ءتۇرى: قازاقستان «سۇننەت» اقپاراتتارى
جولدانعان ۋاقىتى: 14:30 - 2021/02/22
22 اقپان. نۇر-سۇلتان. Sunna.kz – قازاقستان مۇسىلماندارى ءدىني باسقارماسىنىڭ ءتوراعاسى ناۋرىزباي قاجى تاعانۇلى ماڭعىستاۋ وبلىسىنا جاساعان رەسمي ساپارى بارىسىندا اقتاۋداعى شاحماردان ەسەنوۆ اتىنداعى كاسپي مەملەكەتتىك تەحنولوگيالار مەن ينجينيرينگ ۋنيۆەرسيتەتىندە بولىپ، ستۋدەنتتەرگە وسىلاي دەدى، دەپ حابارلايدى قمدب-نىڭ ءباسپاسوز قىزمەتىنە سىلتەما جاساعان Sunna.kz سايتى.
«سىزدەرگە ايتار اعالىق كەڭەسىم: ەڭ باستىسى، تاۋەلسىزدىگىمىزدىڭ ءقادىرىن ءبىلىپ، قوعامعا پايدالى تۇلعا بولىڭىزدار. ءار ستۋدەنت ءوزى تاڭداعان ماماندىعىن كاسىبي تۇرعىدان مەڭگەرىپ، ەلىمىزدىڭ وركەندەۋىنە قىزمەت ەتۋى كەرەك. ءار ازامات ءوز ميسسياسىن ۇقىپتى، مۇقيات، ادال اتقارسا ەلىمىز وركەندەپ، بولاشاعىمىز باياندى بولماق. پايعامبارىمىز مۇحاممەد (وعان اللانىڭ سالاۋاتى مەن سالەمى بولسىن) ءبىر حاديسىندە: «جاقسى ادام – قوعامعا پايداسى تيگەن پەندە»، – دەگەن.
جازۋشى شەرحان مۇرتازا ايتقانداي، اۋەلى حالىقتىڭ پايداسىن ويلا، سەنىڭ پايداڭ سونىڭ ىشىندە. اللا تاعالا بارشاڭىزعا جار بولىپ، ەكى دۇنيە باقىتىن ءناسىپ ەتسىن!» دەدى باس ءمۇفتي ناۋرىزباي قاجى تاعانۇلى.
