«ايەلىمنىڭ ەكى بالاممەن قوسا ماعان دا بالاسىنداي قاراۋىنا اشۋلانامىن».بۇل ءبىر وتاعاسىنىڭ ءسوزى. ول ايەلىنىڭ ۋاقىت وتە كەلە وزىنە وسىلاي قارايتىنىنا ىزالانادى. ءبىرشاما ۋاقىتتان كەيىن ايەلى جاعدايدى تىپتەن ۋشىقتىرىپ «نەگە بۇنى الدىڭ؟ ول دوسىڭمەن نەگە كەزدەستىڭ؟ شۇلىعىڭدى انا جەرگە تاستاماۋىڭ كەرەك ەدى» دەگەن سەكىلدى سوزدەر ايتا باستاعان. ءارى وتباسىلارىندا كيكىلجىڭدەر تۋىنداعان. انالىق – ارينە تابيعي سەزىم. الايدا ايەلدەر بالاعا قارايتىن بۇل سەزىممەن كۇيەۋلەرىنە دە قاراعاندا تۇسىنىسپەۋشىلىك تۋىندايدى. جاناشىرلىق پەن مەيىرىم، قورعاپ ءجۇرۋ سەكىلدى سەزىمدەرىن ۋاقىت وتە كەلە جۇبايىنا كورسەتكەندە، كۇيەۋى وعان كەرى رەاكتسيا تانىتادى. ءتىپتى ءبىرشاما ۋاقىتتان كەيىن بۇنداي ىس-ارەكەتتەر شاڭىراقتى شايقايتىنداي جاعدايعا كەلەدى.

بۇنىڭ سەبەبى ادامنىڭ بالالىق كەزىمەن بايلانىستى. ۇيلەنگەندە انالىق ءرولى اۋىر باساتىن ايەلدىڭ، ءسىرا، تىم بايەك اناسى بولعان دەپ توپشىلايدى پسيحولوگتار. انا تىم ۋايىمشىل بولىپ، ءجيى باقىلاۋ جاسايتىن بولسا، بالانىڭ وزىنەن الىستاۋىنا مۇمكىندىك بەرمەيدى. وسىلاي اناسىنان نەمەسە اكەسىنەن ايرىلماعان، سولاردىڭ قاسيەتىن بويىنا سىڭىرگەن بالالار ۇيلەنگەن ۋاقىتتا جۇبايلارىن بالالارىمەن «شاتاستىرادى». ياعني بالالارعا كورسەتەتىن قورعاشتاۋىن ەرلەرىنە دە كورسەتە باستايدى. وسىدان كەلىپ، ۇيلەنگەندە قيىندىقتارعا كەزىگەدى. ەرلى-زايىپتىلاردىڭ بىرىندە كۇيزەلىس نە اشۋىن ۇستاي الماۋ جاعدايى بايقالۋى مۇمكىن. پسيحولوگتار بۇنداي جاعدايدا تەراپيانى ۇسىنادى.

كەيدە ايەلىنە كۇيەۋى بالاعا قاراعانداي قارايتىن وقيعالار دا كەزدەسەدى. بۇل ماسەلە كوبىنە بالالارعا كەرى اسەرىن تيگىزەدى. پسيحولوگتاردىڭ ايتۋىنشا، ايەل كۇيەۋىنە بالا سەكىلدى قارايتىن وتباسىلاردا ۇيدەگى ۇل اكەسىنە جاقىنداماي، ونى وسال دەپ قابىلدايدى. نەمەسە كەرى جاعدايدا قىز بالا اناسىنا ۇقساس جاعدايلاردى ويلايدى. كۇشتى بولۋ ءۇشىن اكەسىندەي بولۋدى تاڭدايدى. ەركەكشورا بولىپ وسەدى.

وزىنە بالا سياقتى قارالعان ەركەك الداۋعا بەيىم تۇرادى

اسىلى قاي سەزىم دە اسىرە كەتسە، زياندى. سوندىقتان انالىق سەزىمنىڭ شەگى دە انىقتالۋى كەرەك. نەگە دەسەڭىز، وتباسى كەڭەسشىسىلەرى سوڭعى جىلدارى ەلىمىزدە ارتىپ بارا جاتقان اجىراسۋلاردىڭ دا بۇعان قاتىسى بار دەگەن پىكىردە. ايتۋلارىنشا، وزىنە بالا سەكىلدى قارالاتىن كەي ەركەكتەر الداۋعا بەيىم تۇرادى. ەر كىسىنىڭ اناسى دا بالاعا قىسىم جۇرگىزەتىن بولسا، ءارى ەنەسى دە سونداي بولسا، بۇل ونىڭ ايەلىنەن دە الىستاي تۇسۋىنە سەبەپ. جۇبايىن اناسىمەن بىردەي كورگەندىكتەن، جاساعان قاتەلەر مەن الداعاندىعىن جۇبايىمەن ەركىن تۇردە بولىسە الادى. ويتكەنى انالار كەشىرەدى. قانشالىقتى سوتقارلىق جاسالسا دا، انا رولىندەگى ايەلىنىڭ دە ءوزىن كەشىرەتىندىگىن ويلايدى. ايەل كۇيەۋىنە بالا سەكىلدى قاراعان سايىن كۇيەۋىنىڭ دە وڭدى-سولدى جۇرىستەرى ازايمايدى. پسيحولوگتار بۇل جاعدايعا مىنانداي مىسال بەرەدى: «ماعان كەلگەندەردىڭ اراسىندا ايەلىن الداپ جۇرگەن ءبىر ەر كىسى دە بولدى. اكەسى دە شەشەسىن الدايتىنىن، ءبىراق شەشەسى ونى كەشىرەتىندىگىن ايتتى».

نە ىستەۋ كەرەك؟

ايەلى ءوزىن بالاسىنعان جاعدايدا ەر كىسى ايەلىنە ەسكەرتۋ جاساۋى كەرەك. ماڭىزدىسى، ايەل دە، ەر كىسى دە ءوزىنىڭ تۇلعالىق ەرەكشەلىگىن ساقتاعانى ءجون. بالالاردىڭ اناسى ەرىنە ايەل ەكەنىن ءبىلۋى كەرەك. ەرلى-زايىپتىلار بىر-بىرىنە ەسكەرتۋ جاساپ، قاتە ءىس- ارەكەتتەرىن تۇزەتۋى ماقۇل. بىر-بىرىنە كومەك بەرىپ، اناعۇرلىم جاقسى وتباسىن قۇرۋعا تالپىنۋى كەرەك.

جۇبايى وزىنەن باسقا تۇلعا ەكەنىن، ونىڭ باسقاشا ويلاۋى مۇمكىن ەكەنىن، وزگەشە شەشىم قابىلداۋى مۇمكىن ەكەنىن ءبىلۋى ءتيىس. ءارى بۇعان قۇقىلى ەكەنىن بىلسە، جۇبايىن باقىلاپ وتىرۋ ۋاقىت وتكەن سايىن ازايارى ءسوزسىز.

جۇبايلار ءبىر-بىرىن وزىنە ۇقساتۋعا تالپىنباي، ونى ءوز ەرەكشەلىگىمەن قابىلداۋعا تىرىسۋى كەرەك.

دەرەككوز: muslim.kz