جامبىل وبلىسى سارىسۋ اۋدانى جاڭاتاس قالاسىندا ورتتەن بەس بالا قازا تاپتى، - دەپ حابارلايدى جامبىل وبلىسى اكىمدىگى.
وقيعا 19 اقپاندا ساعات 15.15-تە 2 شاعىناۋداندا بولعان. 5 قاباتتى تۇرعىن ۇيدە 16 شارشى مەتر الاڭدا 3 قاباتتاعى پاتەردە ءورت شىققان.
پاتەردە 2015، 2016، 2017، 2019 جانە 2020 جىلدارى تۋعان بەس بالا بولعان، ولار ەرەسەكتەردىڭ قاراۋىنسىز قالعان.
"الدىن الا مالىمەت بويىنشا، وتباسىنىڭ وتاعاسى جۇمىستا بولعان، اناسى دۇكەنگە كەتكەن. ءورت سالدارىنان كامەلەتكە تولماعان بارلىق بالا ۋلى گازدان زارداپ شەگىپ، شۇعىل اۋرۋحاناعا جاتقىزىلدى، الايدا ءبىراز ۋاقىتتان كەيىن قايتىس بولدى. وقيعانىڭ سەبەبىن انىقتاۋ ءۇشىن جامبىل وبلىسى اكىمىنىڭ بۇيرىعىمەن وبلىس اكىمىنىڭ ورىنباسارى ۇلان جازىلبەك باستاعان ارنايى كوميسسيا قۇرىلىپ، وقيعا ورنىنا شىقتى. كوميسسيا قۇرامىنا پروكۋراتۋرا، پوليتسيا دەپارتامەنتى، توتەنشە جاعدايلار دەپارتامەنتى جانە باسقا دا مۇددەلى مەملەكەتتىك ورگانداردىڭ وكىلدەرى كىردى"، - دەلىنگەن حابارلامادا.
زارداپ شەككەن وتباسىنا جەرگىلىكتى اتقارۋشى ورگانداردىڭ جان-جاقتى كومەگى، ونىڭ ىشىندە پسيحولوگتاردىڭ كومەگى جانە جەرلەۋدى ۇيىمداستىرۋ كورسەتىلەتىنى ايتىلادى.
"جامبىل وبلىسى تجد جەدەل توبى، جىلجىمالى ورت-تەحنيكالىق زەرتحاناسى، جەدەل توپ جانە ءورت ءسوندىرۋ جانە اۆاريالىق-قۇتقارۋ جۇمىستارى قىزمەتىنىڭ پسيحولوگتارى جاڭاتاسقا شىقتى. سونىمەن قاتار، وقيعا ورنىنا وبلىس پروكۋرورى نۇرعالىم ءابدىروۆ پەن پوليتسيا دەپارتامەنتىنىڭ باستىعى جانات سۇلەيمەنوۆ شىقتى. وقيعا ورنىندا ءورت ءسوندىرۋ قىزمەتىنىڭ 6 قىزمەتكەرى جانە 1 دانا تەحنيكا جۇمىس ىستەدى. ءورت تولىقتاي ءسوندىرىلدى. ۋلى گازدان ۋلانۋ جاعدايلارى ونىڭ جانۋ ونىمدەرىندە گازدىڭ تولىق جانباۋى كەزىندە پايدا بولادى، وندا ادام اعزاسىنا اسەر ەتەتىن ۋلى گاز پايدا بولادى!"، - دەلىنگەن حابارلامادا.
ەسكە سالايىق، 2019 جىلعى اقپاندا نۇر-سۇلتانداعى كوكتال-1 تۇرعىن الابىندا ءورت 2006، 2009، 2014، 2016 جانە 2018 جىلدارى تۋعان بەس بالانىڭ ءومىرىن جالماعان. ول كەزدە جەكەمەنشىك ءۇي ماڭىندا سالىنعان شاعىن ءۇي ورتەنگەن.