قازىر اتامباەۆتى بىشكەككە، ياعني ىشكى ىستەر مينيسترلىگىنىڭ تەرگەۋ قىزمەتىنە جاۋاپ الۋ ءۇشىن اپارا جاتىر. بۇرىنعى پرەزيدەنتتىڭ جانىندا جاقتاستارى كۋندۋز جولدۋباەۆا مەن فاريد نيازوۆ بار، دەپ حابارلايدى kazgazeta.kz 24.kz -كە  سىلتەمە جاساپ. 

ايتا كەتەيىك، كوي-تاشتا بۇگىن رەزيدەنتسيانى باسىپ الۋ وپەراتسياسىنىڭ ەكىنشى كەزەڭى جۇرگىزىلگەن بولاتىن. بىرنەشە ساعاتقا سوزىلعان كەلىسسوزدەردەن سوڭ، اتامباەۆ ءوز ەركىمەن بەرىلۋ شەشىمىن قابىلداعان. سەبەبىن بەيبىت تۇرعىنداردىڭ ءومىرىن قاتەرگە تىكپەۋ دەپ ءتۇسىندىردى ەكس-پرەزيدەنتتىڭ شتابى. ەسكە سالايىق، كەشە كەشكىسىن ۇلتتىق قاۋىپسىزدىك كوميتەتىنىڭ ارنايى جاساعى قىرعىزستاننىڭ بۇرىنعى باسشىسى المازبەك اتامباەۆتى ۇستاۋ وپەراتسياسىن باستاعان ەدى. ناتيجەسىندە ەكس-پرەزيدەنت جاقتاستارى مەن اسكەريلەر اراسىندا قاقتىعىس بولىپ، ءبىر ادام قازا تاپتى. تاعى 50 شاقتى ادام ءتۇرلى دەڭگەيدە جاراقات العان.     سوورونباي جەەنبەكوۆ، قىرعىز رەسپۋبليكاسىنىڭ پرەزيدەنتى: – كەشەگى وقيعا بويىنشا بارلىق كىنالىلەر جازالانادى. قىلمىستىق ءىس قوزعالدى. اتامباەۆ ەل كونستيتۋتسياسى مەن زاڭدى بۇزدى. ول بۇعان دەيىن كۋاگەر رەتىندە تەرگەۋگە شاقىرىلسا، ەندى اۋىر قىلمىس جاساعان ايىپتالۋشىعا اينالدى. بۇل – ەكى ادامنىڭ تەكەتىرەسى ەمەس، مەملەكەت مۇددەسىنەن جەكە مۇددەنى جوعارى قويىپ، باسسىزدىققا جول بەرۋ.

سۋرەت: REUTERS/Vladimir Pirogov-تان الىندى.