قازاقستان دەنساۋلىق ساقتاۋ ءمينيسترى الەكسەي تسوي قىتايدىڭ Sinovac ەكپەسىنىڭ ەلگە جەتكىزىلگەنىن جوققا شىعاردى. 26 ناۋرىزدا قىتايدىڭ قازاقستانداعى ەلشىسى چجان سياو قازاقستاندىق باسىلىمدارعا بەرگەن سۇحباتىندا "ەلگە ءۇش ميلليون دوزا ەكپە جەتكىزىلدى" دەگەن ەدى.

• ونداي ەكپەنىڭ ەلگە جەتكىزىلگەنى جايلى اقپارات جوق. بىزگە ەشكىم قايىرىلعان جوق. ەگەر ەكپە جەتكىزۋ تۋرالى قايىرىلسا ءبىز قاراستىرامىز. قازاقستانعا كەلەتىن كەز كەلگەن ەكپە ەلدە تىركەۋدەن ءوتىپ، قاۋىپسىزدىك بويىنشا تەكسەرۋ پروتسەدۋراسىنان ءوتۋى ءتيىس، - دەدى تسوي 30 ناۋرىزداعى بريفينگتە.

مينيستر قازاقستان قىتايدان ۆاكتسينا الۋ جونىندە كەلىسىمگە كەلمەگەنىن، ءقازىر "كەلىسسوز ءجۇرىپ جاتقانىن" ايتتى.

• ۆاكتسينا ساتىپ الۋ تۋرالى ۇسىنىس حاتىن [قىتايدىڭ] Sinovac ەكپەسىنە عانا ەمەس Pfizer، Johnson & Johnson، Moderna ەكپەلەرىن شىعارعاندارعا دا جىبەردىك. وكىنىشكە قاراي، بۇل كومپانيالاردىڭ قازاقستانعا قاي ۋاقىتتا قانشا دوزا ەكپە جىبەرە الاتىنى جايلى ناقتى اقپارات جوق، - دەدى مينيستر.

بۇعان دەيىن قىتاي ەلشىسى چجان سياو "دەلوۆوي كازاحستان" گازەتىنە، Kazakhstan Today جانە "ستراتەگيا 2050" سايتىنا بەرگەن سۇحباتىندا ء"قازىر قىتاي ددسۇ-نىڭ COVAX ەكپە ساياساتىنا قوسىلدى. جاقىندا قازاقستانعا قىتايدان ءۇش ميلليون فلاكون ەكپە جەتكىزىلدى" دەگەن.

قازاقستاندا حالىققا ەكپە سالۋ ناۋقانى 1 اقپاندا باستالعان. ءقازىر ەلدە رەسەيلىك "Cپۋتنيك V" ەكپەسى سالىنىپ جاتىر. ءبىراق بۇل ۆاكتسينا قازاقستاندا تەك 16 اقپاندا رەسمي تىركەۋدەن ءوتتى. ءقازىر بۇل ەكپەنى قاراعاندى فارماتسەۆتيكالىق كەشەنى دە شىعارىپ جاتىر.

ەكپە الدىمەن دارىگەرلەر، مۇعالىمدەر، پوليتسەيلەرگە ەگىلەدى. 30 ناۋرىزداعى بريفينگتە تسوي "ساۋىردە قالاعان ادام ەكپە سالدىرا الادى" دەدى.

دەنساۋلىق ساقتاۋ مينيسترلىگىنىڭ دەرەگىنشە، ءقازىر ەلدە 127 مىڭ ادام ەكپەنىڭ ءبىر دوزاسىن العان.

ساراپشىلار ەلدە ەكپە ناۋقانى باياۋ ءجۇرىپ جاتقانىن ايتادى. ءقازىر ەلدە كوروناۆيرۋس جۇقتىرعاندار سانى كۇرت ءوسىپ، ەل "قىزىل ايماققا" كىردى. ناۋرىزدىڭ ورتاسىنان بەرى ەلدە مىڭنان اسا ادام Covid اۋرۋىنا شالدىعىپ جاتىر. كەيىنگى بىرنەشە كۇندە ەلدە مىڭ جارىمنان اسا ادام وسى ىندەتكە شالدىققان.