ەل-ارنا قولفون نۇسقاسىنا ەنۋ Еларна қолфон нұсқасына ену


ەل-ارنا قولفون نۇسقاسى | "قولفون نۇسقاسىن ءتۇسىرۋ (Android)

Кірілше
جۇكتەۋ-البومىم-البومدار-جەلى
وسى توردى ساقتايمىن! | وسى توردى باس بەت ەتەمىن!

ءبىزدىڭ بايلانىس: elarna2012@gmail.com

Үш күнгы келушылер санағыКелген адам саны (IP)Көрілген бет саны (PWs)КомпйутерҚолфон
2019-12-071600666656 %44 %
2019-12-082923931263 %37 %
2019-12-09740202561 %39 %


تىركەلىڭىزدەر كىتاپحانا قوجالار تورابى البومدار قازاقتىڭ 1001 ەرتەگىسى

ءتۇرى: قازاق گازەتتەرى

جولدانعان ۋاقىتى: 10:03 - 2019/07/11



«انا ءتىلى»: شىعارماشىلىق ومى­رىڭىزدە قانداي جاڭالىق بولىپ جاتىر؟
ازامات شارعىن: مەن اراعا ءبىراز جىل سالىپ، ەكىنشى جوعارى ءبىلىم، كينو رەجيسسەرى ماماندىعىن الۋعا نيەتتەنگەم. ءوز شىعارماشىلىعىمنان بولەك، سول باعىتتا ديپلومدىق جۇمىسىمدى قورعاۋعا دايىندالىپ ءجۇرمىن. ­ستسەناري جازۋ ۇستىندەمىز. تالاپ بويىن­شا قىسقا نە تولىقمەتراجدى كينو ءتۇسىرۋىم كەرەك. بۇل – مىندەتتى تاپسىرما.
ال اكتەرلىككە كەلسەك، ناۋرىز ­ايىندا شىققان، رۇستەم ءابدىراشتىڭ «قازاق حاندىعى»، «التىن تاق» فيلمىندە ءسىبىر حانى يباقتى سومدادىم.­ اكتەر ءۇشىن ءرولدىڭ ۇلكەن-كىشىسى بولمايدى. مەن ءوزىم ەپيزودتىق رولگە دە اس-سۋىمدى تىيا تۇرىپ، تياناقتى دايىندالىپ ادەتتەنگەنمىن. كۇزدە اقان ساتاەۆتىڭ «توميريس» تاريحي كارتيناسى ەكرانعا شىعادى. وندا اريماس تايپاسىنىڭ باتپاي ەسىمدى ساق كوسەمىن سومدايمىن. سونداي-اق جىل سايىن ءبىرلى-جارىم تەلەحيكايالارعا ءتۇسىپ تۇرامىز. ون جىلدان اسا ۋاقىت دۋبلياجدا قىزمەت جاسادىم، قازىرگى كۇنى دۋبلياجعا بۇرىنعىداي ءجيى بارا بەرمەيمىن. سوڭعى دىبىستاعانىم – «31» ارنادان بەرىلگەن تۇرىكتىڭ «وشپەس ماحاببات» تەلەحيكاياسى. باستى رولدەگى كەمالدى قازاقشا سويلەتتىم. ­سودان كەيىن دۋبلياجدى قويدىم دەسەم دە بولادى. تەك ارنايى شاقىرعان، ۋاقىتتى كوپ المايتىن ماتەريالداردى دىبىستاۋعا عانا كەلىسىم بەرەمىن.
«انا ءتىلى»: سىز سومداعان كەيىپ­كەر­لەر، كوبىنەسە، مىنەزدى بولىپ كەلەدى. ال ازامات شارعىن سومداۋعا كەلىسپەيتىن وبرازدار بار ما؟
ازامات شارعىن: ساۋالىڭىز وتە ورىندى. بىردە مەنى تىرناعىن، قاسىن بويايتىن جىگىتتىڭ رولىنە تۇسۋگە شاقىردى. بۇل رولدەن سانالى تۇردە باس تارتتىم، بارمادىم. ونداي رولدەر مەن ءۇشىن جات، مەن عانا ەمەس، ادامزات ءۇشىن دە جات دەپ تۇسىنەمىن، ونىڭ ۇستىنە مەن دە پەرزەنت ءوسىرىپ وتىرعان اكەمىن… قانشا جەردەن ونەر دەپ قاراساق تا، بالالارىمنىڭ بەتىنە تۋرا قاراعىم كەلەدى. ء«ار كاللادا ءبىر قيال» دەگەن سياقتى، ءار رەجيسسەردىڭ باسىندا قانداي قيال بار ەكەنىن كىم ءبىلسىن؟ ولاردىڭ قيالدارىنىڭ جەمىسى بولۋعا قۇلقىم جوق. اكتەر بولعان سوڭ، قانداي ءرول بەرىلسە دە سومداۋى كەرەك دەپ جاتادى. مۇمكىن، ءدىنى، ءدىلى، دۇنيەتانىمى باسقا ۇلتتىڭ اكتەرلەرى ءۇشىن قانداي ءرول بولسا دا ءبارىبىر شىعار، ءبىراق مەن ءوزىمدى ەڭ الدىمەن اكتەر ەمەس، اداممىن دەپ تانيمىن. سوندىقتان ادام تابيعاتىنا جات، شەكتەن شىققان رولدەردى ەشقاشان سومداماۋعا تىرىسىپ كەلەمىن، جاي ءازىل ءۇشىن دەسە دە، ءتىپتى بيىك ونەر ءۇشىن دەسە دە. «بوياۋشى بوياۋشى دەسە ساقالىن بويايتىندار» دا جەتەرلىك. اركىم ءوز دۇنيەتانىم، تۇسىنىگىنە قاراي ارەكەت ەتەدى.
