ءتۇرى: قالا مەن دالا گازەتى جانە استانا اقشامى گازەتى
جولدانعان ۋاقىتى: 23:30 - 2021/04/01
ال-فارابي قازاق ۇلتتىق ۋنيۆەرسيتەتىنىڭ شەتەل تىلدەرى كافەدراسى Zoom پلاتفورماسىندا ماگيسترانتتارعا ارنالعان «كاسىبي دامۋعا باعىتتالعان داعدىلاردى جەتىلدىرۋ» اتتى حالىقارالىق عىلىمي-پراكتيكالىق كونفەرەنتسيانى ونلاين رەجيمىندە ءوتتى، دەپ حابارلايدى Dalanews.kz.
ونلاين كەزدەسۋدە الىس جانە جاقىن شەتەلدەردەن جينالعان 70-تەن استام جاس زەرتتەۋشىلەردىڭ كونفەرەنتسياسى، يدەيالار مەن عىلىمي ازىرلەمەلەرمەن الماسۋ الاڭىنا اينالدى. بۇل شارانىڭ ەرەكشەلىگى – بارلىق سپيكەرلەر ءوز جۇمىسىنىڭ ناتيجەلەرىن اعىلشىن تىلىندە بايانداپ ۇسىندى.
كونفەرەنتسيا جۇمىسىنا دجوكياكارت مەملەكەتتىك ۋنيۆەرسيتەتىنىڭ پروفەسسورلارى (يندونەزيا) Dr. موحامەد برۋيري تريونو، رەتناۆاتي حەري، تەحنيكا عىلىمدارىنىڭ دوكتورى، پروفەسسور ماكسيم ستوگوۆ، PhD مارينا بورونەنكو (يۋگرا مەملەكەتتىك ۋنيۆەرسيتەتى، رەسەي)، پروفەسسور Elina Kuisisto (تامپەرە ۋنيۆەرسيتەتى، فينليانديا)، پەداگوگيكا عىلىمدارىنىڭ كانديداتى، دوتسەنت گ.ك. بايعاجانوۆا (ج.بالاساعىن اتىنداعى قۇۋ، قىرعىزستان)، PhD دوكتورى گ. قاسىموۆا (Satbayev Universty، قازاقستان)، PhD دوكتورى ف.سمايلوۆا (كولىك جانە لوگيستيكا اكادەمياسى، قازاقستان) جانە ت.ب. قاتىستى.
كونفەرەنتسيانىڭ جالپى وتىرىسىن شەتەل تىلدەر كافەدراسىنىڭ مەڭگەرۋشىسى ۇلجالعاس ادىلباەۆا جانە پروفەسسور موحامەد برۋيري تريونو سالتاناتتى تۇردە اشتى. ايتا كەتەرلىگى، پروفەسسور موحامەد برۋيري تريونو – اقپاراتتىق تەحنولوگيالار جانە ءبىلىم بەرۋ ۇدەرىسىنە تولىقتىرىلعان شىندىق تەحنولوگياسىن ەنگىزۋ سالاسىنداعى جەتەكشى عالىم رەتىندە كونفەرەنتسيا بارىسىندا «تولىقتىرىلعان شىندىقتى ارالاس وقىتۋ فورماتىندا ينتەگراتسيالاۋ» تاقىرىبىندا بايانداما جاسادى.
پلەنارلىق وتىرىستان كەيىن كونفەرەنتسيا ءوز جۇمىسىن جاراتىلىستانۋ جانە الەۋمەتتىك-گۋمانيتارلىق عىلىم سالالارى بويىنشا جالعاستىرىلدى. كونفەرەنتسيا قاتىسۋشىلارى وزدەرىنىڭ عىلىمي ازىرلەمەلەرىن تانىستىرىپ، بىر-بىرىمەن پىكىر الماسىپ، وزەكتى ماسەلەلەردى تالقىلادى.
سەكتسيالىق سەسسيالار ناتيجەسىندە مودەراتورلار اعىلشىن ءتىلىن جەتىك مەڭگەرگەندىگىمەن كوزگە تۇسكەن جانە زەرتتەۋلەرىنىڭ ءمانىن تولىق اشىپ، اۋديتورياعا زەرتتەۋ ناتيجەلەرىن ناقتى جەتكىزە بىلگەن ماگيسترانتتاردىڭ باياندامالارىن اتاپ وتتى.
ماگيسترانتتاردىڭ وزدەرى دە، عىلىمي جەتەكشىلەرى دە العىس حاتتارعا يە بولدى، ال كونفەرەنتسيا قاتىسۋشىلارىنا ارنايى سەرتيفيكاتتار ءتابىستالدى.
ىس-شارا ونلاين فورماتىندا وتسە دە، قاتىسۋشىلار تاراپىنان كونفەرەنتسيانى جىل سايىن وتكىزۋ تۋرالى ۇسىنىس ايتىلدى.
