مەيىرىمدىلىك ەستافەتاسىنا رەسپۋبليكانىڭ ەرىكتىلەر قوزعالىسى، قوعام قايراتكەرلەرى، ارتىستەر مەن ءتۇرلى ۇيىمدار اتسالىسىپ ءجۇر. ولار جالعىزباستى زەينەتكەرلەر مەن ارداگەرلەرگە، كوپبالالى جانە مۇقتاج وتباسىلارعا، سونداي-اق قيىن جاعدايعا تاپ بولعان ادامدارعا قولداۋ ءبىلدىرىپ، كومەك كورسەتۋگە نيەتتى.

ەلىمىزدە قايىرىمدىلىقپەن اينالىساتىن ۇيىمدار از ەمەس. بىلتىر ەرىكتىلەر جىلى اياسىندا بارلىعى بىرىگىپ، مىڭداعان ازاماتقا جاردەم بەردى. ماسەلەن، جاڭا وقۋ جىلىندا رەسپۋبليكا بويىنشا 6 مىڭ نوۋتبۋك پەن 3 جارىم مىڭ پلانشەت تاراتىلدى. ناتيجەسىندە از قامتىلعان وتباسىلارداعى بالالار ونلاين وقۋعا مۇمكىندىك الدى. ماقتاارال اۋدانىنداعى تابيعي اپاتتان زارداپ شەككەندەرگە قۇنى 3 ميلليارد تەڭگەنىڭ ازىق-تۇلىگى مەن كيىم-كەشەگى جەتكىزىلدى. يگىلىكتىڭ ەرتە كەشى جوق. سوندىقتان ەرىكتىلەر ءالى دە قايىرىمدىلىق جاساپ ءجۇر.

نارگيزام ماحمۇدوۆا، قازاقستان حالقى اسسامبلەياسىنىڭ مۇشەسى:

– بۇگىن ءبىز 120 وتباسىعا تاڭداپ ازىق-تۇلىك سەبەتتەرىن، قوي ەتىن ءبولىپ بەردىك. دەمەۋشىلەرىمىز بار. كۇندەلىكتى بۇل جۇمىس اتقارلىپ جاتىر، اتقارىلادى دا.

ەرىكتىلەردىڭ ايتۋىنشا، سوڭعى ۋاقىتتا كومەك كورسەتەمىن دەيتىن كاسىپكەرلەر سانى كوبەيگەن. كەيبىرى ءوزى حابارلاسىپ، از قامتىلعان وتباسىلاردى كەرەك-جاراقپەن قامتاماسىز ەتۋگە اتسالىسىپ ءجۇر. سولاردىڭ ءبىرى – فارحات ايساروۆ.

فارحات ايساروۆ، ەرىكتى:

– پاندەميا باستالعاندا ءبىز ەرىكتىلەر قوزعالىسىنا قوسىلدىق. مۇقتاج جاندارعا ازىق-تۇلىك، كيىم-كەشەك الىپ بارامىز. قالادا جەر ۇيدە جالعىز تۇراتىن قارتتار كوپ. سولاردىڭ قارىن كۇرەپ، پەشىن جاعۋعا جاردەمدەسەمىز. «30 يگى ءىس» مارافونى اياسىندا ەلوردا تۇرعىندارىنا 500 ازىق-تۇلىك كارزەڭكەسىن تاراتتىق. 

ەرىكتىلەر قاتارىندا ءتۇرلى ماماندىق وكىلدەرى بار. ءارقايسىسى ءوز سالاسىندا قول ۇشىن سوزۋعا دايار. مىسالى، جاسوسپىرىمدەرگە قولداۋ كورسەتەتىن پسيحولوگتار قايىرىمدىلىق شاراسى اياسىندا تەگىن قىزمەت كورسەتەدى. 

داريعا تاشەنوۆا، ەربول دايىروۆ