تۇركىستان. قازاقپارات - تۇركىستان قالاسىندا بەكزات ساتتارحانوۆ اتىنداعى دارىندى بالالاردىڭ سپورت مەكتەبىنىڭ جاڭا جوباسى ماقۇلداندى.
ساتتارحانوۆ داڭعىلىنىڭ بويىنان بوي كوتەرەتىن عيمارات زامان تالابىنا ساي، ءارى شاھاردىڭ جاڭارعان كەلبەتىنە سايكەس سالىنباق، دەپ حابارلايدى قازاقپارات.
جاڭا نىساننىڭ قۇرىلىسى جاقىن ۋاقىتتا باستالىپ، كەلەر جىلى پايدالانۋعا بەرىلمەك. اۋماعى 320 ورىندىق بولاتىن سپورت كەشەنىندە ۇلكەن زال مەن بىرنەشە جاتتىعۋ بولمەلەرى ورنالاسادى دەپ جوسپارلانعان. «جەلىلىك ساياباق» بويىندا، بۇرىنعى ورنىنان قايتا بوي كوتەرەتىن ءزاۋلىم كەشەننىڭ اينالاسى تولىق اباتتاندىرىلىپ، كوگالداندىرىلادى.
بۇگىن وبلىس اكىمى ءومىرزاق شوكەەۆ جاڭا سپورت كەشەنىنىڭ جوباسىمەن تانىسىپ، ماقۇلدادى. ايماق باسشىسى سونداي-اق، تۇركىستان قالاسىندا اتقارىلىپ جاتقان جۇمىستاردى پىسىقتادى. قۇرىلىسشىلارمەن كەزدەسىپ، الاڭداردا ساقتىق پەن كارانتين شارتتارىن كۇشەيتۋ كەرەكتىگىن ەسكەرتتى. قاجەت بولعان جاعدايدا تاۋلىك بويعى جۇمىس كەستەسىنە كوشۋدى تاپسىردى.
وبلىس اكىمى بۇدان بولەك تۇركىستاندا جاڭادان سالىنىپ جاتقان ساۋلەتى ەرەكشە مەشىت قۇرىلىسىمەن دە تانىستى. قالاعا كىرەبەرىستە الەمدەگى وزىق تاجىريبەلەردى ۇشتاستىرعان ەڭسەلى مەشىتتىڭ قۇرىلىسىن وزبەكستان پرەزيدەنتى شاۆكات ميرزيەەۆ قولداعان.
شىعىستىق ناقىشتا جاسالعان يسلام ورتالىعىنىڭ 20 مىڭ شارشى مەتر اۋماققا جايعاسقان. جاڭا عيبادات ورنىندا 5 مىڭ جاماعات ءبىر مەزگىلدە ساجدەگە باس تيگىزىپ، قۇلشىلىق ەتە الادى. ءدىني عيمارات ۇلى جىبەك جولى بويىمەن كونە شاھارعا كەلەتىن تۋريستەردىڭ قىزىعۋشىلىعىن ارتتىراتىن تاعى ءبىر نىسان بولماق. اق مەشىتتە مۇسىلماندىق جورالاردى جاسايتىن ورىندار، كونگرەسس-حولل، نەكە سارايى، 400 ورىندىق مەدرەسە، كىتاپحانا، اسحانا سالىنادى دەپ كۇتىلۋدە. ال، اكىمشىلىك-ىسكەرلىك ورتالىعىندا قۇرىلىس جۇمىستارى ءجۇرىپ جاتقان 38 كوپقاباتتى تۇرعىن ۇيلەردىڭ سىرتقى قاسبەتى اشىق ءتۇستى تراۆەرتين مەن اقشىل ءمارمار تاسپەن قاپتالۋدا. ساتتارحانوۆ داڭعىلىنىڭ بويىنداعى تۇرعىن ۇيلەر مەن عيماراتتاردىڭ سىرتقى كورىنىسى ءبىرىڭعاي ستيلدە جاڭارتىلۋدا.
وبلىس اكىمى «جەلىلىك ساياباقتىڭ» ءۇشىنشى كەزەڭىنىڭ جۇمىسىن دا باقىلادى. 15 گەكتار اۋماقتا 200-گە جۋىق جۇمىسشى مەن 80 تەحنيكا جۇمىلدىرىلعان. ءومىرزاق شوكەەۆ مادەني – رۋحاني ورتالىقتاعى قۇرىلىس باسىندا بولىپ، «كەرۋەن ساراي» تۇرعىن ءۇي كەشەنىندە اتقارىلىپ جاتقان جۇمىستار بارىسىن ارالاپ كوردى. الاڭنىڭ اۋماعى جاسىل جەلەككە ورانىپ، ۆەلوجولدار سالىنۋدا. جاياۋ جۇرگىنشىلەرگە ىڭعايلى بولۋى ءۇشىن جارىقشامدار مەن ورىندىقتار قويىلىپ، كوگال، سۋ ارناسى وتكەن دەمالىس ايماعىنا اينالماق.
ءتۇرى: قازاقپارات جاڭالىقتارى
جولدانعان ۋاقىتى: 19:09 - 2021/02/23
