بۇگىن قازاقستان مۇسىلماندارى ءدىني باسقارماسىنىڭ ءتوراعاسى ناۋرىزباي قاجى تاعانۇلى رەسمي ساپارمەن ماڭعىستاۋ وبلىسىنا باردى.

جۇمىس ساپارىنىڭ جوسپارىنا سايكەس باس ءمۇفتي ناۋرىزباي قاجى تاعانۇلى وبلىس اكىمى سەرىكباي ترۇموۆپەن كەزدەسىپ، وڭىردەگى ءدىني احۋالدى تالقىلادى. كەزدەسۋگە قمدب اپپارات باسشىسى عىلىمبەك جادىگەرۇلى، وبلىس باس يمامى ءانۋار ءىزىمبايۇلى قاتىستى.

كەزدەسۋدە وبلىس اكىمى سەرىك ترۇموۆ: «قۇرمەتتى باس ءمۇفتي! كيەلى ءوڭىر ماڭعىستاۋعا قوش كەلدىڭىز. قادامىڭىز قۇتتى، ساپارىڭىز وڭ بولسىن! وتكەن جىلى وزىڭىزبەن ەرجان حازىرەت مەشىتىنىڭ ىرگەتاسىن قالادىق. ءقازىر مەشىت قۇرىلىسى قارقىندى ءجۇرىپ جاتىر. ءبىز ءارقاشان يگى باستامالارىڭىزدى قولدايمىز. ءدىن كادرلارىنىڭ الەۋمەتتىك جاعدايىنا ءبىز دە كوڭىل ءبولىپ وتىرمىز. بۇل باعىتتا ۇيىمداستىرۋ-ۇيلەستىرۋ جۇمىستارىن جالعاستىرا بەرەمىز» دەدى.

باس ءمۇفتي ناۋرىزباي قاجى تاعانۇلى سەرىك وتەلگەنۇلىنا العىسىن ءبىلدىرىپ: ء«بىز جىل باسىندا جەتى جۇمىس باعىتىمىزدى باعدارلاپ الدىق. سونىڭ ءبىرى – رۋحاني تاربيە يحسان ءىلىمى. وسكەلەڭ ۇرپاقتىڭ تاربيەسىن تۇزەپ، بولاشاعىنا باعدار سىلتەۋ – بارشاعا ورتاق ءىس. ءبىز جاستاردىڭ رۋحاني تاربيەسىنە ۇلەس قوسۋ ماقساتىندا يحسان ءىلىمى، كەمەل ادام تۋرالى كىتابىمىزدى ازىرلەپ جاتىرمىز. اللاعا شۇكىر، وتكەن جىلى مەملەكەت قامقورلىعىمەن ءدىني باسقارمانىڭ وقۋ ورىندارىنا 1319 ءبىلىم گرانتى ءبولىندى. بۇل – ءداستۇرلى ءدىني وقۋ-اعارتۋ سالاسى ءۇشىن ۇلكەن قولداۋ. ءسىز دە ءبىزدىڭ يمامدارعا ءارقاشان جاناشىرلىق تانىتىپ وتىراسىز. اللا رازى بولسىن. ەندىگى ماقسات – جاستارعا دۇرىس ءدىني ماعلۇمات بەرۋ. ءبىز مۇنى ءارقاشان نازاردا ۇستايمىز» دەدى.

باسقوسۋدا تاراپتار ايماقتاعى ءدىني احۋالدى ءسوز ەتىپ، دەسترۋكتيۆتى اعىمنىڭ ارباۋىنا ىلىككەن ازاماتتارعا تۇسىندىرمە جۇمىستارىن كۇشەيتۋدىڭ ماڭىزدىلىعىنا نازار اۋداردى. باس ءمۇفتي كەزدەسۋدە وتكەن جىلى ماڭعىستاۋ وبلىسىندا باسپاناعا اسا مۇقتاج 9 وتباسىعا پاتەر كىلتى جانە ءوڭىر تۇرعىندارىنىڭ يگىلىگى ءۇشىن 12 قۇدىق پايدالانۋعا بەرىلگەنىن، ءبىر جىل ىشىندە 20 مىڭعا جۋىق جانۇياعا كومەك كورسەتىلگەنىن اتاپ ءوتتى.

ايتا كەتسەك، بۇگىندە ماڭعىستاۋ وبلىسى بويىنشا 33 مەشىت بار. قۇلشىلىق ۇيلەرىندە 120 يمام-ۇستاز قىزمەت ەتەدى. ايماقتا 5 مەشىتتىڭ قۇرىلىسى ءجۇرىپ جاتىر. جوسپار بويىنشا وسى جىلى 3 مەشىتتىڭ قۇرىلىسى اياقتالادى.

دەرەككوز: قمدب ءباسپاسوز قىزمەتى