالىعى بولۋىنا بارلىق مۇمكىندىگى بارىن، وزگە وڭىرلەردەن كەلىپ، ەلوردادا ەم قابىلدايتىنداردىڭ قاتارى دا مولايىپ كەلە جاتقانىن ايرىقشا اتاپ، باس قالادا مەديتسينانىڭ ساپاسىن ارتتىرىپ، ونىڭ قولجەتىمدى بولۋىن قامتاماسىز ەتۋ جونىندە قالا اكىمىنە تاپسىرما بەردى. دەمەك، ەندىگى جەردە ەلوردا ءتۋريزمى كۇننەن-كۇنگە جاندانا تۇسپەسە، توقىرامايتىنى انىق.
قالاداعى تۋريستىك ۇيىمداردىڭ دەرەگىنە سۇيەنسەك، نۇر-سۇلتان قالاسىنا كەلگەن تۋريستەر نەبارى ءبىر جارىم كۇن عانا ايالدايدى ەكەن. وعان قالاداعى تۋريستەردى باۋرايتىن ماڭىزدى تۋريستىك ورىنداردىڭ ازدىعى سەبەپ بولىپ وتىرعان كورىنەدى. «نۇر-سۇلتان قالاسىنا ساياحاتتاي كەلگىسى كەلەتىن تۋريس­تەر كوپ. الايدا الىستان ات تەرلەتىپ جەتكەندە ءبىر كۇنگە جەتپەي ەلوردانىڭ بارلىق جەرىن ارالاپ بولادى. بايتەرەككە شىعىپ، ەحرو كورمەسىن ارالايدى. حان شاتىر­عا، ازىرەت سۇلتان مەشىتىنە بارادى. ودان وزگەشە ەشتەڭەمىز جوق. قازاق ۇلتىنىڭ تۇرمىسىنا، ادەت-عۇرپىنا قاتىستى تاماشالايتىن ورىن دا از. كەرەك دەسەڭىز، قالا ىشىندە قىمىز ءىشىپ، دەمالىپ قايتاتىن كيىز ءۇي دە جوق. قالا كۇنىندە تىگىلەتىن كيىز ۇيلەردىڭ قالعان كەزدە قايدا كەتەتىنىن بىلمەيسىڭ» دەيدى «التىن كوپىر» حالىقارالىق ساياحات سەرىكتەستىگىنىڭ ديرەكتورى امانتاي تۇرسىنۇلى. نۇر-سۇلتان قالاسىنىڭ ينۆەستيتسيالار جانە كاسىپكەرلىكتى دامىتۋ باسقارماسىنىڭ باستىعى ەرلان ورىنباسارۇلى قازىرگى تاڭدا تۋريس­تەردىڭ قالادا ايالداۋ ۋاقىتىن 3 كۇنگە ۇزارتۋدىڭ تاسىلدەرى قاراستىرىلىپ جاتقانىن ايتادى. ازىرشە باس قالامىز بۇل جونىندە قانداي ءادىس قولداناتىنى بەلىگىسىز. ءبىراق مەيلى، قالاي بولسا دا، نۇر-سۇلتاندا وزىندىك ەرەكشەلىككە يە، باسقا قالالاردىڭ تۋريزمىنە ۇقسامايتىن جاڭا جوبا كەرەك. ءبىر رەتتىك شارامەن نەمەسە مەرەكەلىك كەشتەرمەن تۇراقتى تۇردە تۋريست تارتۋ قيىن. ونىڭ ۇستىنە قىسى اقتۇتەك بوران بولاتىن استانامىز ماۋسىمدىق ءتۋريزمنىڭ ىقپالىنان ءالى دە ارىلا الماي تۇر. ونىڭ دا جالعىز جولى – نۇر-سۇلتان قالاسىنىڭ قىسقى ءتۋريزمىن دامىتۋ. وكىنىشكە قاراي، باس قالادا جاز بويى وتەتىن مادەني شارالار ارقادان قۇس قايتا ساپ تىيىلادى. سوسىن دا قىتىمىر قىس­تىڭ قۇشاعىندا تىنىش جاتقان قالاعا تۋريس­تەر دە ات باسىن بۇرا ­قويمايدى.