اۋەزوۆ اۋدانىنداعى التىن بەسىك ىقشاماۋدانىنىڭ تۇرعىندارى 17 اقپاندا وتكەن الماتى قالاسى اكىمىنىڭ ەسەپتىك كەزدەسۋىندە جاتاقحانا سالۋ جوسپارىن قايتا قاراۋ تۋرالى وتىنىشتەرىن بىلدىرگەن ەدى.
ولار ءوز وتىنىمدەرىندە قالا باسشىسىن جوسپارلانعان قۇرىلىس ورنىنا شاقىرعان بولاتىن.
«اتالعان جەرگە بارىپ، الماتى تەحنولوگيالىق ۋنيۆەرسيتەتىنىڭ ستۋدەنتتەرىنە ارنالعان جاتاقحانا عيماراتىنا جەر تەلىمىن بەرۋ تۋرالى قاۋلىنىڭ كۇشىن جويۋ تۋرالى شەشىم قابىلدادىم. جۋىردا ستۋدەنتتىك ءۇي ءۇشىن باسقا قولايلى جەر قاراستىرامىز»، – دەدى ب.ساعىنتاەۆ.
ونىڭ ايتۋىنشا، تۇرعىندارمەن كەزدەسۋدە بۇل جەرگە 120 ورىندى بالاباقشا، سپورت جانە ۆوركاۋت الاڭدارىن سالۋ جونىندە ورتاق شەشىم قابىلداندى.
«اتا-انالار بالالارعا ارنالعان قوسىمشا وقىتۋ مەن دامىتۋ ورتالىقتارىن قۇرۋ قاجەتتىگىن ايتتى. بۇل رەتتە «شىڭعا ورلەۋ» الەۋمەتتىك كلۋبتارىنىڭ تاجىريبەسى نەگىزىندە تەگىن ۇيىرمەلەر مەن سپورت سەكتسيالارىن اشامىز»، – دەپ اتاپ ءوتتى الماتى اكىمى.
اۋەزوۆ اۋدانىنا جۇمىس ساپارى بارىسىندا قالا اكىمى ىقشاماۋداننىڭ قۇرىلىس سالۋعا تىيىم سالىنعان ايماقتارداعى بوس جەرلەرىن دە قاراپ شىقتى. مۇندا جايلى جاسىل قوعامدىق ورىنداردى قۇرۋ جوسپارلانۋدا.
فوتو: اكىمدىكتىڭ ءباسپاسوز قىزمەتىنەن الىندى ايتا كەتۋ كەرەك، قالا حالقى ءقازىر وتە بەلسەندى. قوعامدا بولىپ جاتقان ءاربىر جاعدايعا ءۇن قوسىپ، پىكىرلەرىن ءبىلدىرىپ وتىرادى. بۇعان دەيىن قالانىڭ ورتالىق مادەنيەت جانە دەمالىس ساياباعى ماڭىندا اباي اتىنداعى قازاق ۇلتتىق پەداگوگيكالىق ۋنيۆەرسيتەتى جاتاقحانا تۇرعىزاتىنى جايلى باستاماعا دا ءوز نارازالىقتارىن بىلدىرگەن بولاتىن.
ءتۇرى: ايقىن گازەتى ماقالالارى
جولدانعان ۋاقىتى: 18:25 - 2021/02/23