«انا ءتىلى»: بىر كەزدەرى «حابار» ارناسىندا «نۇكتە» تەلەباعدارلاماسىن جۇرگىزىپ، تەلەجۇرگىزۋشىلىك جولعا تۇسكەن ەدىڭىز. قالاي ەكەن؟
ازامات شارعىن: كورەرمەنگە ۇنا­عان بولۋ كەرەك. وزىمە ۇناعان جوق. اۆتورلىق باعدارلاما بولماسا، وزگەنىڭ ايتقانىنا كونىپ، ايداۋىنا جۇرە المايتىنىمدى ءتۇسىندىم. بۇگىنگى كۇنى ماعان ويىن-ساۋىق نە ساياسي-الەۋمەتتىك تاقىرىپتان گورى، تانىمدىق باعدارلامالار جاقىن. مىسالى، كينو، تەاتر، مادەنيەت ساياسا­تىنىڭ جالاۋىن تىكتەيتىن قۇندى­لىقتار. كورەرمەنمەن وي بولىسكىڭ كەلسە، پىكىرلەسكىڭ كەلسە، دۇرىسى، ءوزىڭدى قىزىقتىراتىن، از دا بولسا بىلەتىن تاقىرىپتى تاڭداعان ابزال ەكەن. ايتامىن، وي بولىسەمىن دەسەڭ، الەۋمەتتىك جەلى دايىن تۇر. ەشكىمگە كۇنىڭدى قاراتپاي-اق، فورماسى تىڭ، قىزىقتى، شىنايى دۇنيە ويلاپ تاپ تا، سويلەسە بەر. «نۇكتە» باع­دار­لاماسىن جۇرگىزگەننەن تۇيگەن ويىم وسى.
«انا ءتىلى»: قازىر كينو، تەاتر اكتەرلەرىنىڭ ىشىندە توي تىزگىنىن ۇستاپ، اسابالىققا بەت بۇرعاندار كوپ. ءسىز توي مادەنيەتىنە قالاي قارايسىز؟
ازامات شارعىن: مەن توي جۇر­گىز­بەيمىن. مۇلدە جۇرگىزىپ كورمەپپىن. قىزىعۋشىلىق، ىشكى قاجەتتىلىك جوق. «تابىسى جاقسى عوي، داۋىسىڭ، سويىڭ كەلىپ تۇر، نەگە جۇرگىزبەيسىڭ؟ ءوزىمىز ۇيرەتەمىز» دەپ، اسابالىقتى مەڭگەرگەن كەي دوس-باۋىرلار ءالى دە ۇگىتتەيدى. جان دۇنيەڭ جات ساناپ تۇرسا، كىم نە ايتسا دا بارا المايدى ەكەنسىڭ. توي جۇرگىزۋ تۇرماق، شاقىرعان جەرگە كەيدە ازەر بارامىن. جاقىن كورەتىن ­دوستارمەن قالجىڭداسىپ، وي بولىسكەندى ۇناتامىن. ءبىراق ويىن-توي، ساۋىق-سايران، ارزان كۇلكى، ىرجاڭ-تىرجاڭ تىرلىككە جوقپىن. ارا-تۇرا كونتسەرت جۇرگىزەمىن. وندا دا نيەتىم سوقسا عانا…
«انا تىلى»: بۇگىندە تانىمال اكتەر­لەردىڭ ءبىرىسىز، كورەرمەن ءسىزدى كوپتەگەن تەلەسەريال ارقىلى تانيدى. ونەرگە دەگەن قىزىعۋشىلىعىڭىز قاي كەزدەن باستالدى؟
ازامات شارعىن: بالا كەزىمدە ­اكتەر بولامىن دەپ ويلامادىم، ءتىپتى ونەر اكادەمياسىنىڭ بار ەكەنىن دە بىلمەيتىنمىن. بالكىم، ۇيدە ونەر ادامدارى بولماعاندىقتان شىعار… وقۋشى كەزىمدە مەكتەپتەگى ءبىر قويىلىمعا ستسەناري جازعانىم ەسىمدە. سوندا سىنىپ جەتەكشىم تۇراحان اپاي ­«ازامات وسكەندە دراماتۋرگ بولادى» دەپ ايتقان بولاتىن. ول كەزدە دراماتۋرگ دەگەن ءسوزدى دە تۇسىنبەيمىن. ىشتەي، اسكەري ۋچيليششەگە تاپسىرسام، اسكەري مامان بولسام دەپ جۇرەتىنمىن. ونەرگە كەلۋىمە جەڭگەم، «قازاق راديوسىنىڭ» ديكتورى باعداگۇل راحمەتقىزى سەبەپ بولدى. 