قىزىلوردا وبلىسىنىڭ جاڭاقورعان اۋدانى اۋماعىندا ورىن تەپكەن سىعاناق قالاشىعىندا بيىل ارحەولوگيالىق زەرتتەۋ بارىسىندا عالىمدار ءبىرقاتار جاڭا دەرەكتى انىقتادى.
ارحەولوگيالىق زەرتتەۋ شاراسى تۇڭعىش پرەزيدەنت - ەلباسى نۇرسۇلتان نازارباەۆتىڭ «بولاشاققا باعدار: رۋحاني جاڭعىرۋ» جانە «ۇلى دالانىڭ جەتى قىرى» ماقالالارى اياسىندا جۇرگىزىلدى. وسى ورايدا، قىزىلوردا وبلىسىنىڭ مادەنيەت، ارحيۆتەر جانە قۇجاتتاما باسقارماسى بيىلعى جىلعى 16-قاڭتاردا قوجا احمەت ياساۋي اتىنداعى حالىقارالىق قازاق-تۇرىك ۋنيۆەرسيتەتىمەن مەموراندۋم جاسادى. ونىڭ اياسىندا سىعاناق قالاشىعىندا زەرتتەۋ، ساقتاۋ جانە پايدالانۋ باعىتىندا ماۋسىم ايىندا ارحەولوگيالىق زەرتتەۋ شارالارى جۇزەگە استى.
قازبا جۇمىستارى قوجا احمەت ياساۋي اتىنداعى حالىقارالىق قازاق-تۇرىك ۋنيۆەرسيتەتى ارحەولوگيا عىلىمي-زەرتتەۋ ينستيتۋتىنىڭ باس عىلىمي قىزمەتكەرى، تاريح عىلىمدارىنىڭ دوكتورى، پروفەسسور سايدەن جولداسباەۆتىڭ جەتەكشىلىگىمەن جۇرگىزىلدى. ەكسپەديتسياعا ارحەولوگيا عىلىمي-زەرتتەۋ ينستيتۋتىنىڭ قىزمەتكەرلەرى، تاريح كافەدراسىنىڭ ستۋدەنتتەرى جانە قىزىلوردا وبلىستىق مادەنيەت، مۇراعات جانە قۇجاتتاما باسقارماسىنا قاراستى «وبلىستىق تاريحي جانە مادەني ەسكەرتكىشتەردى قورعاۋ» مەكەمەسىنىڭ ماماندارى قاتىستى.
«سىعاناق قالاسى - سىردىڭ ورتا اعىسىنداعى استانالىق مارتەبەگە يە ورتاعاسىرلىق قالا ەكەندىگى بەلگىلى. سوندىقتان قالا اۋماعىندا ءار كەزەڭنىڭ بي-سۇلتاندارى مەن حاندارى جەرلەنگەن ءىرى كەسەنەلەر ورنى كوپتەپ كەزدەسەدى. بيىل مەموراندۋم بويىنشا جاسالعان ارحەولوگيالىق قازبا جۇمىستارىنىڭ ناتيجەسىندە قالاشىقتىڭ باتىس بولىگىندە ورنالاسقان توبەنىڭ كەسەنە ەكەندىگى انىقتالىپ وتىر. قازبا بارىسىندا تابىلعان سىرلى قىش قاپتامالارعا، كەراميكالىق ىدىستارعا جانە قىشتاردىڭ پىشىندەرىنە قاراپ، بۇل قۇرىلىس XIII-XIV عاسىرلارعا جاتاتىندىعى تۋرالى الدىن الا بولجاۋعا بولادى»، - دەدى ەكسپەديتسيا جەتەكشىسى سايدەن جولداسباەۆ.
الداعى ۋاقىتتا كونە قالاشىقتا تولىققاندى قازبا جۇمىستارىن جالعاستىرۋ جوسپارلانىپ وتىر. بۇل يگىلىكتى ىستەردىڭ ورتاعاسىرلىق سىعاناق قالاسىن مۇراجايعا اينالدىرۋ باعىتىندا قوساتىن ۇلەسى وتە جوعارى بولادى. ايتا كەتەيىك، سىعاناق قالاسىنUNESCO دۇنيەجۇزىلىك مۇرالار تىزىمىنە ەنگىزۋ جوسپارلانىپ وتىر.
دەرەككوز: قازاقپارات
ءتۇرى: Muslim.kz ماقالالارى
جولدانعان ۋاقىتى: 13:00 - 2019/07/05
