نۇر-سۇلتان. قازاقپارات - مەملەكەت باسشىسى قاسىم-جومارت توقاەۆ نۇر-سۇلتان قالاسىنا جۇمىس ساپارىمەن كەلگەن رەسەي فەدەراتسياسىنىڭ سىرتقى ىستەر ءمينيسترى سەرگەي لاۆروۆتى قابىلدادى، دەپ حابارلايدى اقوردانىڭ ءباسپاسوز قىزمەتى.
قاسىم-جومارت توقاەۆ مەملەكەتتەر اراسىنداعى ءوزارا قارىم-قاتىناستار مەن ىنتىماقتاستىققا تىڭ سەرپىن بەرۋ تۇرعىسىنان ءمينيستردىڭ بۇل ساپارىنىڭ ماڭىزدى ەكەنىن ايتتى.
«قازاقستان مەن رەسەي – وداقتاس ءارى ستراتەگيالىق سەرىكتەستەر. ىنتىماقتاستىعىمىزدىڭ كۇن ءتارتىبى وتە تىعىز جانە قول جەتكىزگەن ۋاعدالاستىقتاردى جۇزەگە اسىرۋ ءۇشىن كوپ جۇمىس اتقارۋدى قاجەت ەتەدى. سوندىقتان ءسىزدىڭ ساپارىڭىز بارىسىندا جانە ۆەدومستۆو باسشىلارى دەڭگەيىندەگى، سونداي-اق، ەڭ جوعارى دەڭگەيدەگى كەزدەسۋلەر بارىسىندا العا قويعان ماقساتتارىمىزعا قول جەتكىزەمىز دەپ ويلايمىن. 23 ناۋرىزدا ۆلاديمير پۋتينمەن ءوڭىرارالىق كەزدەسۋ وتكىزۋدىڭ ماڭىزدىلىعى تۋرالى سويلەستىك. وكىنىشكە قاراي، پاندەميا سالدارىنان كەيىنگە شەگەرىلدى. ءبىز كەز كەلگەن فورماتتا، مۇمكىندىگىنشە بەتپە-بەت كەزدەسۋگە ۋاعدالاستىق. ەگەر مۇنىڭ ءساتى تۇسپەسە، وندا اتالعان كەزدەسۋدى ۆيدەو كونفەرەنتسيا رەجيمىندە مىندەتتى تۇردە وتكىزەمىز. ويتكەنى بۇل اسا ماڭىزدى»، – دەدى مەملەكەت باسشىسى.
قاسىم-جومارت توقاەۆ قازاقستانعا ۆاكتسينانىڭ قوسىمشا بولىگىن جىبەرۋ ماسەلەسىنە قولداۋ كورسەتكەنى ءۇشىن ۆلاديمير پۋتينگە ريزاشىلىعىن ءبىلدىردى.
«بىز پاندەمياعا قارسى بىرلەسكەن كۇرەستە تۇسىنىستىك تانىتىپ، كومەك كورسەتكەنى ءۇشىن رەسەي باسشىلىعىنا، رەسەي فەدەراتسياسىنىڭ پرەزيدەنتىنە ريزاشىلىعىمىزدى بىلدىرەمىز. 23 ناۋرىزدا سويلەسكەن كەزدە رەسەيدەن قوسىمشا 4 ميلليون مولشەردە ۆاكتسينا الۋ جونىندە ماسەلە كوتەردىم. مەنىڭ ءوتىنىشىمدى تۇسىنىستىكپەن قابىلدادى. بۇعان دەيىن ءبىز قاراعاندى فابريكاسىندا بىرلەسىپ ۆاكتسينا وندىرۋگە ۋاعدالاسقان ەدىك. ءقازىر ءوندىرىس جولعا قويىلدى. جاقىندا عانا مەن ءوزىم دە قازاقستاندا وندىرىلگەن «سپۋتنيك V» ۆاكتسيناسىن سالدىردىم. جۋىردا ۇكىمەتتىڭ كەڭەسىن وتكىزىپ، حالىقتى جاپپاي ۆاكتسينالاۋدى جەدەلدەتۋدى تاپسىردىم. بۇل مىندەت، بىرىنشىدەن، نارىققا ۆاكتسينانى ءتيىستى مولشەردە جەتكىزۋگە، ەكىنشىدەن، حالىققا ۆاكتسينا سالۋدىڭ ماڭىزدىلىعىن ءتۇسىندىرۋ جۇمىستارىن جۇرگىزۋگە بايلانىستى. ءقازىر جۇرتتىڭ كوپشىلىگى بۇل شارانىڭ ماڭىزدىلىعىن تولىق تۇسىنبەي جاتىر. ارينە، ءبىز ۆاكتسينانى تەگىن سالامىز. سوندىقتان مەن ءوزىم دە ۆاكتسينا ەگۋدەن باسقا جول جوق ەكەنىن ۇنەمى ايتىپ كەلەمىن»، – دەدى مەملەكەت ءباسشىسى.