8-سىنىپتا وقىپ جۇرگەندە، ونەر اكادەمياسى بار ەكەنىن ايتىپ، «سوندا وقۋعا الىپ بارامىن» دەيتىن. ول سوزگە اسا ءمان بەرمەدىم. مەكتەپ بىتىرگەن سوڭ، ءبىر جىل ەشقايدا وقۋعا تاپسىرمادىم، قالاعا كەلىپ، كىرپىش قۇياتىن تسەحتا جۇمىس ىستەدىم. كەلەسى جىلى جەڭگەم اكادەمياعا ەرتىپ كەلدى. الايدا اكتەرلىك كۋرستىڭ قۇجات قابىلدايتىن ۋاقىتى ءوتىپ كەتىپتى. تەك كينوفاكۋلتەتتىڭ جاڭادان اشىلعان پروديۋسەرلىك كۋرسىنا عانا قابىلداپ جاتىر ەكەن. قۇجات تاپسىردىم، ەڭ قىزىعى، وقۋعا ءتۇسىپ كەتتىم. جاتاقحانادا اكتەرلىك ماماندىقتا وقيتىن بالالاردىڭ ونەرىن كورگەن سوڭ، اكتەر ماماندىعىنا قىزىعۋشىلىعىم وياندى. كوپ ۇزاماي، بەلگىلى ءبىر ­سەبەپتەرمەن، وقۋدان شىعارىپ جىبەردى. ءسويتىپ، اكادەمياعا ىرگەلەس مەيرام­حاناعا كۇزەتشى بولىپ جۇمىسقا تۇردىم. ول تۇنگى 12-دە جابىلادى. جاتاق­حانادا بىرگە تۇرعان اكتەر بالالاردى الدىن الا شاقىرىپ قويامىن. سەبەبى اسپازدار ارتىلعان تاماقتىڭ ءبارىن قالدىرىپ كەتەتىن. ءسويتىپ، دوستارىم قارىندارىن تويدىرادى، ءارى ماعان اكتەرلىكتى ۇيرەتەدى. ءسويتىپ، ولەڭ، مىسال وقۋدى، ەتيۋد جاساۋدى ۇيرەندىم. كەلەسى جىلى اكتەرلىككە تاپسىردىم. كىمنىڭ كىم ەكەنىن بىلمەيسىڭ، ەشكىمدى تانىمايسىڭ. ءبىر ەسىكتە تاسبولات ­وماروۆ، ەكىنشىسىندە راحيليام­ ­ماشۋروۆا، تاعى بىرىندە بولات اتاباەۆتىڭ ەسىمى جازىلىپ تۇر. «قايسىسىنا كىرسەم ەكەن؟» دەپ تۇرعاندا، ايگۇل دەگەن تانىس قىز كەزىگە كەتتى. ول دا اكتەرلىككە تاپسىرۋعا كەلگەن ەكەن. ماعان «بولات اتاباەۆ وتە مىقتى مامان دەپ ەستىدىم، سول كىسىگە تاپسىرىپ كورەيىك» دەدى. تاپ­سىردىق. قۇداي ءساتىن سالىپ تۇر­عان شىعار، ەكەۋمىز دە وقۋعا ءتۇسىپ كەتتىك.
«انا ءتىلى»: سولايشا، ايگىلى بولات اتاباەۆتىڭ شاكىرتى اتاندىڭىز…
ازامات شارعىن: بولات اعانىڭ كۋرسىنا 2003 جىلى قابىلداندىق.
العاشقى ساباعىنان-اق، ەش قالىپقا سىيمايتىن ويلارىمەن ءۇيىرىپ الدى. اۋىرساق تا ساباعىنان قالمايتىنبىز. ءبىزدى ەركىن ويلى، قانداي جاعداي بولماسىن ءوز پىكىرىمىزدى بىلدىرۋدەن جاسقانباۋعا ۇيرەتتى. «پەداگوگيكا – بالا تاربيەلەۋ عىلىمى. ول جوعارى وقۋ ورىندارىندا جارامايدى. بالاباقشا مەن مەكتەپتە عانا جارامدى. ال جوعارى وقۋ ورىندارىندا اندراگوگيكا ءتاسىلى قولدانىلۋى ءتيىس. ول دا تاربيەلەۋ عىلىمى، ءتاسىلى – ستۋدەنتكە بالا دەپ قاراماۋ، كەرىسىنشە، ارىپتەس كورۋ، ورتاق تۇسىنىستىك تابۋ، قولداۋ، بىلگەنىڭمەن ءبولىسۋ. دامىعان ەلدەردە باياعىدان وسى تاسىلمەن جۇمىس ىستەيدى» دەپ وتىراتىن. سودان بولار، ءبىزدىڭ كۋرس ەرەكشە بولدى. ۇستازداردان جاسقانباي، وي-پىكىرىمىزدى اشىق بىلدىرەتىنبىز. بولات اعانىڭ بار ويى تەاتر ونەرىن دامىتۋ، جاڭا بەلەسكە الىپ شىعۋ بولاتىن. سول جىلدارى-اق «تەاتر ونەرى ءبىر ورىندا تۇر، كينو، ­سۋرەت، مۋزىكا – ءبارى دامىپ كەتتى» دەگەندى ءجيى ايتاتىن.
«انا ءتىلى»: ۇستازىڭىز قۇرعان «اقساراي» تەاترىنىڭ قۇرامىنا اكتەر بولىپ قالاي قابىلداندىڭىز؟
