ناۋرىز مەيرامىنا وراي سەمەي قالالىق «اباي قۇنانبايۇلى» مەشىتى جاماعاتقا ەسىگىن اشتى. تۇركى جۇرتىنىڭ ءتول مەيرامى قارساڭىندا ەل يگىلىگىنە بەرىلگەن نىساننىڭ اشىلۋىنا سەمەي قالاسىنىڭ اكىمى نۇرىمبەت امانۇلى، قمدب ءتوراعاسى، باس ءمۇفتي ناۋرىزباي قاجى جانە ەل اعالارى ارنايى قاتىستى.

سەمەي قالاسىنىڭ قاق ورتاسىنداعى قۇرىلىسى ۇزاق جىل بويى توقتاپ قالعان بۇل مەشىتتى كاسىپكەر دۋلات تاستاكەەۆ قولعا الىپ، جاقىندا عانا تولىقتاي اياقتاعان بولاتىن. سالتاناتتى شارادا ءسوز العان باس ءمۇفتي حاكىم اباي ايتقانداي «قيامەتشىل دۇنيەنىڭ» كىرىنەن تازارىپ، بار ارمان، ءۇمىتىنىڭ اقتالۋىن تىلەپ، دۇعا جاسايتىن ءقادىرلى ءۇي مەشىتتىڭ اشىلۋىمەن بارشا سەمەي جۇرتشىلىعىن قۇتتىقتادى.

«بۇگىن – تاريحي كۇن. اباي ەلى مۇنى كوپ كۇتتى. وسى مەشىتتىڭ اشىلۋىن ءبىز دە ۇزاق كۇتتىك. مىنە، ەل تاۋەلسىزدىگىنىڭ 30 جىلدىعى قارساڭىندا بارشا سەمەي حالقىنىڭ يگىلىگىنە بەرىلىپ وتىر. اللا تاعالا قۇران كارىمدە: «اللا تاعالانىڭ مەشىتتەرىن تەك اللاعا جانە اقىرەت كۇنىنە يمان ەتكەن، ناماز وقىعان، زەكەتىن بەرگەن جانە اللادان باسقا ەشكىمنەن قورىقپايتىندار عانا سالادى»، – دەيدى. ەڭ باستىسى ساۋاپتى ءىس جاسايمىن دەگەن ازامات قايىرلى ءىستى اتاق پەن ابىروي الۋ ءۇشىن ەمەس، جاراتۋشىنىڭ رازىلىعىن الۋدى ماقسات ەتۋى كەرەك. ويتكەنى بۇل جەر ەلدىڭ ءدىني جانە رۋحاني دامۋىنا، جاستاردىڭ دۇرىس تالىم-تاربيە الۋىنا ۇلەس قوساتىن ورىن. پايعامبارىمىز مۇحاممەد (وعان اللانىڭ سالاۋاتى مەن سالەمى بولسىن) ءبىر حاديسىندە: «راسىندا، ءمۇمىن-مۇسىلمان مەشىتكە كەلسە، اللا تاعالا: «پەندەم مەنى زيارات ەتە كەلىپتى، ونىڭ سىي-سياپاتى مەنىڭ قۇزىرىمدا، مەشىتكە كەلگەن ادامعا ءجانناتتان باسقا سىيلىققا ەش ريزا ەمەسپىن»، – دەپ ايتادى»، – دەگەن. وسى ورايدا قازاق دالاسىندا مەشىتتەر سالىنا بەرسىن، يماندى قوعام ارتا بەرسىن دەگىمىز كەلەدى. الاشتىڭ رۋحاني استاناسىنا دەم بەرىپ، قولداۋ كورسەتكەن بارشا ازاماتتارعا العىس! اللا رازى بولسىن!» – دەپ ءوزىنىڭ اق تىلەگىن جەتكىزە وتىرىپ، بۇگىنگى ءاز-ناۋرىز مەيرامىمەن قۇتتىقتادى.

تۇساۋكەسەر راسىمىنە ەلىمىزدىڭ ءار وڭىرىنەن كەلگەن ونەر، ادەبيەت، مادەنيەت مايتالماندارى اقجارما تىلەگىن جەتكىزدى. يگى شارادا ءسوز العان ءاسانالى ءاشىموۆ، مۇحتار شاحانوۆ، ءجۇرسىن ەرمان قاتار كەلگەن قوس تويمەن قۇتتىقتادى.

مەشىتتە 2500 ادام ءبىر ۋاقىتتا ناماز وقي الادى. عيماراتتىڭ ىشىندە ءدىني جورالعىلاردى وتكىزۋگە ارنالعان كەڭ بولمەلەر قاراستىرىلعان. 2008 جىلى ىرگەسى قالانىپ، قۇرىلىسى توقتاپ قالعان قۇلشىلىق ورداسىنىڭ قۇرىلىس جۇمىستارى 3 جىلدىڭ ىشىندە اياقتالدى. ال سىرتقى اباتتاندىرۋ جۇمىستارىنا تۇركىستان وبلىسى دەمەۋ ءبىلدىرىپتى.