قۇداي اسىق ويناعانداي ەكەن، دەپتى ەينشتەين. بىردە ءدال تيگىزەسىڭ، ءبىراق، ساقانىڭ شەڭبەردەن شەرتىپ شىعارۋعا كۇشى جەتپەي قالادى. قايتا اينالىپ، ەكىنشى مارتە اتقاندا، قاتتى ەكپىن العان ساقا تىزىلگەن اسىقتاردىڭ جانىنان، ەشقايسىسىن سوقپاي، زۋىلداپ وتە شىعادى.

جىلدامدىعى باردا ورنى جوق، ورنىن تاپقاندا، جىلدامدىعىن جوعالتىپ الاسىڭ. سەبەبى، كەز كەلگەن ۇساق بولشەك ۇنەمى قوزعالىس ۇستىندە، شايقالىپ تۇرعاندا، ورنىن اۋىستىرا بەرەدى، سوندىقتان، كەلە جاتقان جىلدامدىقتا ورىن بولمايدى، ال ورىندا – جىلدامدىق جوق.

ەكى قاسيەتىن قاتار ولشەي المايسىڭ. ءبىرىن ولشەگەندە، ءبىرى بەيمالىم.

بۇل، ۇساق بولشەكتەردىڭ كەڭىستىكتە، قابىرعا ىرگەسىنە جاعىلعان بوياۋداي كەسكىندەلەتىنىن بىلدىرەدى. دەمەك، ءبىر ۋاقىتتا بىرنەشە ورىندا ءومىر سۇرەدى. تاعدىرى – ءجۇرىپ كەلە جاتقان جىلدامدىقتى قاي ورىندا توقتاتىپ، قانداي مەجەنى تاڭداپ الاتىنىڭا بايلانىستى.
ەكزيستەنتسياليستەر دە ەينشتەيندەي ويلايدى. ءومىر بىتپەي، تاعدىرعا باعا بەرە المايسىڭ. ويتكەنى ادام وزگەرۋى مۇمكىن. پەندە بالاسى ءومىر ءسۇرىپ “ماندەنەدى”. ولگەندە، “ماندەنۋ” پروتسەسى توقتايدى.

قاي جەردە توقتايدى، سول جەردەن ءمان شىعادى. ياعني، ء“ومىر ءسۇرۋ” ء(بىرىنشى) “ماننەن” (ەكىنشى) بۇرىن ءومىر سۇرەدى.
اڭگىمەنىڭ ۇزىن-ىرعاسى وسى.
كۇردەلى تاقىرىپ.

دوسحان جىلقىباي. كۆانت (اڭگىمە)

2.
سيۋجەتى – ءبىر ءىزدى سۋرەت ەمەس. شەگىنىس جاساپ وتىرادى. ۋاقىت بولشەكتەنەدى. تولقىن تۇرىندە تارايتىن ۇزىك-ۇزىك كۆانتتار ءتارىزدى. ءبىراق، ماتىندەگى بولىك-بولىك، تەڭ-تەڭ جايتتار ويدا، وقىرمان باسىندا، كۆانتتىق مەحانيكا تەورياسى بويىنشا، بىر-بىرىمەن وڭاي قابىسىپ جاتادى.

نەگىزىنەن، ءبىر كۇندىك ۋاقيعا كىندىگىنە بايلانعان ءبىرشاما ەپيزودتار. ەمتيحان تاپسىراتىن كەز، تاپسىرعان شاق، تاپسىرعان سوڭ وربىگەن، قالىپتاسقان جاعداي.

قوعامنىڭ كەلەڭسىز تۇستارى بەيتاراپ جازىلعان، اۆتور باعا بەرۋدەن قاشادى، باستى قاھارماندارىن تانىستىرۋدان، بەت-الپەتىن سۋرەتتەۋدەن، جاعىمدى-جاعىمسىز كەيىپكەر جاساۋدان بوي تارتادى. كەيىپكەر ءۇشىن كۇرەسپەيدى. ءبارى جەڭىل، وڭاي كەيىپتەلگەن. باسىمدىلىقتارىن كورسەتپەيدى، نەگە كوڭىل اۋدارۋ كەرەكتىگىن ايتپايدى. وقىرماندى ءبىلىمسىز كورمەيدى، ساۋاتسىز سانامايدى. تەڭ دارەجەدە سۇقبات قۇرادى.

اڭگىمەدە پافوس جوق. كادىمگى ستۋدەنت جاستار عۇمىرى. سىلدىراپ، كۇلدىرىپ، رەنجىپ، وكىنىپ-وپىنىپ ءوتىپ جاتقان ءومىر. كوپ ۋاقيعانىڭ ءبىرى. قاراعاندىدا دا، شىمكەنتتە دە، ورالدا دا ءوتۋى مۇمكىن.

ديدار امانتاي، جازۋشى: "كەز كەلگەن ونەردىڭ مۇراتى – اتموسفەرا"

3.
جازۋ تاسىلىندە قالام ەركىندىگى بار. تىگىنەن وقىلاتىن شىعارما ەمەس. كولدەنەڭ كىرىگەتىن تۇستارى كوپ.

تىلى توگىلىپ تۇر. جازعاندا قينالمايتىنى بايقالادى. ساۋاتتى قالامگەر. جالعان ديالوگتاردان ادا. سەزىم، اسەر پافوسى كورىنبەيدى. ورنىمەن، ولشەممەن. ۇستامدى قالام يەسى.

اقىلگويلىگى جوق.

مەن اڭگىمەنى ۇناتتىم. ستۋدەنتتىڭ تىنىس-تىرشىلىگى قىپ-قىسقا ۋاقيعادان كورىنەدى. اۆتور اتموسفەراسىن جاساي بىلگەن. شىن مانىسىندەگى، تالانتتى قالام يەسىمەن تانىستىم دەپ ويلايمىن. كوپ نارسە ەمەۋرىنمەن بىلدىرىلە سالادى.
تۋىندى وقىرماندى وقۋعا شاقىرعان كۆانتتىق مازمۇنعا، وزىنە تارتقان گراۆيتاتسيالىق ساعىنىشقا تۇنعان.

اق جول، دوسقان!

قارقارالى – كوكتاس
08.06.2019