ءتۇرى: 24.kz اقپاراتتارى
جولدانعان ۋاقىتى: 21:10 - 2021/04/08
قازاقستان مۇسىلماندارى ءدىني باسقارماسىنىڭ ءتوراعاسى ناۋرىزباي قاجى تاعانۇلى وسىلاي دەدى.
باس ءمۇفتيدىڭ ايتۋىنشا، قىزىل ايماقتاعى مەشىتتەردە بەس ۋاقىت ناماز تەك جەكەلەگەن تۇردە وقىلادى. 2 مەتر اراقاشىقتىق ساقتالۋى قاجەت. جاسى ۇلكەن كىسىلەر، دەنساۋلىعى ناشار ادامدار مەن بالالار نامازدارىن ۇيلەرىندە وقيدى. تاراۋىق نامازى وقىلمايدى. قۇران حاتىم راسىمدەرى قاشىقتان وقىلادى.
ناۋرىزباي قاجى تاعانۇلى، قازاقستان مۇسىلماندارى ءدىني باسقارماسىنىڭ ءتوراعاسى:
- اشتىق پەن شولگە ءتوزىپ، اللا رازىلىعىن الۋدى شىنايى نيەت ەتكەن ادامعا بەرىلەتىن سىي مەن قۇرمەت ەرەكشە بولماق. اللا تاعالا قۇدسي-حاديستە: «اۋزى بەرىك ادام ىشىپ-جەۋىن مەن ءۇشىن دوعاردى. ورازا – بۇل مەن جانە قۇلىمنىڭ اراسىنداعى عيبادات. وعان بەرىلەتىن سىيدى مەن عانا ولشەپ، مەن بەرەمىن. اۋزى بەرىك قۇلىمنىڭ اشتىق پەن شولدەۋ سەبەبىنەن شىققان اۋىز ءيىسى مەن ءۇشىن ميسك اتىرىنەن دە قايىرلى» دەگەن.
ايتا كەتكەن ءجون، رامازان ايى 13 ساۋىردە باستالىپ، 12 مامىردا اياقتالادى. 8 مامىردان 9 مامىرعا قاراعان ءتۇن - قاسيەتتى ءقادىر ءتۇنى. 13 مامىر ورازا ايتتىڭ ءبىرىنشى كۇنى. بيىلعى ءپىتىر ساداقا جان باسىنا 420 تەڭگە بولىپ بەكىتىلدى. ونىڭ مولشەرى بارلىق وبلىستاعى 2 كەلى ۇننىڭ ەڭ تومەنگى باعاسىمەن ولشەنەدى.