وز كەزەگىندە سەرگەي لاۆروۆ پرەزيدەنت ۆلاديمير ءپۋتيننىڭ سالەمى مەن ءىلتيپاتىن جەتكىزىپ، رەسەي تاراپى ۆاكتسينا جەتكىزۋ ماسەلەسىن شەشەتىنىن ايتتى.
كەزدەسۋ بارىسىندا ەكىجاقتى ىنتىماقتاستىقتىڭ نەگىزگى اسپەكتىلەرى، ونىڭ ىشىندە، ساۋدا-ەكونوميكالىق جانە مادەني-گۋمانيتارلىق بايلانىستار، عارىش سالاسىنداعى ءوزارا ءىس-قيمىلدى ودان ءارى دامىتۋ ماسەلەلەرى تالقىلاندى.
«كەلەسى ايدا ۆيدەو كونفەرەنتسيا فورماتىندا جوعارى ەۋرازيالىق ەكونوميكالىق كەڭەستىڭ وتىرىسىن ۇيىمداستىرۋ جوسپارلانىپ وتىر. بۇل ءبىزدىڭ كورونوۆيرۋس ىندەتىنەن كەيىنگى كەزەڭدەگى ىنتىماقتاستىعىمىزدى جالعاستىرۋعا باعىتتالعان ورتاق كۇش-جىگەرىمىزدى جۇمىلدىرۋ جولىنداعى ماڭىزدى كەزەڭ. ءوزىڭىز اتاپ وتكەندەي، ءبىز پرەزيدەنتتەردىڭ قاتىسۋىمەن وتەتىن 17-ايماقارالىق فورۋمدى وتكىزەمىز. ءبىراق ونىڭ قانداي فورماتتا بولاتىنى ەپيدەميولوگيالىق جاعدايعا بايلانىستى. ءبىزدىڭ قارىم-قاتىناستارىمىز وتە جاقسى. ساۋدا-ەكونوميكالىق ىنتىماقتاستىق ماسەلەلەرى بويىنشا پرەمەر-مينيسترلەر ەكى رەت كەزدەستى، ۆيتسە-پرەمەرلەر ودان دا ءجيى بايلانىس جاساپ تۇرادى. قارىم-قاتىناستار پاندەميا كەزىندە دە ۇزىلگەن جوق. يۋ.گاگاريننىڭ عارىشقا ۇشقانىنا 60 جىل تولۋىن اتاپ وتەمىز. بۇل – ءبىزدىڭ عارىشتى بەيبىت يگەرۋگە قوسقان ورتاق ۇلەسىمىز. بايقوڭىرداعى ءبىزدىڭ ءوزارا ءىس-قيمىلىمىزدى ودان ءارى وركەندەتۋ جانە قازاقستاننىڭ عارىشتىق الەۋەتىن دامىتۋ جونىندەگى بىرلەسكەن جۇمىستارىمىز قارقىندى ءجۇرىپ جاتىر»، – دەدى سەرگەي لاۆروۆ.
ءتۇرى: قازاقپارات جاڭالىقتارى
جولدانعان ۋاقىتى: 21:03 - 2021/04/08
