تۇركيانىڭ كەتچۋپ پەن مايونەز جانە تۇزدىق (سوۋس) نارىعى ەۋروپا مەن اقش-تا جىلدان جىلعا ءوسىپ كەلەدى. بۇل جايىندا islam.kz پورتالى aa.com.tr اقپارات كوزىنە سىلتەمە جاساي وتىرىپ ءمالىم ەتەدى. وتكەن جىلى (2020 ج.) اتالعان ەل كەتچۋپ پەن تومات تۇزدىعىنىڭ ەكسپورتىنان شامامەن 19،4 ملن دوللار، ال تومات پاستاسىنىڭ ەكسپورتىنان 157 ملن دوللار جانە مايونەز ەكسپورتىنان 15 ملن دوللار پايدا تاۋىپتى. تۇركياداعى كەتچۋپ پەن مايونەز جانە تۇزدىق وندىرۋمەن اينالىساتىن ااسا ءىرى Assan Foods كومپانياسىنىڭ باس ديرەكتورى حاكان كوشوعلىنىڭ ايتۋىنشا، پاندەميا كۇللى الەم بويىنشا ازىق-تۇلىك قاۋىپسىزدىگىنىڭ قانشالىقتى ماڭىزدى ەكەنىن ۇقتىرىپ كەتتى. تۇرىكتەر پاندەميانى پايدالانا وتىرىپ، كوپتەگەن اۋىل شارۋاشىلىق ونىمدەرى مەن ازىق-تۇلىك ونىمدەرىنىڭ نارىعىن كەڭەيتۋگە قول جەتكىزگەن. وسىلاي دەگەن ول ءوزى باسقارىپ وتىرعان Assan Foods كومپانياسىنىڭ تەك كەتچۋپ پەن مايونەز، ت.ب. ونىمدەرىن عانا ەمەس، سونىمەن قاتار، 300 ازىق تۇرلەرىن وندىرەتىنىن جەتكىزدى. دەسە دە ونىمدەرىنىڭ 30 پايىزىن كەتچۋپ پەن 30 پايىزىن تومات پاستاسى قۇرايتىنىن جاسىرمادى. Assan Foods ونىمدەرى Colorado، Kingtom، Oba جانە 'private label دەگەن ماركامەن الەمنىڭ 50 ەلىنە ەكسپورتتالادى. سونداي-اق، ول تاياۋ شىعىس پەن قاپ تاۋى ەلدەرى جانە افريكا ەلدەرى نەگىزىنەن تۇركيادان تومات پاستاسىن ەكسپورتتايتىنىن، ال تاياۋ شىعىس پەن ەۋروپا ەلدەرىندە تۇرىكتىڭ كەتچۋپ، مايونەز جانە تۇزدىعىنا سۇرانىس جوعارى ەكەنىن كولدەنەڭ تارتتى.  سونىڭ ىشىندە تۇرىكتەردىڭ TexMex تۇزدىعىن ەۋروپالىقتار ماكارون ونىمدەرىنەن جاسالعان تاعامدارعا قوسىپ جەگەندى جاقسى كورەتىنىن ايتا كەتۋدى دە ۇمىتپادى.