ءتۇرى: حابار ارناسى
جولدانعان ۋاقىتى: 21:24 - 2021/04/08
دەنساۋلىق ساقتاۋ مينيسترلىگىنىڭ وكىلدەرى: «بۇل – الەمدە كەڭىنەن قولدانىلىپ جاتقان تاجىريبە»، - دەيدى. وسىلايشا ءبىزدىڭ ەل دە بۇل ءادىستى سىناپ كورمەكشى. ال مەديتسينا عىلىمدارىنىڭ كانديداتى بۇل ويمەن كەلىسپەيدى.
بىرلىك بەرىكۇلى، ءتىلشى:
- دەنساۋلىق ساقتاۋ ءمينيسترى الەكسەي تسويدىڭ سوزىنە سەنسەك، جاقىن ارادا ەلىمىزگە تاعى دا ۆاكتسينا تاسىمالدانباقشى. سايكەسىنشە ەندى ەلىمىزدە جاپپاي ۆاكتسينالاۋدىڭ قارقىندى كەزەڭى جۇرگىزىلگەلى تۇر. ۆەدومستۆو وكىلدەرى اۋرۋحاناداعى كەزەك سانىن ازايتۋ ءۇشىن ساۋدا ورتالىقتارىندا ەكپە ەكتىرەتىن ارنايى ورىن ازىرلەپتى.
ساۋدا ورتالىعىنداعى كونكي تەبەتىن جەر ءاپ ساتتە ۆاكتسينا ەكتىرەتىن ورىنعا اينالادى دەپ كىم ويلاعان؟! مۇندا ءقازىر تىگىلگەن شاتىر مەن تىزىلگەن ورىندىقتان باسقا تۇك جوق. ارى-بەرى وتكەندەردىڭ كوزىندە كوپ قۇبىلىس بار. ءبىرى بالمۇزداق جەپ، كەزەكتە تۇرعانىن ەلەستەتىپ، ميىعىنان كۇلسە، ەندى ءبىرى ۆاكتسينا ەكتىرگەننەن كەيىنگى احۋالىنا الاڭدايدى.
ايجان ەسماعامبەتوۆا، قر دسم سانيتارلىق-ەپيدەميولوگيالىق باقىلاۋ كوميتەتىنىڭ ءتوراعاسى:
- ەكپە ەكتىرگەن ازاماتتىڭ اللەرگياعا تەرىس رەاكتسياسى بولسا، مىندەتتى تۇردە الدىن الۋ جۇمىستارى جۇرگىزىلەدى. سونداي-اق ماماندار شۇعىل كومەك كورسەتە ءبىلۋى ءتيىس. مۇنداي جاعدايلار تۋىنداسا، جەدەل-جاردەم دارىگەرلەرى كەزەكشىلىكتە تۇرادى، سولار كومەكتەسەدى.
دەنساۋلىق ساقتاۋ مينيسترلىگى جىلجىمالى مەديتسينالىق توپتىڭ تاجىريبەسىنە سۇيەنەدى. ولار وسىعان دەيىن ۇقساس وقيعالاردا ءوز بىلىكتىلىگىن دالەلدەپتى. ءبىراق بۇگىنگى ۆيرۋس بۇرىنعىلاردان وزگەشە. وتە وتكىر. سايكەسىنشە ەگىلەتىن ءدارىنىڭ دە دارمەنى كۇشتى. قىسقاسى، مەديتسينا عىلىمدارىنىڭ كانديداتى ساۋدا ورتالىعىندا ەكپە ەگۋدى قولدامايدى.
قايىرعالي كونەەۆ، مەديتسينا عىلىمدارىنىڭ كانديداتى:
- ۆاكتسينا ەگەتىن بولمە قاجەت قۇرال-جابدىقپەن تولىق قامتىلۋى كەرەك. انافيلاكتيكالىق شوكقا قارسى تويتارىس بەرە ءبىلۋ ءتيىس. ەگەر ميلليون ادامنىڭ ىشىنەن بىرەۋى وسى جاعدايعا دۋشار بولسا، ونى ساۋدا ورتالىعىندا قۇتقارۋ مۇمكىن ەمەس. ەلەستەتىڭىزشى، ساۋدا ورتالىعىنىڭ انا باسىنان مىنا باسىنا دەيىن 1 شاقىرىم ءجۇرۋ كەرەك.
قايىرعالي كونەەۆتىڭ سوزىنشە، ءقازىر ۆاكتسينا جەتىسپەي جاتىر. ونىڭ ۇستىنە ەل ازاماتتارىنىڭ اۋرۋحاناعا اعىلىپ، ۆاكتسينا سالدىرۋعا كەزەكتە تۇرعانى شامالى. «سوندىقتان ەكپەنى ەمحانادا ەككەن ءجون»، - دەيدى. ال نۇر-سۇلتان قالاسىنىڭ باس مەملەكەتتىك سانيتارلىق دارىگەرى مۇنىمەن كەلىسپەيدى. سارقىت بەيسەنوۆا: «مۇنداي ءادىس الەمنىڭ باسقا ەلدەرىندە سىنالعان»، - دەيدى. بۇدان بولەك ءار ساۋدا ورتالىعىنداعى ەكپە سالاتىن ورىنداردىڭ بارلىق سانيتارلىق تالاپقا ساي كەلەتىنىنە شەك كەلتىرمەيدى. ەندىگى تاڭداۋ ازاماتتاردىڭ وزىندە.
