قازاقستان رەسەيلىك "سپۋتنيك V" ۆاكتسيناسىنىڭ قاراعاندىدا وندىرىلەتىن نۇسقاسىن تىركەدى. بۇل تۋرالى كوروناۆيرۋسپەن كۇرەس جونىندەگى ۆەدومستۆوارالىق كوميسسيا حابارلادى.
"قاراعاندى فارماتسەۆتيكا كەشەنى (قفك) كوروناۆيرۋس ينفەكتسياسىنا قارسى "گام-كوۆيد-ۆاك" ("سپۋتنيك V") دەيتىن ۆاكتسينانى قازاقستان اۋماعىندا تىركەۋ پروتسەدۋراسىن اياقتادى" دەلىنگەن كوميسسيا حابارلاماسىندا.
ۆەدومستۆوارالىق كوميسسيانىڭ حابارلاۋىنشا، قفك قازاقستان دەنساۋلىق ساقتاۋ مينيسترلىگى ساراپتامالىق ۇيىمىنىڭ ۆاكتسينا قاۋىپسىزدىگى، ساپاسى جانە تيىمدىلىگى جونىندەگى قورىتىندىسىن 13 اقپان كۇنى العان.
"وسى قورىتىندى نەگىزىندە قازاقستان دەنساۋلىق ساقتاۋ مينيسترلىگى مەديتسينالىق جانە فارماتسەۆتيكالىق باقىلاۋ كوميتەتىنە تىركەۋ كۋالىگىن الۋ جونىندە ءوتىنىش جولداندى" دەلىنگەن حابارلامادا.
وسىلايشا، قازاقستان "سپۋتنيك V" ەكپەسىن قولدانۋدى ماقۇلداعان 27-ەل اتاندى.
وسى كۇنگە دەيىن ەكپەنى رەسەيدەن وزگە بەلارۋس، ارگەنتينا، سەربيا، الجير، پاراگۆاي، تۇركىمەنستان، ۆەنگريا، باە، يران سەكىلدى ەلدەر ماقۇلداعان.
قازاقستان رەسەيلىك ۆاكتسينانى رەسمي تىركەۋدەن وتكىزبەي تۇرىپ-اق سالا باستاعان. جالپىۇلتتىق ۆاكتسينالاۋ 1 اقپاندا باستالدى. بيلىكتىڭ مالىمدەۋىنشە، قفك اقپاننىڭ سوڭىنا دەيىن قازاقستان وڭىرلەرىنە "سپۋتنيك V" ۆاكتسيناسىنىڭ 90 مىڭ دوزاسىن جەتكىزبەك.
ال QazCovid-in قازاقستاندىق ۆاكتسيناسىن Covid-19-عا سىناۋ كەزىندە ەرىكتىلەر اراسىندا ءولىم جاعدايى تىركەلدى مە؟ بۇل سۇراققا بيولوگيالىق قاۋىپسىزدىك ماسەلەلەرى عىلىمي-زەرتتەۋ ينستيتۋتى وكىلدەرى جاۋاپ بەردى، - دەپ حابارلايدى Tengrinews.kz ءتىلشىسى.
"2021 جىلدىڭ 9 اقپانىنداعى جاعداي بويىنشا، ۆاكتسيناتسيالانعان ەرىكتىلەردىڭ دەنساۋلىق جاعدايى تۇراقتى"، - دەپ حابارلادى ءبىلىم جانە عىلىم مينيسترلىگى عىلىم كوميتەتىنىڭ بيولوگيالىق قاۋىپسىزدىك ماسەلەلەرى عىلىمي-زەرتتەۋ ينستيتۋتى وكىلدەرى.
ءتۇرى: سەركە اقپاراتتارى
جولدانعان ۋاقىتى: 15:10 - 2021/02/15
