كۇندىزگىگە قاراعاندا تۇندە قان قىسىمى كوتەرىلەتىن ەگدە جاستاعى ادامداردىڭ ەمى جوق ءارى الجۋدىڭ ولىمگە اپارار ءتۇرى – التسگەيمەر اۋرۋىنا ۇشىراۋ ىقتيمالدىعى باسىم. بۇل باعىتتا ارنايى زەرتتەۋ مەن تاجىريبە جۇرگىزگەن شۆەد عالىمدارىنىڭ تۇجىرىمى وسىنداي. بۇل جايىندا islam.kz پورتالى اتالمىش زەرتتەۋ ماتەريالى جاريالانعان Hypertension مەرزىمدى باسىلىمىنا سىلتەمە جاساي وتىرىپ ءمالىم ەتەدى. كۇندىزگى جانە تۇنگى سيستوليلىك قان قىسىمى (جۇرەك قان تامىرلارىنا اسەر ەتەتىن قان قىسىمى) كورسەتكىشى اراسىنداعى اراقاتىناستاعى ايىرماشىلىق اقىل-ەستىڭ كەمۋىن دە قامتيتىن بولاشاقتاعى دەنساۋلىققا تونگەن ءقاۋىپتىڭ الدىن الا حابارشىسى بولۋى مۇمكىن. ساۋ ادامداردىڭ قان قىسىمى تۇندە تومەندەيدى – 10-12 پايىزعا. ال 10 پايىزعا جەتپەي تومەندەسە، دارىگەرلەردىڭ ايتۋىنشا، بۇل قاتەرلى بەلگى – جۇرەك-قان تامىرلارى جۇيەسىندەگى اقاۋعا مەڭزەۋى مۇمكىن. تۇندە قان قىسىمىنىڭ تومەن تۇسكەنى عانا ەمەس، جوعارىلاعانى دا جاقسىلىقتىڭ نىشانى ەمەس. عالىمدار بۇل تاراپتا ارنايى تاجىريبە جۇرگىزىپ، جاسى 60-تان اسقان مىڭداعان شۆەد قاريالارىنىڭ دەنساۋلىعىن 24 ساعات بويى قاداعالاعان ەكەن. تاۋلىك بويى جۇرگىزىلگەن قان قىسىمىنىڭ امبۋلاتورلىق مونيتورينگى ورتاشا ەسەپپەن العاندا  71 انە 77،6 جاستاعىلارعا وتكىزىلدى. دەمەنتسيا دەرتى (الجۋ) پاتسيەنتتەردىڭ اۋرۋ تاريحىنا قاراپ انىقتالدى جانە تاجىريبەلى ەكى گەرياتر راستادى. كۇندىزگى دانە تۇنگى سيستوليلىك قان قىسىمى اراقاتىناسىنىڭ جوعارى كورسەتكىشكە يە بولۋى دەمەنتسيا دەرتىنە شالدىعۋ قاتەرىن 1،64 ەسەگە جانە التسگەيمەر اۋرۋىنىڭ قاتەرىن 1،67 ەسەگە ارتتىرعان.