ازامات شارعىن: بۇل تەاتردى ۇستازىمىز بىزبەن، ءوزى وقىتقان بۇكىل كۋرستىڭ تۇلەكتەرىمەن قۇردى دەۋگە بولادى. 2006 جىلى «اقساراي» ميۋزيكل تەاترى قۇرىلدى. رەسپۋب­ليكا سارايىندا­ «قىز جىبەك» قويىلىمىمەن رەسمي اشىلۋىن جاسادى. از ۋاقىتتىڭ ىشىندە قازاقستاننىڭ كوپتەگەن قالاسىن ارالاپ، تبيليسي،­ اشحابادتا فەستيۆالدارعا قاتىسىپ، كوپشىلىك كورەرمەنگە تانىلىپ ۇلگەردى. «اقساراي» تەاتر الەمىنە جاڭا لەپ، وزگەشە بەت-بەينە الىپ كەلدى دەسەم، قاتەلەسپەيمىن. سپەكتاكلدەردە رەجيسسەرلىك فورما، تەرەڭ وي مەن مۇندالاپ تۇراتىن. «قىز جىبەك»، «ماحاببات پەن زۇلىمدىق»، «كوشكىن» قويىلىمدارىن بارعان جەرلەردە كورەرمەننىڭ سۇراۋى ­بويىنشا قايتالاپ قويعان كەزدەرىمىز دە بولدى. تەاترىمىزدىڭ باسقالاردان ەرەكشەلىگى – كۇڭىرەنگەن، قايعى جۇتقان نەمەسە ءتاتتى داۋىس، ءجونسىز ايعاي سياقتى شتامپتان ادا، كاسىبي رەجيسسەر، حورمەيستەر، بالەتمەيس­تەر، جاس ءارى شىنايى اكتەرلار جينالعان ۇجىم بولدىق. «اقساراي» تەاترىنىڭ ىزدەگەنى – ساحنادان اقىل ايتاتىن، «بىرىنشىدەن، نە جامان؟­ ەكىنشىدەن، نە جامان؟» دەيتىن «دانالىق» تەاتر بولۋ ەمەس، جەتكىزىلگەن ويدان كورەرمەن ءوزى شەشىم قابىلدايتىنداي «جاڭالىق» تەاتر بولۋ ەدى.
2009 جىلدان باستاپ تەاتردىڭ الەۋمەتتىك جاعدايى ناشارلاي باستادى. جىلعا جۋىق قارجىسىز جۇمىس ىستەدىك. تەاتردى ساقتاپ قالۋ ءۇشىن بولات اعا بارىن سالدى. ءبىز دە توككەن تەرىمىزدىڭ جەلگە ۇشقانىن قالامادىق. كەيىننەن ۇستا­زىمنان رۇقسات سۇراپ، دۋبلياج سالاسىنا كەتتىم.
«انا ءتىلى»: دۋبلياجعا ءوز قالاۋىڭىز­بەن كەتتىڭىز بە، الدە باسقا تەاترلارعا كوڭىلىڭىز تولمادى ما؟
ازامات شارعىن: قازاقتا «جوقشى» دەگەن ۇعىم بار. مال-جانىن جوعالتىپ نە ۇرلاتىپ، سونى تاپپاي جۇرگەن، ياعني جوق ىزدەپ جۇرگەن ادامدى ايتادى. مال دەگەن قازاق ءۇشىن، ءومىرىنىڭ ءبىر بولشەگى، قۇندى دۇنيەسى. سول تۇسىنىككە بايلانىستىرا ايتساق، ءبىز قۇرعان «اقساراي» تەاترىنىڭ، ىزدەگەن «جوعى» باسقا دا، وزگە تەاترلار­دىڭ ىزدەگەن «جوعى» مۇلدە باسقا بولىپ كورىنەدى. مەن ءۇشىن ءالى دە سولاي. سوندىقتان ىزدەگەن «جوعىمنىڭ» ول جەردە ەمەس ەكەنىن كورە تۇرا، بىلە تۇرا نەسىنە بارامىن؟ قىسقاسى، باسقا تەاترلارعا بارۋعا ءتىپتى دە قۇلقىم بولمادى.
ال دۋبلياج سالاسىنا بارۋىما ­سەبەپ تە، قىزىعۋشىلىق تا بولدى. ­ستۋدەنت كەزىمدە توقتاربەك قامشىباي دەيتىن بەلگىلى دۋبلياج رەجيسسەرىنەن ءتالىم الىپ، تۇرىكتەردىڭ «قىنالى قار» سەريالىنداعى ءالي ءمۇعالىم مەن قامباردى دىبىستاۋعا اتسالىسقانمىن. دۋبلياج ونەرى وڭاي شارۋا ەمەس. ەكىنىڭ ءبىرى، ەگىزدىڭ سىڭارى دۋبلياجدا جۇمىس ىستەي المايدى. ۇزاق ۋاقىت ۇيرەتۋگە رەجيسسەرلەردىڭ ۋاقىتى تىعىز. دۋب­لياجعا بەيىمىڭ بولماسا، قويعان تالاپتارىن از ۋاقىتتا مەڭگەرىپ كەتە الماساڭ، قابىلەتىڭ جەتپەسە، ەشكىم سەنى الديلەپ وتىرمايدى. نەگىزى بىزدە ونداي ماماندىق بار ما، ناقتى بىلمەدىم. بار بولسا، 10 جىلدان استام جۇمىس ۋاقىتىمدا «دۋبلياج ماماندىعىن ارنايى وقىپ كەلىپ وتىرمىن» دەگەن بىردە-بىر دۋبلياج اكتەرىن