ءتۇرى: Ult.kz ۇلىت تورابى
جولدانعان ۋاقىتى: 22:20 - 2021/04/08
رەسپۋبليكالىق دياگنوستيكالىق ورتالىقتىڭ كلينيكالىق يممۋنولوگيا، اللەرگولوگيا جانە پۋلمونولوگيا ءبولىمىنىڭ مەڭگەرۋشىسى، مەديتسينا عىلىمدارىنىڭ دوكتورى ەلەنا كوۆزەل ۆاكتسينا العاننان كەيىن قانداي جاعدايلاردا كوروناۆيرۋس جۇقتىرۋ مۇمكىن ەكەنىن ايتتى، دەپ حابارلايدى قازاقپارات ءتىلشىسى.
«ارينە، ۆاكتسيناتسيادان كەيىن جۇقتىرۋ مۇمكىندىگى بار. ۆاكتسينالىق جاۋاپ دەگەنىڭ ءوزى سالىستىرمالى ۇعىم. كەيبىر ادامداردا يممۋندىق رەاكتسيا كۇشتى، ال باسقالارىندا ءالسىز بولادى. ەگەر ۆاكتسيناتسيادان كەيىن جەتكىلىكتى يممۋندىق قابىلەت پايدا بولماسا، ارينە، جۇقتىرۋ ءقاۋپى بار. ەگەر ناۋقاستا ورتاشا يممۋندىق جاۋاپ پايدا بولسا، ءبىراق ۆيرۋستىڭ شابۋىلى كۇشتى بولسا، بۇل جاعدايدا دا ينفەكتسيا جۇعۋى مۇمكىن. ءبىراق ءبىز ۆاكتسيناتسيادان كەيىن ۆيرۋستىڭ شابۋىلى باسەڭدەيتىن شىعار دەپ وتىرمىز»، - دەدى مەديتسينا عىلىمدارىنىڭ دوكتورى.
ونىڭ ايتۋىنشا، ينفەكتسيانىڭ جۇعۋ ءقاۋپى اعزانىڭ كۇيىنە بايلانىستى.
«مىسالى، ينفەكتسيا شابۋىلداعان كەزدە ادام تاعى ءبىر ۆيرۋستىڭ شابۋىلىنا قاتار ۇشىرادى نەمەسە باسقا ءبىر اۋرۋدىڭ ورشۋىنە بايلانىستى حيميوتەراپيا الىپ جۇرگەن كەزگە تاپ كەلدى دەيىك. مۇنداي جاعدايدا ۆاكتسينا تۋدىرعان يممۋندىق قابىلەت ءبىز كۇتكەن قورعانىس بەرە الماۋى مۇمكىن»، - دەدى ەلەنا كوۆزەل.
