بۇگىن قازاقستان مۇسىلماندارى ءدىني باسقارماسى ماڭعىستاۋ وبلىسى مۇنايلى اۋدانى ماڭعىستاۋ اۋىلىندا سالىنعان سپورت كەشەنىن ءوڭىر تۇرعىندارىنىڭ يگىلىگىنە بەردى.
سپورت كەشەنىنىڭ اشىلۋ سالتاناتىنا باس ءمۇفتي ناۋرىزباي قاجى تاعانۇلى، ماڭعىستاۋ وبلىسىنىڭ اكىمى سەرىكباي وتەلگەنۇلى قاتىستى.
يگى ءىس-شارادا ءسوز العان باس ءمۇفتي ناۋرىزباي قاجى تاعانۇلى: «وزدەرىڭىز جاقسى بىلەسىزدەر، ءبىز وتكەن جىلى 30 جىلدىق مەرەيتويىمىزدىڭ اياسىندا شالعاي اۋىلدارعا قۇدىق، كوپىر، ەمحانا، جول سالۋعا ۇلەس قوستىق. وسىناۋ ىزگى ءىسىمىزدىڭ جالعاسى رەتىندە بۇگىن سپورت كەشەنىن حالىق يگىلىگىنە بەرىپ وتىرمىز. مەشىت، مەدرەسە سالۋدىڭ ساۋابى قانداي ۇلكەن بولسا، ەل يگىلىگى ءۇشىن بەرىلگەن كوپىر، جول، ەمحانا قۇدىق، سپورت كەشەنى سىندى عيماراتتاردى تۇرعىزۋ سونداي قايىرلى ءىستىڭ ءبىرى. وسى ىسكە ۇلەس قوسقان بارشا ازاماتتارعا اللا رازى بولسىن دەيمىن. ءبىز مەملەكەتتىڭ بۇقارالىق سپورتتى دامىتۋعا ارنالعان باستامالارىنا ۇلەس قوسۋدى جالعاستىرا بەرەمىز. ويتكەنى جاستاردىڭ جانى مەن ءتان ساۋلىعى - ماڭىزدى ماسەلە. وعان ۇلەس قوسۋ – بارشاعا ورتاق ءىس. عالىمدارىمىز: «اتقا ءمىنۋ، ساداق اتۋ، كۇرەس پەن جۇگىرۋ – سوزىلمالى اۋرۋلاردىڭ بىردەن-بىر داۋاسى» دەگەن. دەنە شىنىقتىرۋ ادام بالاسىنىڭ ءتانىن عانا دامىتىپ قويماي، رۋحاني جاقتان دا تاربيەلەيدى. ءوز ءناپسىسىن جەڭۋگە، ءوز دەنەسىن وزىنە باعىندىرۋعا جاردەمدەسەدى. ويتكەنى، ول – قۋات. دەنە قۋاتى، وي ۇشقىرلىعى، يمان قۋاتى – ەر جىگىتتىڭ كوركەمدىگى» دەدى.
سپورت كەشەنىنىڭ اشىلۋ راسىمىندە ماڭعىستاۋ وبلىسىنىڭ اكىمى سەرىكباي وتەلگەنۇلى: «قۇرمەتتى باس ءمۇفتي! سىزبەن وسىنداي يگى ءىس-شارانىڭ كۋاسى بولعانىما قۋانىشتىمىن. ءوزىڭىز باستاعان يمامدار قايىرىمدىلىق جۇمىستارعا بەلسەندى تۇردە اتسالىسۋدا. سىزگە جانە بارشا ءدىن قىزمەتكەرلەرىنە شىنايى العىسىمدى بىلدىرەمىن. وسى كەشەننەن مىقتى سپورتشىلار شىعۋىنا تىلەكتەسپىن» دەدى.
ايتا كەتسەك، سپورت كەشەنىنىڭ جالپى اۋماعى – 1300 شارشى مەتر. عيمارات حالىقارالىق تالاپتارعا سايكەس سالىنعان.
دەرەككوز: قمدب ءباسپاسوز قىزمەتى
ءتۇرى: Muslim.kz ماقالالارى
جولدانعان ۋاقىتى: 16:00 - 2021/02/19
