ءتۇرى: قازاق گازەتتەرى
جولدانعان ۋاقىتى: 15:42 - 2020/08/13
شەتەلدىك تانىمال مۋلتفيلم ارنالارى قازاقشالانۋى مۇمكىن. بۇل تۋرالى قر اقپارات جانە قوعامدىق دامۋ ۆيتسە-مينيسترى بولات تىلەپوۆ ورتالىق كوممۋنيكاتسيالار قىزمەتىندەگى ءباسپاسوز ءماسليحاتىندا ايتتى.
«ال، ەندى ءتىل ماسەلەسى — بۇل رۋحانياتتىڭ وزەگى. بۇل رەتتە دە قازىرگى تاڭدا اقپارات جانە قوعامدىق دامۋ ءمينيسترىنىڭ تاپسىرماسىمەن قاراستىرىلىپ جاتقان باستامالار بار. ماسەلەن — ەلىمىزدىڭ كابەلدىك وپەراتورلارى ارقىلى تارايتىن شەتەلدىك تەلەارنالاردى قازاق تىلىنە اۋدارۋ. ارينە، كەز كەلگەن ەلدىڭ ەرتەڭى — بالا تىلىندە. سوندىقتان بۇل جۇمىستى شەتەلدىك تانىمال مۋلتفيلم ارنالارىنان باستاۋ كەرەك دەگەن ۇسىنىس بار. ءسوز جوق، بۇل باستامالار ءالى قوعامدىق تالقىلاۋدان ءوتىپ، ءتيىستى مامانداردىڭ، ساراپشىلاردىڭ، زيالى قاۋىمنىڭ، اتا-انالاردىڭ قولداۋىمەن بولاتىن دۇنيەلەر»، — دەدى ۆيتسە-مينيستر.
ۆيتسە-مينيستردىڭ ايتۋىنشا، اقپارات جانە قوعامدىق دامۋ مينيسترلىگى ءۇشىن ەڭ ءبىرىنشى مىندەت — بۇل «رۋحاني جاڭعىرۋ» باعدارلاماسىنىڭ تيىمدىلىگى.
«بۇل باعىتتا مينيسترلىكتىڭ بارلىق مۇمكىندىگى جانە ەڭ باستىسى، تولىق تۇسىنىگى بار. رۋحانيات ماسەلەسى بۇل — جالعىز مەملەكەتتىكى ەمەس، ورتاق ماسەلە. سوندىقتان دا وعان قولجەتكىزۋ ءۇشىن ءبىر عانا مەملەكەتتىڭ جۇمىسى از. ءاربىر ازامات اتسالىسۋى كەرەك دەپ ويلايمىز. سوندا عانا «رۋحاني جاڭعىرۋ» باعدارلاماسىن ىسكە اسىرۋدا جاڭا سەرپىن كورەتىن بولامىز»،- دەدى بولات تىلەپوۆ.
