وتكەن جىلدىڭ جەلتوقسان ايىندا كاسىپكەرلەر پالاتاسىنا ايماقتاعى ءبىرقاتار فارماتسەۆتيكا سالاسىنداعى كاسىپكەرلەردەن كورسەتكەن قىزمەتى ءۇشىن قاراجاتىن تولىق الا الماي جۇرگەندىگى جونىندە، اتالمىش ماسەلەگە قاتىستى قۇقىقتىق قولداۋ كورسەتۋدى سۇراعان وتىنىشتەر ءتۇستى.
ماسەلە مىنادا. قازالى اۋدانارالىق اۋرۋحاناسى فارماتسەۆتيكا سالاسىنداعى 5 كاسىپكەرگە 110 ملن تەڭگەدەن استام قارجى قارىز بولىپ شىقتى. بۇل قارىز كەشە-بۇگىن قالىپتاسقان بەرەشەك ەمەس، الدى 2017 جىلدان باستاپ جيناقتالىپ قالعان ەكەن. كاسىپكەرلەر قازالىداعى اۋرۋحاناعا دارى-دارمەكتەر، مەديتسينالىق بۇيىمدار جەتكىزىپ بەرۋ قىزمەتتەرىن كورسەتىپ كەلگەن.
كاسىپكەرلەر پالاتاسى زاڭگەرلەرى اتالمىش ماسەلەنى جان-جاقتى زەرتتەي كەلە وبلىس پروكۋرورى نۇرلان بيجانوۆپەن كەزدەسۋ ۇيىمداستىرىپ، بيزنەس وكىلدەرىنىڭ ماسەلەسىن وسى وتىرىستا كوتەرەدى.
«بيزنەس وكىلدەرىن جاقسى تۇسىنۋگە بولادى. دارى-دارمەك، مەديتسينالىق بۇيىمدارعا بيۋدجەتتەن ارنايى قارجى ءبولىنىپ وتىر. الايدا اتالمىش قارجىنىڭ نىسانالى ماقساتىنا جەتپەۋى كاسىپكەرلەرگە قيىندىق تۋدىرۋدا. ولار دا كورسەتەتىن قىزمەتتەرىنە قاجەتتى قۇرال-جابدىقتار مەن دارىلەردى الدىرتادى. ول ءۇشىن قارجىسىن تولىق تولەيدى. ال اۋرۋحانا تاراپىنان قارجىنىڭ ۋاقىتىلى تولەنبەۋى فارماتسەۆتيكا سالاسىنداعى كومپانيالاردىڭ تۇراقتى جۇمىس ورنىن ساقتاپ قالۋدا، ەڭبەكاقىلاردى ۋاقىتىلى تولەۋدە سالماق سالۋدا. وسى جەردە وبلىس پروكۋرورى نۇرلان بيجانوۆقا ارنايى العىسىمىزدى بىلدىرگىمىز كەلەدى. كاسىپكەرلەرمەن كەزدەسۋدەن كەيىن ماسەلەنى ءوز باقىلاۋىنا الىپ، شەشىلۋىنە سەپتىگى تيۋدە»، - دەيدى بيزنەس-ومبۋدسمەن اپپاراتىنىڭ وبلىس بويىنشا سەكتور مەڭگەرۋشىسى سالاۆات قۇلماحان.
كاسىپكەرلەر پالاتاسى مەن وبلىستىق پروكۋراتۋرانىڭ ارالاسۋىمەن بۇگىندە كاسىپكەرلەرگە 29 ملن 491 مىڭ تەڭگە تولەندى. ال قالعان 80 ملن 708 مىڭ تەڭگە قارىزدى اۋرۋحانا باسشىلىعى جىل سوڭىنا دەيىن تولەپ بەرەتىندىگىن جەتكىزدى.
وڭىر فارماتسەۆتەرىنىڭ ماسەلەسى كاسىپكەرلەر پالاتاسى ءۇشىن ءالى دە كۇن تارتىبىندە. پالاتا زاڭگەرلەرى سالا كاسىپكەرلەرىنە قۇقىقتىق سۇيەمەلدەۋ جۇمىستارىن جالعاستىرادى.
ءتۇرى: ەگەمەن قازاقستان ماقالالارى مەن جاڭالىقتارى
جولدانعان ۋاقىتى: 23:09 - 2021/02/23
