اقمولا وبلىسىندا ءورتتىڭ سالدارىنان اكەسى مەن بالاسى قازا تاپتى. قايعىلى وقيعا بۇگىن تۇندە زەرەندى اۋدانىنىڭ الەكسەەۆكا اۋىلىندا بولعان، – دەپ حابارلادى اۋىل اكىمدىگى. 

ەر ادام ورتتەن الىپ شىعىپ ۇلگەرگەن تاعى ءبىر بالا اۋرۋحانادا جاتىر.

الەكسەەۆكا اۋىلى كوكشەتاۋ قالاسىنان وتىز شاقىرىم جەردە ورنالاسقان.

تۇنگى ساعات ۇشتە ءورت ءسوندىرۋ قىزمەتىنە تۇرعىن ءۇيدىڭ ورتەنىپ جاتقانى تۋرالى حابارلاما تۇسكەن.

وقيعا ورنىنا بەس ءورت ءسوندىرۋ كولىگى كەلگەن، ءبىراق ادامداردى قۇتقارىپ ۇلگەرمەگەن.

قايتىس بولعان 30 جاستاعى ەر ادامنىڭ تۋىستارىنىڭ ايتۋىنشا، ورتكە ورانعان ۇيدە اكەسى 6 جانە 1 جاسار ەكى بالاسىمەن بىرگە تۇرعان. ال اناسى اۋرۋحانادا ەمدەلىپ جاتقان. ەر ادام كەنىشتە اۆتوسلەسار بولىپ جۇمىس ىستەگەن.

تۇندە ءورت شىققان كەزدە ەر ادام كىشى ۇلىن كورشى ۇيدە تۇراتىن قايىن اتاسىنا اپارىپ ۇلگەرگەن. اكە جالاڭ اياق جۇگىرىپ كەلگەن.

بالانى سوندا قالدىرعان ول ۇيىنە قايتا بارعان.

تۋىستارى ەر ادامنىڭ ورتەنىپ جاتقان ۇيگە جۇگىرىپ كىرگەنىنە، ارتىنان قاتتى داۋىس شىعىپ، گاز باللونىنىڭ جارىلعانىنا كۋا بولعان.

وقيعا ورنىنا كەلگەن قۇتقارۋشىلار اكەسى مەن بالاسىنىڭ ءمايىتىن تاپقان. گاز باللونى جارىلعان كەزدە ەر ادام ۇلىن دەنەسىمەن جاۋىپ قالعان، الايدا ەكەۋى دە سول جەردە مەرت بولعان.

قازىرگى ۋاقىتتا امان قالعان ءسابي اجەسىمەن بىرگە اۋرۋحانادا جاتىر. اۋىل تۇرعىندارى، ەرىكتىلەر، اكىمدىك پەن كەنىش قىزمەتكەرلەرى اقشا جيناپ، جەرلەۋ ءراسىمىن ۇيىمداستىرۋمەن اينالىسىپ جاتىر.

بۇعان دەيىن جامبىل وبلىسىندا ءۇي ورتەنىپ، 5 بالا قازا تاپقانىن جازعان بولاتىنبىز.