كورمەدىم. ءبارى – تەاتر جانە كينو ماماندىعىن بىتىرگەن قىز-جىگىتتەر. شەتەلدەردە بۇل ماماندىقتى ارنايى وقىتادى دەپ ەستىدىم. سوندىقتان دا ول جاقتا ءبىز سياقتى تەاتر، كينو اكتەرلەرىنە ­دۋبلياج سالاسىندا سۇرانىس از، ءوز كاسىبي مامان­دارى بار. بىزدە قابىلەتى بار اكتەرلەردەن جاساقتايدى. و ­باستان سولاي. بۇرىندارى بۇل سالانىڭ ­دامۋىنا ءوز ۇلەستەرىن قوسىپ، وشپەس ءىز قالدىرىپ كەتكەن ءانۋار مولدابەكوۆ، اتاگەلدى سمايىلوۆ، ماكىل قۇلانباەۆ، فاريدا ءشارىپوۆا، مۇحتار باقتىگەرەەۆ سىندى تۇلعالاردىڭ ءبارى تەاتر جانە كينو اكتەرلەرى.
بۇگىندە دۋبلياج سالاسىندا جۇر­گەنىمە 10 جىلدان اسىپتى. وسى جىلدار ىشىندە «قازاقفيلم» كينوستۋدياسى، «قازاقستان» ۇلتتىق ارناسى، «حابار»، «31»، «استانا» ارنالارى بار، ءبارىن قوسقاندا جۇزدەگەن مۋلت­فيلم، دەرەكتى جانە كوركەم فيلم­دەر، تەلەحيكايالاردى دىبىستاۋعا قا­تىسىپ­پىن. جوعارىدا اتى اتالعان ونەر مايتالماندارىنىڭ ءىزىن جالعاپ، قازاق دۋبلياج ونەرىنىڭ وركەندەۋىنە بولماشى عانا سەپتىگىم تيگەن بولسا، سونىڭ ءوزى – مەن ءۇشىن ۇلكەن قۋانىش، جەڭىس. دۋبلياج ونەرى – ۇلكەن مەكتەپ. بۇل ونەرگە بەرگەنىمنەن، العانىم كوپ بولدى. قىر-سىرىنا قانىقتىم. وسى كەرەمەت ونەرگە باۋلىعان ۇستازدارىم توقتاربەك قامشىباي، ەلميرا باۋىرجانقىزىنا العىسىم ەرەكشە. ون جىلدان اسا ۇزەڭگىلەس بولعان، دامۋ­ىما سەبەپكەر بولعان، ەكراننىڭ ارتىندا كورىنبەي وتىرعاندارىمەن قازاق كينوسىنا، دۋبلياجىنا ءالى دە ولشەۋسىز ەڭبەك ەتىپ جاتقان ارىپتەستەرىم بەكەن سابەنۇلى، ازامات قاناپيا، اباي دوسجان، ەرعالي تولەباەۆ، قايرات ادىلگەرەي، جانار شاباقوۆا، ءاليما قايىربەكقىزى، گۇلنار سماتوۆالارعا راقمەت! دۋبلياجدان قازىرگى وقىپ جاتقان ماماندىعىما تيگىزەر سەپتىگى مول تاجىريبە جينادىم دەسەم دە بولادى.
«انا ءتىلى»: ون جىلدان بەرى تەاترمەن بايلانىسىڭىزدى ءۇزىپ المادىڭىز با؟ تەاترعا قانشالىقتى ءجيى باراسىز؟
ازامات ءشارعىن: قازىر ءجيى بولماسا دا، تەاترداعى پرەمەرالارعا ءوزىم جاقسى كورەتىن، ونەرىن قۇرمەتتەيتىن اعا-اپكەلەرىمنىڭ جاساعان رولدەرىن كورۋ ءۇشىن بارىپ تۇرامىن. ءبىراق كوبىنە قويىلىمداردان اسەر الا المايمىن، جاڭالىق جوق. «سول باياعى باياعى، بايقوجانىڭ تاياعى». كەيدە­ سپەكتاكل كورىپ وتىرىپ، بولات اعانىڭ «كىرپىش بولسا، راستۆور جوق، راستۆور بولسا، كىرپىش جوق» دەگەن ءسوزى ەسىمە تۇسەدى. مەملەكەتتىك تاپسىرىس­پەن قويىلاتىن ءمانسىز قويىلىمدار، تاۋەلدى رەجيسسەرلەر، سول رەجيسسەرلەرگە وي-پىكىرىن ەركىن بىلدىرە المايتىن اكتەرلەر ۇجىمداسقان ورتادا بيىك ونەر تۋى مۇمكىن ەمەس دەگەن ويدامىن. بالكىم، بولات اعانىڭ دۇنيەلەرىندەگى تەرەڭ ويدى، تىڭ فورما، ءماندى ىزدەيتىن بولارمىن، سونى تابا الماعاننان وسىنداي پىكىردە شىعارمىن. ارينە، ءبارى بىردەي اتاباەۆ بولۋى شارت ەمەس. دەگەنمەن، 15 جىل ءوتتى عوي. قويىلىمدا دا، ويىندا دا سول ءباز باياعى ورنەك. بۇل – دامۋ جوق، وزگەرىس جوق دەگەن ءسوز.


