الەمدە تالاي قىزىق بار، وسى زامانعى جاڭاشىلدىق پەن تەحنولوگيالىق پروگرەستى جەلەۋ ەتىپ، ويعا كەلمەيتىن، بالكىم، ناسيحاتتاۋ، دارىپتەۋ نەمەسە پايدا تابۋ ءۇشىن ءتۇرلى جوبالار قولعا الىنىپ جاتادى. الەمگە ايگىلى Google كومپانياسىنىڭ بۇرىنعى ينجەنەرى  ەنتوني لەۆاندوۆسكي (سۋرەتتە - رەد.) ءوزى اشقان جاساندى زەردە شىركەۋىن جاپتى. بۇل جايىندا islam.kz پورتالى Axios اقپارات كوزىنە سىلتەمە جاساي وتىرىپ ءمالىم ەتەدى. ەگەر رەسمي قۇجاتتارعا سەنسەك، Way of the Future («بولاشاققا جول») دەپ اتالاتىن اتالمىش شىركەۋ 2020 جىلدىڭ سوڭىندا جابىلعان. ال ونى جويۋ پروتسەسى وتكەن جىلدىڭ ماۋسىم ايىندا باستالىپ تا كەتكەن ەدى. وقىرمانعا تۇسىنىكتى بولۋ ءۇشىن اتالعان شىركەۋدىڭ 2015 جىلى اشىلعانىن ايتا كەتپەكپىز. ونىڭ نەگىزىندە تەحنولوگياعا تابىنۋ يدەياسى جاتقان بولاتىن. ەنتوني لەۆاندوۆسكيدىڭ سوزىنە قاراعاندا، جاساندى زەردە ءتۇپتىڭ تۇبىندە قۇدايعا اينالادى-مىس. ال TechCrunch دەرەك كوزىنىڭ مالىمەتىنشە، شىركەۋدەگى «ساداقادان» جينالعان 175 172 دوللار مولشەرىندەگى قاراجات قۇقىقتىق قوراعۋ جانە ءبىلىم بەرۋ قورىنا (NAACP) اۋدارىلعان. بۇل شىركەۋ نە ءۇشىن جابىلدى دەگەن ساۋالدىڭ جاۋابىنا كەلسەك، ەنتوني لەۆاندوۆسكي Google تەحنولوگياسىن قولدى قىلعان، ياعني، ۇرلاعان. 2017 جىلى اتالمىش كومپانيادان كەتەرىندە ول Google Waymo دەپ اتالاتىن ەنشىلەس كومپانيا ازىرلەگەن جۇرگىزۋشىسىز اۆتوكولىكتىڭ تەحنولوگياسىنا قاتىستى ماعلۇماتتاردى كوشىرىپ العان. ارتىنان ينجەنەر ءوزىنىڭ Otto ستارتاپىن قولعا الادى. بۇل ستارتاپتى Uber تاكسي اگرەگاتورى ساتىپ العان ەدى. Waymo ەنشىلەس كومپانياسى Uber-مەن سوتتاسادى - ەنتوني لەۆاندوۆسكي ۇرلاعان تەحنولوگيانى پايدالانعانى ءۇشىن. الايدا، اتالعان ەكى كومپانيا 2018 جىلى بىتىمگە كەلگەن بولاتىن. ال ەنتوني لەۆاندوۆسكيدگە 2021 جىلدىڭ قاڭتار ايىندا اق ءۇي قوجايىنى دونالد ترامپ راقىمشىلىق ەتكەن بولاتىن. وسىلايشا جاساندى زەردە عيباداتحاناسى «قوجايىنىنىڭ» ۇرلىق ارەكەتىنەن جابىلىپ تىندى. دەسە دە ينجەنەر ارەكەتىنىڭ كەزىندە وزدەرىنىڭ مارتەبەسىن كوتەرۋ ءۇشىن بالشىقتان يلەپ پۇت جاساپ الاتىن قاراڭعىلىق داۋىرىندەگى ادامداردان ايىرماشىلىعى شامالى ەكەنىن ايتا كەتپەكپىز – بار ارتىقشىلىعى تەحنولوگيالىق جەتىستىكتى جەلەۋ ەتۋ ارقىلى پايدا تابۋ... وسى ورايدا ساەنتولوگيانىڭ نەگىزىن قالاعان ل. رون حابباردتىڭ «بايىعىڭ كەلسە، ءدىن ويلاپ تاپ» دەيتىن ءسوزى ويعا ورالادى: ەڭ وكىنىشتىسى، مۇنداي سوراقى ارەكەتتەردىڭ شىلاۋىندا تالاي ادامنىڭ كەتەتىنى بار.