سەرگەي لاۆروۆتىڭ ساپارى قازاقستان مەن رەسەي اراسىنداعى قاتىناستاردى نىعايتۋعا جانە كەڭەيتۋگە دەگەن ورتاق نيەتىمىزدى راستايدى. بۇگىنگى ەكىجاقتى كەلىسسوزدەردى قورىتىندىلاعان سىرتقى ىستەر ءمينيسترى مۇحتار تىلەۋبەردى وسىنداي پىكىر ءبىلدىردى، دەپ حابارلايدى قازاقپارات.

«رەسەيمەن ىنتىماقتاستىق قازاقستان سىرتقى ساياساتىنىڭ باسىم باعىتتارىنىڭ ءبىرى بولدى جانە سولاي قالا بەرەدى. وسى جىلدار ىشىندە قازاقستان دوستاس سەرىكتەستىك قاتىناستارعا بەرىكتىگىن كورسەتتى.

جاقىن كۇندەرى «بايقوڭىر» عارىش ايلاعىنان ادامنىڭ تۇڭعىش رەت عارىشقا ۇشقانىنا 60 جىل تولاتىنى دا سيمۆولدىق مانگە يە. بۇگىندە بايقوڭىر – قازاقستان مەن رەسەي اراسىنداعى ستراتەگيالىق سەرىكتەستىك پەن ىنتىماقتاستىقتىڭ سيمۆولى. عارىش ايلاعىن دامىتۋ، «بايتەرەك» عارىشتىق زىمىران كەشەنىن قۇرۋ، جەردى قاشىقتىقتان زوندتاۋ سالاسىنداعى ءوزارا ارەكەتتەسۋ، سونداي-اق «گاگارين ستارتى» جوباسىن جاڭعىرتۋ بويىنشا جۇمىستار جالعاسۋدا»، - دەدى ۆەدومستۆو باسشىسى.

مينيستر كەلىسسوز كەزىندە حالىقارالىق كۇن تارتىبىندەگى ءتۇرلى ماسەلەلەر بويىنشا ەكى تاراپتىڭ ۇستانىمدارى تالقىلانعانىن اتاپ ءوتتى.

«بىز تمد، ۇقشۇ، بۇۇ، ەقىۇ، شىۇ جانە اوسشك سياقتى حالىقارالىق ۇيىمداردىڭ الاڭدارىنداعى بىرلەسكەن جۇمىسقا ۇلكەن ءمان بەرەمىز. حالىقارالىق كۇن تارتىبىندەگى ءتۇرلى ماسەلەلەر بويىنشا ۇستانىمداردىڭ ورتاقتىعىن راستاپ، قاۋىپسىزدىك نەگىزدەرىن ايماقتىق ءارى جاھاندىق دەڭگەيدە دە نىعايتۋ بويىنشا بىرلەسكەن قادامداردى جالعاستىرۋعا كەلىستىك.

كورىپ وتىرعاندارىڭىزداي، COVID-19 پاندەمياسىنا قاراماستان، بيىل ەلدەرىمىز اراسىنداعى قاتىناستاردىڭ جوعارى سەرپىنى ساقتالىپ وتىر، بۇل ىنتىماقتاستىعىمىزدى ۇنەمى باقىلاۋعا مۇمكىندىك بەرەدى. بىزگە مەملەكەت باسشىلارىمىز قويعان قازىرگى جانە ۇزاق مەرزىمدى مىندەتتەردى شەشۋگە سىندارلى تاسىلدەر قاجەت.

لاۆروۆ مىرزانىڭ ساپارى قازاقستان مەن رەسەي اراسىنداعى سان قىرلى جانە كەشەندى قاتىناستاردى نىعايتۋعا جانە كەڭەيتۋگە دەگەن ورتاق نيەتىمىزدى راستايدى.

بۇگىنگى كەزدەسۋدىڭ ناتيجەلەرى ىنتىماقتاستىقتى ودان ءارى دامىتۋدىڭ كەپىلى بولاتىنىنا جانە حالقىمىزدىڭ مۇددەلەرى نەگىزىندە تاتۋ كورشىلىك پەن سەرىكتەستىككە تىڭ سەرپىن بەرەتىنىنە سەنىمدىمىن»، - دەدى مۇحتار تىلەۋبەردى.