«انا تىلى»: بۇگىندە كينو سالاسىندا جۇرگەن ءسىز ءۇشىن تەاتردىڭ ومىرىڭىزدە الاتىن ورنى قانداي؟
ازامات شارعىن: «تاشكەن كورگەن جىگىت» دەگەندەي، تەاتر كورگەن، ساحنا سىرىن از دا بولسا سەزىنگەن اكتەر رەتىندە بىلەرىم، كاسىبي اكتەر ءۇشىن تەاتردىڭ ورنى بولەك. ونىڭ كينوعا بەرگىسىز ارتىقشىلىقتارى، ءوز ءلاززاتى بار. كورەرمەن ءۇشىن دە، اكتەر ءۇشىن دە. كينو – ارتىق-كەم تۇسى جونىلىپ، ەكشەلىپ، كوركەمدەلىپ بارىپ ۇسىنىلاتىن ءونىم. اكتەر ويدى جەتكىزە الماسا نە قاتەلەسسە، رەجيسسەردىڭ كوڭىلىنەن شىقپايىنشا، ساحنانى قايتالاپ تۇسىرە بەرەدى. ال تەاتردا قاتەلىككە ورىن جوق. سپەكتاكل – ءتىرى اعزا، ءتىرى پروتسەسس. باستان-اياق كەيىپكەرىڭ مەن كورەرمەن اراسىنداعى ءجىپتى ۇزبەۋىڭ كەرەك. تەاتر – ۇجىمدىق ونەر. فۋتبول سياقتى. قويىلىمدا جالعىز اكتەرگە نە رەجيسسەرگە عانا سەنىم ارتىلسا، مەسسيگە سەنىپ «ليۆەر­پۋلدان» تاس-تالقانى شىققان «بارسە­لونانىڭ» كۇيىن كەشەدى. سوندىقتان دا ۇجىمدا ءاربىر مامان ماڭىزدى.
ال ەگەر پەساعا تىڭ فورما بەرىلىپ، سۋرەتشى ويلى شەشىمدەرىمەن تولىق­تىرسا، اكتەرلەر سول بەرىلگەن جاعدايدا شىنايى ءومىر سۇرە بىلسە، سەندىرسە… وندا كورەرمەندەر تەاتردان دا كينوعا بەرگىسىز اسەر الىپ شىعاتىنىنا سەنىمدىمىن.
«انا ءتىلى»: سوندا ەلىمىزدە ءسىزدىڭ كوڭىلىڭىزدەن شىعاتىن تەاتر جوق پا؟
ازامات شارعىن: ماعان كورنەكتى رەجيسسەر نۇرعانات جاقىپباي اعامىز باسقاراتىن ەلوردامىزداعى «جاستار» تەاترى ۇنايدى. ولاردا ىزدەنىس بار. بىر-ەكى قويىلىمدارىن كوردىم. ­رەجيسسەر مەن اكتەر اراسىنداعى ءوزارا بايلانىس، تۇسىنىستىك، ىسكە ادالدىق، اۋىزبىرشىلىك – ءبارى ايقىن كورىنىپ تۇر. ىستەرىنە ادال ۇجىم.
دانيار بازارقۇلوۆ پەن دينا ­جۇما­باەۆانىڭ جاڭا ورنەك ىزدەپ، وزگەرىسكە ۇمتىلىپ جاتقاندارى قىزىقتىرادى. سونداي باستامالاردى مەملەكەت قولداسا، دامىتسا ەكەن دەيمىن. ينتەرنەت، تەحنولوگيا زامانىنداعى كورەر­مەننىڭ وي-تانىمى العا شىعىپ كەتكەن. كوپ ويلانادى، ىزدەنەدى. ولارعا ۋاقىتپەن قاتارلاسا شاپقان ارت-حاۋس، ينتەللەكتۋالدى دۇنيەلەر قاجەت.
«انا ءتىلى»: سول «قاجەتتى» قالاي تولتىرامىز؟ ونەر سالاسىن دامىتۋ ءۇشىن نە ىستەۋ كەرەك؟
ازامات شارعىن: قۇداي بەرە سالعان ديماش دەگەن باۋىرىمىز بار، قۇدايبەرگەنوۆ! سول ديماش الەم بويىنشا كوپتەگەن تىڭدارماننىڭ ءان ونەرىنە دەگەن كوزقاراسىن وزگەرتتى، تانىم-تالعام دەڭگەيلەرىن تاعى دا ءبىراز جەرگە، زاۋ بيىككە كوتەرىپ ­تاستادى، ءاننىڭ قۇدىرەتىن سەزىندىردى. جەكە ءوز باسىما، كاسىبي ماماننىڭ سەزىنىپ سالعان ءانى كينو كورگەندەي، تاماشا كىتاپ وقىعانداي عاجاپ اسەرگە بولەي الاتىندىعىنا كوزىمدى جەتكىزدى. اباي بابامىز قارا سوزىندە: «سوكراتقا ۋ بەرگەن، عايسانى دارعا اسقان، پايعامبارىمىزدى تۇيەنىڭ جەمتىگىنە كومگەن كىم؟ ول – كوپ، دەمەك، كوپتە اقىل جوق. ەبىن تاپ تا، جونگە سال» دەيدى. ايتپاعى، شىعارما، قويىلىم، كينو، ءان بولسىن، «كوپتىڭ جەتەگىنە ەرمەڭدەر، ەبىن تاۋىپ جەتەكتەڭدەر، تالعام-تانىمىن وسىرىڭدەر، دۇرىس باعىتتى سىلتەڭدەر» دەپ تۇر ەمەس پە؟
