قازاق جەرىنەن شىققان بىرەگەي عالىم حۋسامۋددين اس-سىعناقيدىڭ ء«تاسديد» ەڭبەگىنىڭ تۇساۋى كەسىلىپ، قالىڭ وقىرمانعا جول تارتتى.

نۇر-مۇباراك ۋنيۆەرسيتەتى جانىنداعى ءابۋ حانيفا عىلىمي-زەرتتەۋ ورتالىعى بۇل ەڭبەكتى بەكەر تاڭداماعان. سەبەبى ماتۋريدي سەنىم مەكتەبىنىڭ بەلدى وكىلى ءابۋ مۋعين ءناسافيدىڭ ء«تامھيد» كىتابىنا جازىلعان تۇسىندىرمەنىڭ قازاقشا اۋدارماسى 570 بەتتەن تۇرادى. ياعني سەنىم، يمان ماسەلەسىندە تالاس-تارتىسقا بەيىم قاۋىمعا ورتا عاسىردىڭ وزىندە ناقتى عىلىمي جاۋاپ بۇگىن دە ماڭىزدى ءارى وزەكتى كۇيىندە. كولەمدى جۇمىس يسلامتانۋ، ءدىنتانۋ باعىتىنداعى ماگيسترانت، دوكتورانتتارعا جانە جالپى اقيدا ماسەلەلەرىن تەرەڭ ۇيرەنەم دەۋشى وقىرمان قاۋىمعا ارنالعان.

كىتاپتىڭ تۇساۋكەسەرىنە قمدب ءتوراعاسى، باس ءمۇفتي ناۋرىزباي قاجى تاعانۇلى ونلاين قاتىسىپ، ارنايى قۇتتىقتادى. قازاق دالاسىنان شىققان عۇلاما بابالاردىڭ ەڭبەگى قانشا ۋاقىت وتسە دە يسلام الەمىندە ماڭىزدىلىعى ارتىپ، بۇگىنگى ۇرپاققا ەرەكشە امانات جۇكتەلگەنىنە دە توقتالىپ، عالىمدارعا العىسىن ءبىلدىردى.

پروفەسسور، ۇعا اكادەميگى ءابساتتار قاجى دەربىسالى: «حۋسامۋددين اس-سىعناقي جايلى عىلىمي زەرتتەۋلەرگە دەن قويعان نۇر-مۇباراك ۋنيۆەرسيتەتىنىڭ عالىمدارى، پروفەسسور ءشامشادين كەرىم، ال ءقازىر جاس تا بولسا باس بولىپ جۇرگەن پرورەكتور قايرات قۇرمانباەۆ PhD دوكتورلىعىن دا وسى بابامىزدىڭ ەڭبەگىنەن قورعادى. كىتاپ جازۋ قانشالىقتى قيىن، ال ونى جارىققا شىعارۋدىڭ جاۋاپكەرشىلىگى ودان دا اۋىر ەكەنى تۇسىنىكتى. سوندىقتان بۇل – ۇلكەن جۇمىس»، – دەپ جوعارى باعا بەردى.

تاسديدتىڭ قولجازبا نۇسقاسىن تۇرىك زەرتتەۋشى عالىمدارى وڭدەپ، ارابشا ماتىندەرىن بەرگەنىمەن، ءوز تىلىنە اۋدارماعان. «بۇل كىتاپ قازاق تىلىندە ەڭ العاش بولىپ باسىلىپ، جاريالانىپ وتىر» دەيدى جاس زەرتەتۋشى سىرىم شاكيزادا.

حۋسامۋددين اس-سىعناقي ءحىى-حىV عاسىرلاردا ءومىر سۇرگەن يسلام الەمىنىڭ بىرەگەي عالىمى. ۋسۋل فيقھ ىلىمىنە قاتىستى ءبازداۋيدىڭ جانە احسيكاسيدىڭ ەڭبەگىنە جازعان «ۋافي»، «كافي» تۇسىندىرمەسى (شارحى)، مارعينانيدىڭ ھيداياسىنا جازعان 6 تومدىق «نيھايا» كىتابى، اراب تىلىنە بايلانىستى زاماحشاريدىڭ مۋفاسسالىنا «مۋاسسال» دەپ شارح (تۇسىندىرمە) جازعانىن بىلە بەرمەيمىز.

وسى ورايدا اس-سىعناقيدىڭ سىر وڭىرىندەگى ۇرپاقتارى قولداپ، كىتاپپەن عانا شەكتەلمەي بابا اماناتىن جارىققا شىعارعان نۇر-مۇباراك ۋنيۆەرسيتەتىنە ريزالىقتارىن جاۋدىرىپ، جاڭا اۋديتوريانى دا تولىق جاساقتاپ بەردى. ياعني تاريحي كىتاپپەن بىرگە حۋسامۋددين اس-سىعناقي اتىنداعى جاڭا اۋديتوريانىڭ دا تۇساۋى كەسىلدى.

ورتاعاسىرلىق قازاق دالاسىنىڭ اكادەميگىنىڭ ءومىربايانى، ءبىلىم جولى ورنەكتەلگەن جاپ-جارىق اۋديتوريا تاريح پەن بۇگىنگى كۇندى ۇندەستىرىپ تۇرعانداي سوڭعى ۇلگىدەگى تەحنولوگيالىق جابدىقتارمەن جاساقتالىپ، شاكىرتتەر ەندى تاريحي ورتانى سەزىنە وتىرىپ، SMART تاقتا ارقىلى كەز-كەلگەن مۇمكىندىكتەردى قولدانا الادى.

20 جىلدىق مەرەيتويعا ارنالعان بۇل تارتۋ نۇر-مۇباراك ۋنيۆەرسيتەتىنە عانا ەمەس، جالپى عىلىم، بىلىمسۇيەر قاۋىم، قازاق ەلىنە ەرەكشە سىي بولدى.

دەرەككوز: قمدب ءباسپاسوز قىزمەتى