مينيستر ءسوزىن: «ۆاكتسينا ەكتىرگەن دۇرىس»، - دەپ باستادى. سەبەبى كوروناۆيرۋستىڭ ورشۋىنە جاڭا شتامدار تۇرتكى بولىپتى. دۇنيەجۇزىلىك دەنساۋلىق ساقتاۋ ۇيىمىنىڭ مالىمەتىنشە، بريتاندىق شتامم الەمنىڭ 130، ونتۇستىك افريكالىق شتامم 80، ال برازيليالىق شتامم 45 ەلىندە انىقتالدى. ال ءبىزدىڭ ەلدە بريتاندىق جانە وڭتۇستىك افريكالىق شتاممدار بار ەكەنى راستالدى. ءمينيستردىڭ ايتۋىنشا، بريتاندىق شتامم اناعۇرلىم ءقاۋىپتى.

سونىمەن مينيستر ۆاكتسينالاۋ كەزەڭىن ءۇش توپقا بولگەن. ءبىرىنشى بولىپ جۇقپالى اۋرۋحانا، جەدەل مەديتسينالىق كومەك، رەانيماتسيا، قابىلداۋ ءبولىمى مەن سان-ەپيدقىزمەتتىڭ قىزمەتكەرلەرى جاپپاي ەگىلەدى. ەكىنشى مەكتەپ، جوو، مەكتەپكە دەيىنگى ءبىلىم بەرۋ ورتالىقتارىنىڭ قىزمەتكەرلەرى مەن سوزىلمالى اۋرۋى بارلارعا سالىنادى. ءۇشىنشى كەزەكتە توتەنشە جاعدايلار مينيسترلىگى، ىشكى ىستەر مينيسترلىگى، قورعانىس مينيسترلىگى مەن ۇلتتىق قاۋىپسىزدىك قىزمەتكەرلەرى ۆاكتسينا قابىلدايدى.

ەستەرىڭىزدە بولسا، الەكسەي تسوي: ء«ساۋىردىڭ باسىندا وتاندىق ءونىم دايىن بولادى»، - دەگەن ەدى. ءبىراق وسى جولى ۆاكتسينانىڭ 2 ملن دوزاسى سىرتتان الىناتىنىن ايتتى. بۇل ۆاكتسينا تۇرعىنداردىڭ 23،4 پروتسەنتىنە عانا جەتەدى. سايكەسىنشە وسى ايدا نۇر-سۇلتان، الماتى، شىمكەنت قالاسى جانە الماتى مەن قاراعاندى وبلىستارىنا ۆاكتسينا جەتكىزۋ كولەمى ۇلعايتىلادى.

ۇكىمەت باسشىسى: «الداعى ءۇش ايدا 6 ملن ادام ۆاكتسينا الادى»، - دەپ سەنىممەن ايتتى. سونىمەن قاتار اسقار مامين دەنساۋلىق ساقتاۋ جۇيەسى قاجەت كەرەك-جاراقتارمەن تولىق قامتاماسىز ەتىلگەنىن جەتكىزدى. دارى-دارمەكتىڭ دە ءبىر ايلىق قورى جاساقتالىپتى.

اسقار مامين، قر پرەمەر-مينيسترى:

 - قازىرگى ءبىزدىڭ باستى مىندەتىمىز – سانيتارلىق-ەپيدەميولوگيالىق جاعدايدى تۇراقتاندىرۋ جانە ۆاكتسينا العانداردىڭ سانىن ارتتىرۋ. وسى باعىتتا ناقتى جۇمىس ۇيىمداستىرىلدى. مينيسترلىك ۆاكتسيناتسيالاۋ بويىنشا جوسپار ازىرلەدى. بيىلعى ءساۋىر، مامىر جانە ماۋسىم ايلارىندا وڭىرلەردە اي سايىن 2 ملن ادامعا ۆاكتسينا سالۋ مۇمكىندىگى قامتاماسىز ەتىلەدى.

پرەمەر-مينيستر جينالعاندارعا ناقتى تاپسىرمالار بەردى. ورىندالۋىن ءوزى قاداعالايدى. ۆيرۋستىڭ بەتىن قايتارۋ – ورتاق مىندەت.