ءتۇرى: قازاق گازەتتەرى
جولدانعان ۋاقىتى: 19:21 - 2020/08/12
قازاقستان رەسەيلىك ۆاكتسينانى ازىرگە ساتىپ المايدى. ويتكەنى ەكپە كلينيكالىق زەرتتەۋلەردەن ءالى وتكەن جوق. بۇل تۋرالى دەنساۋلىق ساقتاۋ مينيسترلىگىنىڭ رەسمي وكىلى باعدات قوجاحمەتوۆ مالىمدەدى.
ايتۋىنشا، بۇل تاقىرىپتى تالقىلاۋ ەرتە. سەبەبى ىندەتكە قارسى ۆاكتسينالار ەڭ الدىمەن حالىقارالىق سەرتيفيكاتتاۋدان ءوتۋى ءتيىس. تەك سودان كەيىن عانا ونى ازىرلەگەن ەل مەن زەرتحانانىڭ اتاۋى بەلگىلى بولادى. ازىرگە قازاقستان ەشبىر ەلمەن ۆاكتسينا ساتىپ الۋ تۋرالى شارت جاساسقان جوق.
باعدات قوجاحمەتوۆ، قر دەنساۋلىق ساقتاۋ مينيسترلىگىنىڭ رەسمي وكىلى:
— قازىرگى ۋاقىتتا جەر جۇزىندە ءبىر دە ءبىر لابوراتوريا حالىقارالىق شارتتارعا سايكەس كەلەتىن ۆاكتسينانى ءالى ويلاپ تاپپادى. ەڭ الدىڭعى قاتارداعى لابوراتوريالار قازىرگى ۋاقىتتا ءۇش كلينيكالىق فازاسىنان ەندى ءوتىپ جاتىر. ءتورت فازاسى بار ونىڭ. ول فازادان وتكەننەن كەيىن عانا ول ۆاكتسينانى حالىقارالىق سەرتيفيكاتسيادان وتۋگە جەتەدى. ودان كەيىن عانا ولاردى ەلدەرگە تاراتۋ مۇمكىن. ءقازىر ءالى وتە ەرتە ۆاكتسينا الۋ تۋرالى اڭگىمەنى قوزعاۋ.
