پرەزيدەنت قاسىم-جومارت توقاەۆ عىلىم ماسەلەلەرى جونىندەگى زاڭعا قول قويدى. تۇزەتۋلەردىڭ ءبىرى مەملەكەتتىك مەكتەپتەر، بالاباقشالار جانە باسقا دا ءبىلىم بەرۋ ۇيىمدارىنىڭ ديرەكتورىنا قىزمەتكەرلەردى جۇمىسقا الۋى تۋرالى، - دەپ حابارلايدى Tengrinews.kz ءتىلشىسى اقوردا سايتىنا سىلتەمە جاساپ.
"مەملەكەت باسشىسى "قازاقستان رەسپۋبليكاسىنىڭ كەيبىر زاڭنامالىق اكتىلەرىنە عىلىم ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى" قازاقستان رەسپۋبليكاسىنىڭ زاڭىنا قول قويدى"، - دەلىنگەن حابارلامادا.
سەنات دەپۋتاتتارى 4 ناۋرىزدا وتكەن ەكىنشى وقىلىمدا زاڭ جوباسىن قابىلدادى. ءبىرىنشى تۇزەتۋ مەملەكەتتىك ءبىلىم بەرۋ ۇيىمدارىنا پەداگوگتەردى كونكۋرستىق نەگىزدە قابىلداۋعا قاتىستى. ەندى ءمۇعالىمدى جۇمىسقا قابىلداۋ تۋرالى شەشىمدى ديرەكتور جەكە قابىلدامايدى. ءبىلىم ءمينيسترى اسحات ايماعامبەتوۆ پەداگوگتەردى تاعايىنداۋدىڭ قولدانىستاعى جۇيەسى اشىق ەمەس ەكەنىن جانە سىبايلاس جەمقورلىق تاۋەكەلدەرى بارىن تۇسىندىرگەن بولاتىن.
ەكىنشى تۇزەتۋ مەملەكەتتىك ءبىلىم بەرۋ ۇيىمدارى باسشىلارىنىڭ بىرنەشە جىلدان كەيىن لاۋازىمىن وزگەرتۋگە باعىتتالعان.
"بىزدە مەملەكەتتىك ءبىلىم بەرۋ ۇيىمدارى باسشىلارىنىڭ كوبىندە مەرزىمسىز ەڭبەك شارتتارى بار. ءوز جۇمىسىنا بەرىلگەن، مىقتى باسشىلار كوپ. ولار جىلدار بويى جۇمىس ىستەپ، وتە ءتيىمدى ناتيجە كورسەتە الادى. ءبىراق ونداي ماماندار از.
الايدا كاسىبي كۇيزەلىس، موتيۆاتسيانىڭ جوقتىعى جانە باسقا قىزمەتكەرلەردىڭ مانساپ ساتىسىندا كوتەرىلۋگە دەگەن ۇمتىلىسىنىڭ جوعالۋى ءتارىزدى ماسەلە بار. سوندىقتان باسشىلار جىلدار بويى ءبىر ورىندا وتىرادى. ونىڭ ارتىقشىلعى دا، كەمشىلىگى دە بار. ەنگىزىلەتىن وزگەرىس ۇزدىك تاجىريبە الماسۋ جانە تاجىريبەنى باسقا ۇيىمدارعا اۋىستىرۋعا مۇمكىندىك بەرەدى"، - دەپ ءتۇسىندىردى ايماعامبەتوۆ.
زاڭنىڭ كەيبىر جاڭاشىلدىقتارى عىلىمي زەرتتەۋلەردىڭ كەڭ سپەكترىن رەسپۋبليكالىق بيۋدجەتتەن قارجىلاندىرۋعا مۇمكىندىك بەرەدى. بۇل قولدانبالى عىلىمي جاڭالىقتاردىڭ سانىن، سونداي-اق عىلىمنىڭ ەل ەكونوميكاسىنىڭ دامۋىنا قوسقان ۇلەسىن ارتتىرۋعا كومەكتەسەدى دەپ بولجانعان.
زاڭ عىلىمدى قارجىلاندىرۋ سالاسىنداعى سىبايلاس جەمقورلىق تاۋەكەلدەرىن تومەندەتەدى، عىلىمي، عىلىمي-تەحنيكالىق قىزمەت پەن زەرتتەۋ جۇمىستارىن كوممەرتسيالاندىرۋدىڭ اشىقتىعىن قامتاماسىز ەتەدى جانە ەلىمىزدە عىلىمنىڭ دامۋىنا ىقپال ەتەدى.
سىلتەمەسىز جاڭالىق وقيسىز با؟ وندا "ۆكونتاكتە" جەلىسىندە پاراقشامىزعا تىركەلىڭىز!
ءتۇرى: TengriNews.Kz
جولدانعان ۋاقىتى: 17:40 - 2021/03/31
