ءتۇرى: 24.kz اقپاراتتارى
جولدانعان ۋاقىتى: 22:10 - 2021/04/08
ۋرسۋلا فون دەر ليايەن، ەۋروپالىق كوميسسيا باسشىسى:
- تۇركيا حالىقارالىق نورمالاردى ساقتاپ، ادام قۇقىعىن قورعاۋ ماسەلەسىنە نازار اۋدارۋ كەرەك. تۇركيانىڭ ىستامبۇل كونۆەنتسياسىنان شىققانى وتە وكىنىشتى. ءار تاراپ ءوز مىندەتتەرىن ورىندايدى دەپ ۇمىتتەنەمىن. تۇركيادان گرەكيا ارالدارىنا اعىلعان بوسقىندار كەرى قايتارىلۋ كەرەك. بۇل ەۋرووداق ءۇشىن ماڭىزدى شارتتاردىڭ ءبىرى.
بۇگىندە تۇركيادا شامامەن 4 ملن جۋىق بوسقىن بار. ولاردىڭ كوبى سيريالىق. رەسمي انكارا ەۋرووداقتىڭ 2016 جىلى قول قويىلعان ميگراتسيالىق كەلىسىمگە سايكەس ءوز مىندەتتەرىن ورىنداماعانىن ايتىپ بىرنەشە مارتە شاعىمدانعان ەدى. قۇجاتقا سايكەس، بوسقىندار تۇركيادا قالعانىمەن بۇل وڭىرگە سىرتتان گۋمانيتارلىق كومەك كورسەتىلۋى تيىس بولاتىن.
جەرورتا تەڭىزى ارقىلى كارى قۇرلىققا تابان تىرەمەك بولعانداردىڭ سانى تولاستاماي تۇر. ءومىرىن قاتەرگە تىگىپ، قايىققا وتىرعاندار جولدا اپاتقا ۇشىراپ جاتادى. جۋىردا گران كاناريا ارالدارىنىڭ قۇتقارۋشىلارى ونداعان كىرمەنى ءولىم اۋزىنان امان الىپ قالدى. جالپى پاندەمياعا قاراماستان بيىل ميگرانتتاردىڭ قاراسى 2019 جىلمەن سالىستىرعاندا 8 ەسەگە ارتقان. ساپارعا شىققان جۇزدەگەن ادام ورتا جولدا وپات بولدى. جۋىردا گرەكيا بيلىگى تۇركيانىڭ جاعالاۋ كۇزەتىن تاياۋ شىعىستان شىققان بوسقىندارعا شەكارا اسۋ ءۇشىن كومەكتەستى دەپ ايىپتادى. تۇركيا تاراپى ميگرانتتاردى كەرى قايتارىپ جاتقان گرەكياعا وكپەلى.
نوتيس ميتاراچي، گرەكيانىڭ ميگراتسيا ماسەلەسى بويىنشا ءمينيسترى:
- تاياۋدا تۇركيا جاعالاۋىنان شىققان بوسقىندار زاڭسىز ەۋروپاعا وتپەك بولدى. ءقاۋىپتى كەمەگە وتىرعان كەلىمسەكتەردى گرەكياعا جەتكىزۋ ءۇشىن تۇركيانىڭ اسكەري تەڭىز فلوتى مەن جاعالاۋ كۇزەتىنىڭ قىزمەتكەرلەرى كومەك كورسەتكەن. كىرمەلەردى ءوز ەلىنە قايتارۋدى تالاپ ەتەمىز.
اقش-قا لاتىن امەريكاسى ەلدەرىنەن كەلگەن ميگرانتتاردىڭ سانىندا دا شەك جوق. ناۋرىز ايىنىڭ وزىندە مەكسيكا مەن اقش شەكاراسىنان 171 مىڭ ميگرانت وتكەن. بۇنداي ءبىر ايلىق كورسەتكىش سوڭعى 20 جىلدا تىركەلمەگەن. بۇگىندە مەكسيكامەن شەكارالاس جەردە كىرمەلەردى ورنالاستىرۋ ءۇشىن قوسىمشا ورتالىقتار اشىلىپ جاتىر. ميگرانتتاردىڭ اراسىندا كامەلەت جاسقا تولماعان بالالار كوپ. ءقازىر دجو بايدەن اكىمشىلىگى 5600 بالانىڭ قانداي جاعدايدا جانە نە سەبەپتەن اتا-انالارىنان ايىرىلعانىن انىقتاپ، بالعىنداردى وتباسىنا قوسۋ ماسەلەسىن قولعا الۋ كەرەك دەگەندى العا تارتادى.
