جۇرت وركەنيەتتەن ماقۇرىم قالعاندارىنا نارازى. بۇل اۋىلدىق وكرۋگتە سىمسىز جەلىدەن بولەك، اۋىزسۋ، وتكەل، جايىلىم دا پروبلەماعا اينالعان.

70 ءتۇتىنى بار جاڭاوتكەل اۋىلىندا بىردە-بىر ۇيدە ۇيالى بايلانىس جوق. تۇرعىندار تەلەفونمەن قوڭىراۋ شالۋ ءۇشىن اۋرە-سارساڭعا تۇسەدى. توبە بىتكەننىڭ ۇستىنە شىعىپ، اشىق جەر ىزدەيدى. ونىڭ وزىندە بايلانىس بىردە بار، بىردە جوق. پايدا بولا قالسا، سويلەسۋدىڭ ءوزى مۇڭ. توعىزتاراۋ اۋىلىندا دا ءدال وسىنداي جاعداي.

سۇلتان تۇڭعىشباەۆ، جاڭاوتكەل اۋىلىنىڭ تۇرعىنى:

– ەڭ ۇلكەن ماسەلە – بايلانىستىڭ جوقتىعى. ءوزىمىز حابارلاسپاساق، بىزگە ەشكىم حابارلاسا المايدى. ونىڭ وزىندە بيىك، اشىق جەرگە شىعىپ بارىپ سويلەسەمىز. جاسىراتىنى جوق، كەيدە جەدەل-جاردەم شاقىرتۋدىڭ وزىنە قينالىپ قالامىز. قاريالار، بالالار بار دەگەندەي.

اناستاس نوۆيكوۆسكي wi-fi جەلىسىن قىمبات بولسا دا امالسىز ورناتقان. ونىڭ ءوزىن اكىمدىك بالالاردى ونلاين وقىتۋ تۋرالى شەشىم شىققاننان كەيىن تارتىپ بەردى دەپ وتىر. ال تۇرعىن ۇيالى تەلەفونىن ۇنەمى شاتىردىڭ ۇستىنە قالدىرۋدى ادەتكە اينالدىرعان. بۇل بايلانىس اياسىندا بولۋدىڭ جالعىز جولى.

اناستاس نوۆيكوۆسكي، جاڭاوتكەل اۋىلىنىڭ تۇرعىنى:

– اي سايىن بايلانىس ءۇشىن تاريفكە سايكەس اقشا تولەپ وتىرمىز. الايدا بايلانىس ساپاسى ناشار. بيىك مۇنارا ورناتىپ، ءبىر عانا قوندىرعى قويسا، ماسەلە شەشىلەر ەدى. بۇل تۋرالى اكىمدىكتە جيىن بولعان سايىن كوتەرەمىز. قۇلاق اسىپ جاتقان ەشكىم جوق.

ەلەنا نوۆيكوۆسكايا، جاڭاوتكەل اۋىلىنىڭ تۇرعىنى:

– بىزگە بايلانىس كەرەك. قازىرگى ۋاقىتتا ونسىز وتىرۋ مۇمكىن ەمەس. بايلانىستى ءۇيدىڭ ءىشى تۇگىلى دالادا ىزدەپ ءجۇرىپ ارەڭ تاۋىپ الامىز. ماسەلە شەشىلەدى دەگەلى تالاي جىل بولدى. سەنۋدەن قالدىق. قىلقىلداپ سۇراي-سۇراي جالىقتىق.

اكىمدىك وكىلدەرى توعىزتاراۋ اۋىلدىق وكرۋگىندەگى جاعدايعا قانىق. تۇرعىنداردىڭ شاعىمىن ەستىپ، ءبىلىپ وتىر. الايدا جوسپارلى كەزەك كەلمەيىنشە، اۋىلدىق اعايىنعا شىداي تۇرۋعا تۋرا كەلەتىن سىڭايلى.

نۇرلان نەسىپبەكوۆ، جامبىل اۋدانى اكىمىنىڭ ورىنباسارى:

– بۇرىن جۋالى اۋدانىنا قاراعان توعىزتاراۋ، سوسىن ءبىزدىڭ اۋدانعا ءوتىپ وتىر. ءبىز كەزەڭ-كەزەڭىمەن قوسىپ وتىرمىز. كەلىسىمشارتقا تۇرعانبىز. ەندى كەلەسى كەزەكتە جاڭاوتكەلدە، توعىزتاراۋدا جۇرگىزىلەتىن بولادى. ءبىرىنشى توقساندا بىتەتىن شىعار دەپ وتىرمىز.

ەلدى مەكەندەگى تاعى ءبىر وزەكتى ماسەلەنىڭ ءبىرى – وتكەل. اۋىل جايىلىمىنىڭ ءبىر بولىگى تەمىرجولدىڭ ارعى بەتىندە ورنالاسقان. ال مۇندا مال ايداپ وتەتىن ارنايى وتكەل جوق. بۇرىن جۇرت تورت-تۇلىكتى وزەن سۋى ازايعاندا كوپىردىڭ استىمەن وتكىزىپ امالدايتىن. ەندى اسا وزەنىنىڭ ارناسى بۇرىلعالى سۋ تولىپ، كولىك تە، مال دا وتە المايتىن جاعدايعا جەتتى.

نۇراحان اسانوۆ، جاڭاوتكەل اۋىلىنىڭ تۇرعىنى:

– جاڭاوتكەل ەشكىمگە كەرەك ەمەس. جامبىل اۋدانىنىڭ اكىمىنە دە، اۋىل اكىمىنە دە كەرەگى جوق. وتكەلگە جارىماي وتىرمىز. كەڭەس ۇكىمەتى قۇلاعالى بەرى وتكەلدى جوق قىلىپ جىبەردى. قايدا كەتىپ قالعانىن تاپپاي قالدىق. تەمىرجولدىڭ ۇستىمەن جۇرگىزسەڭ، تەمىرجولشىلار ايىپپۇل سالادى. وسى كوكتەمدە سيىردى سۋدىڭ استىمەن ايدايدى.

جەرگىلىكتى تۇرعىندار قۋىستا قالعان اۋىلدا ەشكىمنىڭ شارۋاسى جوق دەپ قاپالى. ەستيتىن قۇلاق بولسا، ەلدى مەكەندە اۋىز سۋ، جايىلىم سياقتى ماسەلەلەر شاش ەتەكتەن.

رۋسلان باقىتبەكۇلى، تيمۋر سەيىلحان، رۋسلان ءاحاتىللا