الەكسەي ناۆالنىي گەرمانيادا بولعان كەزدە فرايبۋرگتەگى ەكىقابات ۆيللادا تۇرعان. سول ءۇيدىڭ يەسى "روسسيا 1" تەلەارناسىنىڭ جۋرناليستەرىن وتىرىك ايتتى دەپ ايىپتادى. بۇل تۋرالى "دوجد" باسىلىمى ەسىمىن جاسىرىپ قالعان ەر ادامعا سىلتەمە جاساپ حابارلادى.
بۇعان دەيىن "روسسيا 1" تەلەارناسىنداعى "اپتا جاڭالىقتارىنىڭ" جەكسەنبىلىك شىعارىلىمىندا ناۆالنىي گەرمانيادا ەمدەلىپ جاتقان كەزدە جالداپ تۇرعان ۆيللانى كورسەتتى. سيۋجەتتىڭ اۆتورى ساياساتكەردىڭ "باي" ءومىر سۇرگەنىنە نازار اۋدارىپ، "قوناق بولمەسى كەڭ، ەكى ديۆان، تەلەديدار، ۇستەلدە جەمىستەر تۇر" دەپ ۆيللانى تانىستىرعان ەدى. ءۇيدىڭ باعاسى تاۋلىگىنە - 530 ەۋرو.
رەپورتاج شىققاننان كەيىن جىلجىمايتىن مۇلىك يەسى ءۇيدى رەسەيلىك جۋرناليستەرگە جالعا بەرگەنىن بىلمەگەنىن جانە ونى جاسىرىن كامەرامەن تۇسىرگەنىن مالىمدەدى. ونىڭ ايتۋىنشا، جۋرناليستەر ءوزىن بەلگيادان كەلگەن تۋريست رەتىندە تانىستىرعان. ءتىلشى اناستاسيا پوپوۆا ءۇيدى العان كەزدە تەگىن باسقاشا تانىستىرعان - بوۋرت دەپ ايتقان.
سونداي-اق، "ۆەستي" سيۋجەتىندە ناۆالنىي ۆيللانى ەكى اي جالعا الدى دەپ حابارلاندى، ءبىراق ءۇي يەسى التى اپتاعا جالعا العانىن ايتتى.
ء
فيلمنىڭ شىققانىن بىلگەن ۆيللا يەسى گەرمانيانىڭ قۇقىق قورعاۋ ورگاندارىنا جۇگىنۋدى ۇيعاردى، دەپ حابارلايدى تەلەارنا.
"دوجد" باسىلىمىنداعى جاريالانىمىنان كەيىن جۋرناليست اناستاسيا پوپوۆا ءوزىنىڭ تەلەگرام-كانالىندا ۆيللانىڭ يەسى جاسىرىن كامەرامەن تۇسىرىلمەگەنىن ايتتى. ونىڭ ايتۋىنشا، وپەراتور كامەرانى "ادەتتەگىدەي، سويلەسەتىن سۇحباتتاسۋشىنىڭ الدىندا ۇستاعان".
پوپوۆا ەر ادامعا رەسەي تەلەارناسىنىڭ جۋرناليستەرى جۇمىس ساپارىندا جۇرگەنى تۋرالى نەمىس تىلىندە قاعاز كورسەتكەنىن ايتادى. الايدا ول كەزدە ءۇي يەسى قۇجاتقا ءمان بەرمەگەن.
ايتا كەتەيىك، 10 اقپاندا ءبىرقاتار باق الەكسەي ناۆالنىيدىڭ ايەلى يۋليا ناۆالنايا رەسەيدەن كەتىپ قالدى دەگەن حابار تاراتتى.
ەسكە سالايىق، 17 قاڭتاردا الەكسەي ناۆالنىي گەرمانيادان رەسەيگە ورالعان كەزدە ۇستالدى. گەرمانيادا ول "نوۆيچوك" توبىنان ۋلانعاننان كەيىن ەمدەلدى. ول "يۆ روشە" ءىسى بويىنشا شارتتى تۇردە سوتتالعان مىندەتتەمەلەرىن ورىندامادى دەپ ايىپتالدى. 2 اقپاندا ناۆالنىيعا وسى ءىس بويىنشا شارتتى مەرزىم ناقتى مەرزىمگە اۋىستىرىلىپ، سوت ۇكىمىمەن ناۆالنىي ەكى جىل سەگىز ايعا كولونياعا قامالدى.
ءتۇرى: سەركە اقپاراتتارى
جولدانعان ۋاقىتى: 10:30 - 2021/02/11
