قر ۇكىمەتىنىڭ ءباسپاسوز ورتالىعىندا تسيفرلىق دامۋ، يننوۆاتسيالار جانە اەروعارىش ونەركاسىبى ۆيتسە-مينيسترى ابىلايحان وسپانوۆ ءباسپاسوز جيىنىن وتكىزدى، – دەپ حابارلايدى «ۇلت اقپارات».

ۆيتسە ءمينيستردىڭ ايتۋىنشا، 1 قاراشادان باستاپ «مەكەنجاي انىقتاماسى» مەملەكەتتىك رەەستردەن مۇلدەم الىنىپ تاستالادى.

«وسىعان دەيىن بۇل اقپارات جۇمىسقا ورنالاسۋ، مەكتەپكە، بالا­باقشالارعا جانە مەديتسينالىق مەكەمەلەرگە رەسىمدەۋ كەزىندە تالاپ ەتىلىپ كەلگەن ەدى. حالىق ءماجبۇر بولدى. نەگىزىندە، زاڭعا سايكەس ەشبىر ازامات ءوزىنىڭ قاي جەردە تۇراتىنى تۋرالى قۇجاتتى اكەلىپ بەرۋگە ءتيىس ەمەس. ول ەشقانداي باپتا كورسەتىلمەگەن. بۇدان بىلاي قازاقستاندىق ازاماتتار بىرەۋگە دالەلدەۋگە دە مىندەتتى ەمەس. مەملەكەتتىك ورگاندار دا، ءبىلىم بەرۋ مەكەمەلەرى دە سۇراتا المايدى» دەدى ۆيتسە-مينيستر ابىلايحان وسپانوۆ.

وسپانوۆتىڭ ايتۋىنشا، مەملەكەتتىك ورگاندار مەكەنجاي دەرەكتەرىن ىشكى ىستەر مينيسترلىگىنىڭ دەرەكتەر بازاسىمەن ينتەگراتسيالانعان اقپاراتتىق جۇيەلەر ارقىلى الاتىن بولادى.

قاجەت بولعان جاعدايدا قازاقستاندىقتار تىركەۋگە تۇرعان مەكەنجايلارىن egov.kz ەلەكتروندى ۇكىمەت پورتالى مەن eGov mobile قوسىمشاسىنداعى جەكە كابينەتى ارقىلى تەكسەرە الادى.

«وسى جىلدىڭ وزىندە مەكەنجاي انىقتاماسىن الۋ ءۇشىن ادامدار حالىققا قىزمەت كورسەتۋ ورالىقتارىنا 9 ملن رەت بارعان. جۇمىس بەرۋشىنىڭ بۇل انىقتامانى سۇراتۋعا حاقىسى جوق. ال، ەگەر جەكە تۇلعا ءوزى قايدا تىركەلگەنىن بىلگىسى كەلسە، egov.kz پورتالىنداعى جەكە كابينەتىنە كىرىپ كورە الادى. جاڭادان جۇمىسقا ورنالاسىپ جاتقان ازاماتتار ەڭبەك شارتىندا تۇرعىلىقتى مەكەنجايىن جازىپ كورسەتەدى. سوعان قاراماستان، جۇمىس بەرۋشى قويماي سۇراتسا، كەز كەلگەن جەكە تۇلعا سوت ورگاندارىنا بارىپ شاعىمدانا الادى» دەپ اتاپ ءوتتى ىشكى ىستەر مينيسترلىگىنىڭ كوشى-قون قىزمەتى كوميتەتى ءتوراعاسىنىڭ ورىنباسارى گالينا سارسەنوۆا.

باسقا ۇيىمدار، سونىڭ ىشىندە جەكە كومپانيالار egov.kz ەلەكتروندىق ۇكىمەت پورتالىنداعى ءۇشىنشى تۇلعالارعا انىقتاما بەرۋگە مۇمكىندىك بەرەتىن سەرۆيستى پايدالانا الادى. بۇل تەك ازامات ءبىر رەت اقپارات الۋعا رۇقسات بەرەتىن SMS-كە كەلىسىم بەرگەندە عانا جۇزەگە اساتىن وپەراتسيا.