اۋىل-ايماق تۇرعىندارىنا بارىمتاشىلار تىنىشتىق بەرمەيدى. جىل باسىنان بەرى 46 دەرەك تىركەلدى. پوليتسيا 26 قىلمىستىق توپتى ۇستادى. الايدا بارىمتاشىلاردىڭ توقتار ءتۇرى جوق. ءتورت تۇلىك ءوربىتىپ، جان باققان شارۋالار وڭاي ولجاعا قۇنىققان ۇرىلارعا قاتاڭ جازا قولدانۋدى سۇراپ وتىر.

وڭىردە «اۋىل شارۋاشىلىعى جانۋارلارىن ۇرلاۋعا قارسى ءىس-قيمىل جول كارتاسى» ازىرلەندى. پوليتسەيلەر تراسسا مەن قالا كوشەلەرىندە مال تيەگەن جۇك كولىكتەرىن توقتاتىپ، تۇگەل تەكسەرىپ جاتىر. ەلدى تيتىقتاتقان ۇرىلاردى ۇستاۋعا تۇرعىندار دا كومەكتەسىپ، ايماقتىق پوليتسيا ينسپەكتورى جانە اۋىل اكىمدەرى بىرلەسىپ بارىمتاشىلاردى اڭدۋعا شىعادى. ءبىراق ولاردى ۇرلىق ۇستىندە تۇزاققا تۇسكەندەر مال يەسىمەن مامىلەگە كەلىپ، كوپ ۇزاماي بوستاندىقتا قايتا تايراڭداپ جۇرەتىنى تاڭقالدىرادى.

عالىمجان ءومىرزاقوۆ، قالالىق پب ءبولىم باسشىسى:

– 2020 جىلدىڭ قازان ايىنان باستاپ قر قك جاڭا باپ ەنگىزىلدى. ءقازىر ەكى تاراپتىڭ دوستاسۋىنا مۇمكىندىك جوق. مىندەتتى تۇردە ءىس قوزعالادى. ول بويىنشا ءىستىڭ اۋىرتپالىعىنا بايلانىستى شەشىمدەر قابىلدانادى. ۇرلانعان مالدىڭ 70% ورىستەن جوعالىپ كەتەدى.

تۇرعىندار قولداعى تۇلىگىن جايىلىم-شابىندىققا جىبەرمەي، قوراعا قاماپ تاعى وتىرا المايتىنى انىق. ءبىراق باس-كوز بولاتىن باقتاشى جالداعان دۇرىس ارينە. پوليتسەيلەر سونداي-اق قوقىس جاشىكتەرىنەن قورەكتەنىپ، قالا ىشىندە قاراۋسىز جايىلاتىن تۇلىك يەلەرىنە تۇسىندىرمە جۇمىستارىن جۇرگىزىپ الەك. ءبىراق ءالى بوسىپ جۇرگەن مال كوپ. وبلىس كولەمىندەگى بارلىق ەت وڭدەۋ نىساندارىنا بەينەكامەرالار ورناتىلدى. 22 جىلدان بەرى ساۋدا ورىندارىن ەت ونىمدەرىمەن قامتىپ كەلگەن مىنا تسەحتا كۇنىنە 15-17 مال سويىلادى. بەكەتكە اكەلىنگەن تۇلىك پىشاققا ىلىكپەس بۇرىن 3 كۇندەي كارانتيندە تۇرادى. ۇرلانعان نەمەسە اۋرۋ مال ەكەنى سول ۋاقىت ىشىندە انىقتالادى ەكەن.   

باۋىرجان شاعىروۆ، مال سويۋ الاڭىنىڭ يەسى:

– قۇجات سىرتىنا كولىك ءنومىرى، اكەلگەن ادامنىڭ تەگى جازىلادى، ءسويتىپ بارىپ قابىلدايمىز. سويۋعا جىبەرگەندە مالىمەتتەر بازاسىنا تىركەلگەن سوڭ سويىلادى. سوياتىن ءوزىمىزدىڭ قاساپشىلار ءبارىن تازالاپ، بازارعا دايىن كۇيىندە جىبەرەدى. بازاردان زەرتحانا قابىلدايدى، ودان كەيىن ۆەتەرينارلار تەكسەرەدى. سودان كەيىن بارىپ ساتىلۋعا شىعارىلادى.  

قىزىلوردادا مال بازارىندا بۇعان دەيىن تۇلىك ساۋداسى تۇندە قىزاتىن. ءقازىر كۇندىزگە اۋىستىرىلدى. رەيد بارىسىندا رۇقسات قاعازىڭ جوق دەپ بازار باسشىلىعى ءتۇسىرۋ توبىن دا كىرگىزبەدى. ەگەسى شىمكەنتتىك جەكە كاسىپكەر يەلىگىنە ءبىز تۇگىل پوگون تاققان پوليتسەيلەر باس سۇعا المادى. ءسويتىپ ءار سەيسەنبىدە وتەتىن تۇلىك جارمەڭكەسىن قابىرعا سىرتىنان كورىپ قايتۋعا تۋرا كەلدى.

قامبار بەكەنوۆ، قانات ەڭسەباەۆ