وتكەن تاۋلىكتە قازاقستاندا كوروناۆيرۋس ينفەكتسياسىن جۇقتىرعانى پتر تەستىمەن دالەلدەنگەن 2 122 ناۋقاس تىركەلدى. بۇل – ىندەت باستالعالى بەرگى ەڭ ۇلكەن كورسەتكىش.
ۆيرۋس جۇقتىرعانداردىڭ تاۋلىكتىك كورسەتكىشى بويىنشا استانا الدا كەلەدى. نۇر-سۇلتاندا Covid-پەن 647 ناۋقاس تىركەلدى. ەلدىڭ ەڭ ۇلكەن قالاسى – الماتىدا جۇما كۇنى 438 ادامعا كوروناۆيرۋس جۇققان.
ايماقتار اراسىندا الماتى وبلىسى ءبىرىنشى ورىندا تۇر، مۇندا دياگنوزى زەرتحاندا راستالعان 259 ادام تىركەلدى. ەڭ سوڭعى ورىندا – تۇركىستان وبلىسى، بۇل ايماقتا 16 ناۋقاس قوسىلعان.
دەنساۋلىق ساقتاۋ مينيسترلىگى بەيسەنبىدە پتر تەستى كەرى ناتيجە كورسەتسە دە، وزدەرى "كوروناۆيرۋسقا ۇقساس پنەۆمونيامەن" اۋىرعان 70 ناۋقاس تىركەلگەنىن حابارلادى. بىلتىر جازدا قازاقستاندا وكپەسى قابىنعاندار سانى كۇرت ارتقان تۇستا دۇنيەجۇزىلىك دەنساۋلىق ساقتاۋ ۇيىمى مۇنى كوروناۆيرۋس تارالۋىنىڭ سالدارى دەپ اتاپ، قىسىم جاساعان سوڭ عانا دەنساۋلىق ساقتاۋ مينيسترلىگى تامىزدان باستاپ مۇنداي ناۋقاستاردى بولەك ەسەپتەي باستاعان. دەگەنمەن، "پنەۆمونيا" قاتتى ورشىگەن ماۋسىم-شىلدەنىڭ دەرەگى ستاتيستيكاعا ەنبەدى.
مينيسترلىك "كوروناۆيرۋسقا ۇقساس پنەۆمونيامەن" اۋىرعاندار دەرەگىن ءبىر كۇن كەشىكتىرىپ شىعارادى، بۇل ەكى ستاتيستيكانى قوسىپ ەسەپتەۋدە قيىندىق تۋعىزادى.
ونىڭ ۇستىنە، مينيسترلىك Covid دياگنوزى زەرتحانادا راستالعاندار مەن "سوعان ۇقساس پنەۆمونياعا" شالدىققاندار دەرەگىن بولەك سانايدى. رەسمي دەرەك بويىنشا، بىلتىرعى ناۋرىزدان بەرى ەلدە كوروناۆيرۋس جۇقتىرعان 251 053 ادام تىركەلگەن، 3 085 كىسى وسى دەرتتەن كوز جۇمعان. تامىزدان بەرى 50 765 ادام "پنەۆمونياعا" شالدىعىپ، 696 ناۋقاس قايتىس بولدى.
قازاقستاننىڭ ەكى بولەك دەرەگىن قوسىپ ەسەپتەگەن امەريكالىق دجونس حوپكينس ۋنيۆەرسيتەتىنىڭ تۇجىرىمى بويىنشا، ەلدە 299 مىڭنان استام ادام Covid دەرتىنە شالدىققان. الەمدە 130 ميلليونداي ادام كوروناۆيرۋس جۇقتىرىپ، 3،8 ميلليونى وسى اۋرۋدان كوز جۇمدى.
ءتۇرى: سەركە اقپاراتتارى
جولدانعان ۋاقىتى: 20:50 - 2021/04/03
