پەتروپاۆل. قازاقپارات – سولتۇستىك قازاقستان وبلىسىندا پرەزيدەنت قاسىم-جومارت توقاەۆتىڭ 2020 جىلعى 1 قىركۇيەكتەگى جولداۋىندا ايتقان تاپسىرماسىنا وراي الداعى 5 جىلدا 100 ملن كوشەت وتىرعىزۋ جوسپارلانعان. كەشەندى جوبا بيىلدان باستاپ جۇزەگە اسىرىلا باستايدى، دەپ حابارلايدى قازاقپارات ءتىلشىسى.
سقو تابيعي رەسۋرستار جانە تابيعات پايدالانۋدى رەتتەۋ باسقارماسىنىڭ مالىمەتىنشە، پرەزيدەنت تاپسىرماسىن جۇزەگە اسىرۋ ماقساتىندا كەشەندى جوبا ازىرلەنگەن. ماسەلەن بيىل 850 گا اۋماققا 2 ملن 270 مىڭ كوشەت وتىرعىزۋ جوسپارلانعان. ەگىلەتىن تال كولەمى جىل سايىن ۇلعايتىلىپ وتىرادى. وسىلايشا 2025 جىلى 36 ملن 710 مىڭ كوشەت وتىرعىزىلماق. بۇل ماقساتقا وسى ارالىقتا 5 ملرد ارتىق تەڭگە جۇمسالماقشى.
«كوشەتتى تۇقىمنان ءتالىمباقتاردا ءوسىرىپ شىعارامىز. ول ءۇشىن قاراعاي مەن قايىڭنىڭ تۇقىمى جينالادى. ەكى جىل بويى ءوسىرىپ، تەك سودان كەيىن عانا ونى ەگەمىز. جوسپارلانعان كورسەتكىشكە قول جەتكىزۋ ءۇشىن ءتالىمباقتاردىڭ اۋماعىن ۇلعايتۋ قاجەت بولادى. ءقازىر وبلىستىڭ ورمان شارۋاشىلىقتارى وسى ماسەلەمەن اينالىسىپ جاتىر»، - دەيدى سقو تابيعي رەسۋرستار جانە تابيعات پايدالانۋدى رەتتەۋ باسقارماسىنىڭ جەتەكشىسى بەيبىت يسمانوۆ.
بيىل ورمانشىلار قاراعاي مەن قايىڭنىڭ 4،5 توننا تۇقىمىن ازىرلەمەك. سونداي-اق ءتالىمباقتاردىڭ اۋماعىن تاعى 40 گا ۇلعايتۋدى جوسپارلاعان.
«بىلتىر سقو ەلدى مەكەندەرىن كوگالداندىرۋدىڭ جانە جاسىل ايماق قۇرۋدىڭ 2021-2025 جىلدارعا ارنالعان ايماقتىق جوسپارى بەكىتىلدى. ياعني ءبىز ورمان القاپتارىن ۇلعايتىپ قانا قويماي، ءىرى ەلدى مەكەندەردى دە كوگالداندىرامىز. بيىل وسى وڭىرگە بەيىمدەلگەن اعاشتاردىڭ 97،2 مىڭ كوشەتىن وتىرعىزامىز. وسىلايشا 5 جىلدىڭ ىشىندە 500 مىڭ اعاش ەگەمىز، ونىڭ جارتىسى پەتروپاۆلعا كورىك بەرمەك»، - دەيدى بەيبىت يسمانوۆ.
ءتۇرى: قازاقپارات جاڭالىقتارى
جولدانعان ۋاقىتى: 21:33 - 2021/04/08
