لاتىن ءالىپبيىن دايىنداۋ ءۇشىن قۇرىلعان كوميسسيا پرەمەر-مينيستر اسقار مامينگە لاتىن گرافيكاسىنىڭ جەتىلدىرىلگەن جاڭا نۇسقاسىن تانىستىردى. بۇل تاقىرىپ الەۋمەتتىك جەلى قولدانۋشىلاردى بۇرىننان قىزىقتارادى. ماسەلەنىڭ قايتا تالقىلاۋعا شىققانىن ساياساتتانۋشى دانيار اشىمباەۆ «قازاقستان كوپتەن بەرى الفاۆيت وزگەرتكەن جوق ەدى. ساعىنىپ قالىپپىز» دەگەن ازىلمەن سيپاتتادى.

جاڭا نۇسقانى ۇسىنعان ماماندار ء«بىر دىبىس - ءبىر ءارىپ» ءپرينتسيپىن باسشىلىققا الىپتى. لاتىن گرافيكاسى ماسەلەسىنە ۇزاق پوست ارناعان مەيرام يمانباەۆ «وسىعان دەيىن دە سان رەت ۇسىنىلعان نۇسقالاردا دا جانە سوڭعى ۇسىنىلعان جاڭا نۇسقادا دا ء"بىر دىبىس - ءبىر ءارىپ" ءپرينتسيپى ءوزىنىڭ قاتە پرينتسيپ ەكەنىن كورسەتتى» دەپ جازدى. وعان كەيبىر ارىپتەردىڭ نوقاتتارمەن، يرەلەڭدەگەن سىزىقشالار مەن سالبىراعان يرەكتەرمەن تاڭبالانۋى ۇنامايدى. ونىڭ ايتۋىنشا، اعىلشىن ءتىلى مەن قازاق ءتىلىنىڭ ءتول دىبىستارى وتە جاقىن. ء"ا"، ء"و"، "ڭ" ەكى تىلدە دە بار، ءبىراق اعىلشىندار سول دىبىستارىن قوسارلاندىرىپ تاڭبالاپ-اق، ونى قينالماي وقىپ-جازىپ ءجۇر.

«لاتىنشا گرافيكاعا كوشسەك، ءوزىمىز شىعارىپ العان پرينتسيپتەرگە جابىسىپ قالماي بىردەن ۋاقىت سۇزگىسىنەن وتكەن دۇرىس نۇسقاسىنا كوشەيىك، نە بارىمىزعا شۇكىر ەتىپ، قويا سالايىق» دەپ جازدى م.يمانباەۆ.

جۋرناليست سەرىك ابىكەنۇلىنىڭ ويىنشا، ءالىپبي اۋىستىرۋداعى باستى ماقسات - قازاقى دىبىسقا ورالىپ، ءتىلدى ازات ەتۋ. ال ۇسىنىلعان جاڭا نۇسقادا دا ونداي ەرەكشەلىك بايقالمادى. جۋان، جىڭىشكەلىك بەلگىلەرىن الىپ تاستادى دەگەن تۇك ەمەس، قازاق ءتىلى ونسىز دا بۋىن ۇندەستىگىنە (جۋان، جىڭىشكەگە) بەيىم.

«تس»،»ە»، «يۋ» جازعاندا وڭاي الماساتىن تاڭبالار، كاپيتتسا-كاپيتسا، يۋلا - يۋلا، يا-دا سونداي يااسساۋي - ياسساۋي... كونفەتتى كامپيت دەپ جات «ف» -نى، ۆەلوسيپەدتى بەلەسەبەت دەپ جات «ۆ»-نى دالاعا تۇكىرىپ تاستاپ جاتقان قازاقى اۋىزعا بۇل دىبىستاردى تىقپالاۋ نە ءۇشىن كەرەك؟ تاڭبامىز وزگەرگەنىمەن ورىسشادان قۇتىلا المايمىز مىنا سىيقىمەن» دەپ جازدى سەرىك ابىكەنۇلى.

تارازدىق جۋرناليست كوسەمالى ءساتتىبايۇلى لاتىنشاعا نەگىزدەلگەن جاڭا قازاق ءالىپبيى حالىق ءۇشىن تاعى ءبىر پروبلەما تۋدىراتىنىن ايتادى. «بۇرىن ەكى تىلدە: قازاقشا، ورىسشا جازىپ، وقۋشى ەدىك، ەندى وعان ەكى ءالىپبي: لاتىن جانە كيريلليتسا قوسىلدى!!! بۇل تاعى بىرنەشە ماسەلەنى تۋدىرىپ (قوزعاپ)، ءبۇتىن ءبىر ەلدىڭ ازاماتتارىن ەكىگە جارماي ما (بولمەي مە؟)؟» دەپ قاۋىپتەنەدى ول.

«S» ساراپتاما ورتالىعى