بىلتىر وڭىردە «نۇرلى جەر» باعدارلاماسى اياسىندا 574 مىڭ شارشى مەتر تۇرعىن ءۇي سالىنعان. ناتيجەسىندە 5 مىڭعا جۋىق وتباسى قونىس تويىن تويلادى. مەملەكەتتىك باعدارلامانىڭ يگىلىگىن كورەتىندەر بيىل دا ارتادى دەيدى جاۋاپتىلار.

قاز-قاتار تىزىلگەن جاڭا تۇرعىن ۇيلەر كوبىنە قالانىڭ سولتۇستىك بولىگىندە ورنالاسقان. «سارىارقا» دەپ اتالاتىن ىقشام اۋداندا ءقازىردىڭ وزىندە 21 ءۇيدىڭ قۇرىلىسى ءجۇرىپ جاتىر. ماسەلەن، مىنا الاڭدا كوپ ۇزاماي 70 پاتەرلى ەكى ءۇي بوي كوتەرەدى. قارلى بوران مەن قاتتى جەل جۇمىسشىلارعا ءجيى كەدەرگى كەلتىرەدى دەيدى مەردىگەر. دەگەنمەن نىساندى ۋادەلى مەرزىمىنەن كەشىكتىرمەۋگە بارىن سالىپ جاتىر. جوسپار بويىنشا، بەس قاباتتى قوس باسپانا تامىز ايىندا دايىن بولادى.

ارمان گەلمانوۆ، وپەراتور:

– قازىرگى كەزدە كىرپىش سالىنىپ جاتىر. سۋى، ءبارى تارتىلىپ تۇر. ۇيلەر وتە جىلى بولادى. سەبەبى كىرپىشتەردىڭ اراسىنا پەناپلاست سالىنادى.

جىلى ءارى جاڭا ۇيمەن ءبىرىنشى كەزەكتى جەتىمدەر مەن كوپبالالى وتباسىلاردى قامتۋ كوزدەلگەن. وسى ءۇشىن اتالعان شاعىن اۋداندا 12 ارەندالىق باسپانانىڭ قاداسى قاعىلدى. ولاردىڭ دەنى بيىلدان قالدىرماي يەلەرىنە تابىستالادى. ال وبلىس بويىنشا ءۇي كەزەگىندە تۇرعانداردىڭ جالپى سانى 21 مىڭعا جەتەقابىل. ماسەلەنى شەشۋ ءۇشىن جەرگىلىكتى بيلىك باسپانا سالۋدى تەك وبلىس ورتالىعى عانا ەمەس، اۋىل-ايماقتا دا شيراتقان.

گۇلميرا تاسوۆا، وبلىستىق قۇرىلىس باسقارماسىنىڭ ءبولىم باسشىسى:

– بيىل وڭىردە 16 ارەندالىق تۇرعىن ءۇي قولدانىسقا بەرىلەدى. اتاپ ايتساق، كوكشەتاۋ قالاسىندا 10 ءۇي، ەگىندىكولدە 16 پاتەرلى ءبىر ءۇي، ءبىرجان سال اۋدانىندا 21 پاتەرلى ءۇي، شورتاندىدا 36 پاتەرلى ءبىر ءۇي جانە ەرەيمەنتاۋ، تسەلينوگراد، اقكول اۋداندارىندا 45 پاتەرلى ۇيلەر سالىنىپ، ەل يگىلىگىنە تاپسىرىلادى.

بىلتىر وڭىردە «نۇرلى جەر» باعدارلاماسى اياسىندا 5 مىڭعا جۋىق وتباسى ءۇيلى بولدى. ال بيىل باقىتقا كەنەلەتىن شاڭىراق سانى ارتادى دەيدى جاۋاپتى وكىلدەر. جوسپار بويىنشا جىل سوڭىنا دەيىن 616 مىڭ شارشى مەتر باسپانا سالىنىپ، تاپسىرىلۋى ءتيىس. بۇل جىلداعى مەجەدەن 42 مىڭ شارشى مەترگە كوپ.

نازەركە توقجان، ەۆگەني شينكورەنكو