الماتى پوليتسيا دەپارتامەنتى رەداكتسيامىزدىڭ رەسمي ساۋالىنا تۋريزم جانە سپورت اكادەمياسى ديرەكتورىنىڭ ءىسى قانداي ساتىدا ەكەنىن ايتتى. بۇعان دەيىن قازاقستاندىقتار قايرات زاكيريانوۆتىڭ قىزىل كىتاپقا ەنگەن قار بارىسىنىڭ تەرىسىمەن تۇسكەن سۋرەتىنە نارازى بولعان ەدى، - دەپ حابارلايدى Tengrinews.kz ءتىلشىسى.
قايرات زاكيريانوۆتىڭ ءىسىن المالى اۋداندىق پوليتسيا باسقارماسى قاراپ جاتىر.
"المالى اۋداندىق پوليتسيا باسقارماسى اتالعان فاكت بويىنشا قىلمىستىق كودەكستىڭ 339-بابىندا كوزدەلگەن "سيرەك كەزدەسەتىن جانە قۇرىپ كەتۋ ءقاۋپى تونگەن، سونداي-اق پايدالانۋعا تىيىم سالىنعان وسىمدىكتەر مەن جانۋارلار تۇرلەرىن، ولاردىڭ بولىكتەرىن نەمەسە دەريۆاتتارىن زاڭسىز پايدالانۋ" سايكەس قىلمىستىق قۇقىقبۇزۋشىلىق بەلگىلەرى بويىنشا سوتالدى تەرگەپ-تەكسەرۋدى باستاعانىن حابارلايمىز.
الايدا قىجك-نىڭ 201-بابىنا سايكەس، سوتقا دەيىنگى تەرگەپ-تەكسەرۋ دەرەكتەرى جاريا ەتىلمەيدى"، - دەدى ۆەدومستۆو وكىلدەرى.
ايتا كەتەيىك، قر قىلمىستىق كودەكسىنىڭ 339-بابىندا 3 مىڭ اەك-كە (8 751 000 تەڭگەگە دەيىن) دەيىنگى ايىپپۇل سالۋ، نە سول مولشەردە تۇزەۋ جۇمىستارى، نە 800 ساعاتقا دەيىنگى مەرزىمگە قوعامدىق جۇمىستارعا تارتۋ، نە 3 جىلعا دەيىنگى مەرزىمگە باس بوستاندىعىن شەكتەۋ، نە 5 جىلعا دەيىنگى مەرزىمگە بەلگىلى ءبىر لاۋازىمداردى اتقارۋ نەمەسە بەلگىلى ءبىر قىزمەتپەن اينالىسۋ قۇقىعىنان ايىرا وتىرىپ، سول مەرزىمگە باس بوستاندىعىنان ايىرۋ قاراستىرىلعان.
ەسكە سالايىق، بيىل 20 قاڭتاردا كابينەتىندەگى قار بارىستارىنىڭ تەرىلەرىمەن سۋرەتكە تۇسكەن سپورت جانە تۋريزم اكادەمياسىنىڭ پرەزيدەنتى قايرات زاكيريانوۆتىڭ باسى داۋعا قالعان بولاتىن. زاكيريانوۆپەن بىرگە تۇسكەن سۋرەتتى سپورتشى جانكوش تۇراروۆ Instagram جەلىسىندە جاريالانعان. سۋرەتتەردەن ارىستان، سىلەۋسىن، بارىس پەن قۇستاردىڭ تەرىسىن كورۋگە بولادى.
سپورت جانە تۋريزم اكادەمياسى پرەزيدەنتىنىڭ بۇل سۋرەتىقازاقستاندىقتاردىڭ اشۋىنا تيگەن. كەيىن ەكولوگيا، گەولوگيا جانە تابيعي رەسۋرستار مينيسترلىگى وسى جاعدايعا قاتىستى پىكىر بىلدىرگەن بولاتىن.
سىلتەمەسىز جاڭالىق وقيسىز با؟ وندا "ۆكونتاكتە" جەلىسىندە پاراقشامىزعا تىركەلىڭىز!
ءتۇرى: TengriNews.Kz
جولدانعان ۋاقىتى: 10:00 - 2021/04/01