ونەردىڭ قاي سالاسىنا دا، ول مەيلى كينو، سۋرەت، مۋزىكا، تەاتر بولسىن، حالىقتىڭ سول ونەرگە دەگەن تانىم-تالعامىن بيىكتەتەتىن، قۇندى ويلارىمەن بولىسەتىن، دامۋعا، وزگەرۋگە سەپتىگىن تيگىزەتىن ديماش سياقتى كاسىبي، ەركىن ويلى ماماندار كەرەك.
«انا ءتىلى»: ال قازىرگى رەجيسسەر­لەردىڭ ىشىنەن كىمنىڭ ەڭبەگى كوڭىلىڭىز­دەن شىعادى؟
ازامات شارعىن: وزىمىزدەن ەمير ءبايعازيننىڭ، ءشاريپا ورازباەۆانىڭ ىزدەنىستەرى قىزىقتىرادى. شەتەلدىك­تەردەن بەرگمان، تاركوۆسكي، قىس­قاسى، «سوقىر تاۋىققا ءبارى تاڭ» دە­مەك­شى، ىزدەنىس ۇستىندە جۇرگەن ماعان ءدال ءقازىر ءبارى تاڭ بولىپ تۇر…
«انا ءتىلى»: وزىڭىز دە كينورەجيس­سەرلىك ءبىلىم الىپ جاتىر ەكەنسىز؟ قولعا ديپلوم العان سوڭ، قانداي فيلم ءتۇسىرۋ ويىڭىزدا بار؟
ازامات شارعىن: بارىنشا ىزدەنىپ، كاسىبيلىككە جەتىپ، كينو ارقىلى، قۇندى ويلار ايتقىم كەلەدى. مەنىڭ تانىم­ىمدا كينو – ويىن-ساۋىق، بولماسا يدەولوگيا قۇرالى عانا ەمەس، سونداي-اق ادام جانىن ۇڭگي الار، تۇڭعيىعىنا ۇڭىلە الار قۇرال. ال رەجيسسەر – بىلگەن-تۇيگەنىن سول قۇرال ارقىلى كورەرمەنگە جەتكىزۋشى، ءبولىسۋشى. كينودا ەكى سۇرلەۋ بار. ءبىرى – اۆتورلىق، ەكىنشىسى – جانرلىق. اۆتوردىڭ ىزدەگەنى – جان ازىعى، جانردىڭ كوزدەگەنى – ءتان ازىعى دەپ تۇسىنەمىن.
«انا تىلى»: دەمەك، ءسىزدى اۆتورلىق كينودان كورەتىن بولامىز؟
ازامات شارعىن: بۇيىرسا دەيىك… قولدان كەلە مە؟ ءالى بەلگىسىز. «ۇستازدان شاكىرت وزار» دەگەن ءسوز بار. بۇل جەردەگى وزۋدى – دامۋ دەپ تۇسىنەمىن. بولات اعانىڭ بىزگە بەرگەن ءبىلىمىن، جەتكىزگەن ويلارىن ويلاسام، دىم بىتىرمەي جۇرگەنىمە قىسىلام، قىنجىلام، وزىمە كوڭىلىم تولمايدى. دەمەك، دامىمادىم. ىزدەنبەدىم. كينورەجيسسەر بولۋعا جەتەلەگەن وسى وي بولار، بالكىم؟ اعايدىڭ ارمانى – ءبىزدىڭ دامىعانىمىز، وزىنەن وزا شاپقانىمىز ەدى. «دامۋ دەگەن، مەن 10 جىلدا جەتكەنگە، سەندەر 5 جىلدا، ال بالالارىڭ 2 جىلدا جەتۋى كەرەك» دەپ وتىراتىن. ول كىسى مەن ءۇشىن، تەك ۇستاز عانا ەمەس، ەكىنشى اكەمدەي. ال بالا بولماشى جەتىستىگىن اكەسىنە كورسەتكىسى، وڭ باعاسىن، باتاسىن العىسى كەلىپ تۇرادى عوي؟ مەن دە ۇستازىمنىڭ وڭ باعاسىن العىم كەلەدى. كورسەتكەن باعىتىنىڭ، بەرگەن ءبىلىمىنىڭ زايا كەتپەگەنىن كورسەتكىم كەلەدى. ءبىراق قولىمنان كەلە قويار ما؟ ورە-تانىمىم جەتە مە؟ بىلمەيمىن. بىلەتىنىم، تالپىنىپ كورەمىن. شەرحان مۇرتازا اتامىز 60-قا تولعاندا، ورالحان بوكەي: «اعا، ءسىز مەنىڭ ۇستازىمسىز! مەن سىزگە شاكىرت بولعانىمدى ماقتان تۇتام! مىنە، ءسىز الپىس دەگەن اسۋعا شىقتىڭىز. تومەنگە قاراڭىزشى، اعا، مەن كورىنەم بە ەكەم؟» دەپ حات جازعان ەكەن. ياعني ۇستازىنان: «دامۋ، جىلجۋ بار ما مەندە؟» دەپ سۇراپ تۇر عوي. مەن دە ءبىر كۇندەرى ورالحان بوكەي سەكىلدى حات جازعىم كەلەدى.
«انا ءتىلى»: شىعارماشىلىعىڭىزعا تابىس تىلەيمىن! سۇبەلى سۇحبا­تىڭىزعا راقمەت!

