ءتۇرى: قازاق گازەتتەرى
جولدانعان ۋاقىتى: 16:54 - 2020/08/13
الماتى وبلىسىندا جىل باسىنان بەرى ءوزىنىڭ قىزمەتتىك مىندەتتەرىن اتقارىپ جۇرگەن بيلىك وكىلىنە ءتىل تيگىزۋ دەرەگى بويىنشا 22 قىلمىستىق ءىس قوزعالعان، 16 ادام سوت شەشىمىمەن باس بوستاندىعىنان ايىرىلسا، 30 ادام اكىمشىلىك قاماققا الىنعان.
«قىزمەتتىك مىندەتتەرىن اتقارۋ كەزىندە پوليتسيا قىزمەتكەرلەرى زاڭ وكىلدەرىنىڭ ارەكەتتەرىمەن كەلىسپەيتىن جانە مىنەز تانىتاتىن ازاماتتارمەن بەتپە-بەت كەلەدى. پوليتسيا قىزمەتكەرلەرىنىڭ زاڭدى تالاپتارىنا بەلسەندى قارسىلىق كورسەتە وتىرىپ، ءوز ارەكەتتەرىنىڭ سالدارىن جەتە تۇسىنبەستەن، كوپشىلىك الدىندا بيلىك وكىلىنە ءتىل تيگىزەدى جانە ولارعا قارسى كۇش قولدانادى. دەگەنمەن، قولدانىستاعى قىلمىستىق زاڭنامادا پوليتسيا قىزمەتكەرلەرىنە قارسى جاسالعان قىلمىستار ءۇشىن جاۋاپكەرشىلىك قر قىلمىستىق كودەكسىنىڭ ارنايى نورمالارىمەن قاراستىرىلعان»، – دەپ حابارلادى الماتى وبلىسى پد تەرگەۋ باسقارماسى باستىعىنىڭ ورىنباسارى سامال ارعىنعازينوۆا.
قر قىلمىستىق كودەكسىنىڭ 380-بابىنا سايكەس بيلىك وكىلىنە قاتىستى كۇش قولدانعانى ءۇشىن ايىپپۇل، تۇزەۋ جۇمىستارى، قوعامدىق جۇمىستارعا تارتۋ، باس بوستاندىعىن شەكتەۋ، سونداي-اق ون ەكى جىلعا دەيىن باس بوستاندىعىنان ايىرۋ كوزدەلگەن.
ء«اربىر ءىس بويىنشا كۇدىكتى ادامدار مىندەتتى تۇردە ۋاقىتشا ۇستاۋ يزولياتورلارىنا قاماققا الىنادى. بيىل جەتى ايدا قر قك-نىڭ 380-بابى بويىنشا 22 قىلمىستىق ءىس تىركەلدى، ونىڭ ىشىندە 16-سى ايىپتاۋ اكتىسىمەن سوتقا جىبەرىلدى، 6 ءىس وندىرىستە. 30 كۇدىكتىگە قاتىستى “قاماۋعا الۋ” بۇلتارتپاۋ شاراسى قابىلداندى»، – دەپ اتاپ ءوتتى سپيكەر.
مىسالى، قاراساي اۋداندىق سوتىنىڭ ۇكىمىمەن ي. ەسىمدى ەر ادام بەس جىلعا باس بوستاندىعىنان ايىرىلدى. ول ەرلى-زايىپتىلار اراسىنداعى وتباسىلىق-تۇرمىستىق جانجال بويىنشا كەلگەن قاراساي اپب ەكى ۋچاسكەلىك پوليتسيا ينسپەكتورىنا قارسى پىشاق قولدانۋ ارقىلى قارسىلىق كورسەتكەن جانە ناتيجەسىندە ءبىر ءتارتىپ ساقشىسىنا دەنە جاراقاتىن سالعان.
«كوپتەگەن جاعدايلاردا كەيبىر ازاماتتار اگرەسسيۆتى قارسىلىق كورسەتەدى، قىزمەتكەرلەردى ارانداتۋعا تىرىسادى، ءتىپتى ومىرىنە ءقاۋىپ توندىرۋمەن قورقىتادى. سونىمەن قاتار، ولار وسى ارەكەتتەردىڭ بارلىعىن ۇيالى تەلەفوندارعا تۇسىرەدى، شىن مانىندە شىنايى سەبەپتەردى بۇرمالاي وتىرىپ، وزدەرىنە ءتيىمدى تۇستاردى عانا تۇسىرەدى. زاڭسىزدىققا جول بەرمەۋ ماقساتىندا بارلىق ساقتىق شارالارىن، پوليتسيا قىزمەتكەرلەرىنىڭ زاڭدى تالاپتارىن قاتاڭ ساقتاۋعا، ۇلى قولباسشى باۋىرجان مومىشۇلى ايتقانداي “تارتىپكە باعىنعان قۇل بولمايدى” دەگەن سوزىنە سۇيەنە وتىرىپ، وكىنىشكە اكەپ سوعاتىن ارەكەتتەر جاساماۋعا شاقىرامىز»، – دەپ قورىتىندىلادى سامال ارعىنعازينوۆا.