سۇحباتتاسقان 
اسەل سارقىت



كەلۋ قاينارى: http://www.elarna.net/koru.php?tur=6&id=1021740

پىكىرلەر:


جازعان لەبىزىڭىز300 ارىپتەن اسپاسىن!
ادام نەمەسە ۋيروس ەكەندىگىڭىزدى تۇراقتاندىرۋ سۇراعى، كاتەكشەگە ءجۇز دەپ سيفىرمەن جازىڭىز، راحىمەت!

ەل-ارنا ءوز گازەتى

ەڭ جاڭا ماقالالار


پوەزيا اللەياسى” اشىلدى 1 مينوت
پايعامبارىمىزدىڭ ادامدا 1 مينوت
حابارلاندىرۋ!  – 11 مينوت
بيىل تۇركىستاندا 2،5 مل 19 مينوت
بالانى ءجيى ماقتاسا، ول 1 ساعات
باس ءمۇفتي استانادان ات 1 ساعات
نورۆەگيالىق ەكى عالىم ا 1 ساعات
ساياساتكەر ەرتەڭ جانە ا 1 ساعات
قازاقتىڭ تۋىن ۇستاعان ا 1 ساعات
جاڭا جىلدى تويلاعاندارد 1 ساعات
گاندبولدان الەم چەمپيون 1 ساعات
پاراساتتىلار ءوز ومىرىن 1 ساعات
9 جەلتوقسان. تۋعان كۇن 1 ساعات
ەمشىلەر كەسەدى، كۇيدىرە 2 ساعات
باس ءمۇفتي الماتىلىق قا 2 ساعات
دۇيسەنبىگە ارنالعان اۋا 2 ساعات
ديماشتى نيۋ-يوركتەگى جا 2 ساعات
نيۋ-يوركتە ديماشتى جانك 2 ساعات
9 جەلتوقسان. قازاقپارات 2 ساعات
ەسكە ساقتاۋمەن ەمەس، ءو 3 ساعات
中国哈萨克语广播网 3 ساعات
بايگە! بايگە! بايگە! &# 3 ساعات
中国哈萨克语广播网 3 ساعات
تيانشان تورى 3 ساعات
اتىراۋدا جەڭىل كولىكپەن 3 ساعات
中国哈萨克语广播网 4 ساعات
تيانشان تورى 4 ساعات
تيانشان تورى 4 ساعات
عالىمدار سولاقاي ادامدا 4 ساعات
中国哈萨克语广播网 4 ساعات