20 اقپان. نۇر-سۇلتان. Sunna.kz – قازاقستان مۇسىلماندارى ءدىني باسقارماسىنىڭ ءتوراعاسى ناۋرىزباي قاجى تاعانۇلى ماڭعىستاۋ وبلىسىنا جاساعان رەسمي ساپارى بارىسىندا اقتاۋداعى شاحماردان ەسەنوۆ اتىنداعى كاسپي مەملەكەتتىك تەحنولوگيالار مەن ينجينيرينگ ۋنيۆەرسيتەتىندە بولىپ، ستۋدەنتتەرگە ءدارىس وقىدى، دەپ حابارلايدى قمدب-نىڭ ءباسپاسوز قىزمەتىنە سىلتەما جاساعان Sunna.kz سايتى.

جاستارعا ناسيحات ايتقان قمدب ءتوراعاسى ناۋرىزباي قاجى تاعانۇلى: «جاستار قاي كەزدە دە قوعامنىڭ نەگىزگى قوزعاۋشى كۇشى بولعان. اسىل ءدىنىمىز يسلامدا جاستار جايلى ايرىقشا ايتىلعان. مىسالى، قۇران كارىمدە «ولار يمان كەلتىرگەن جاستار ەدى» دەپ سيپاتتالادى. سوندىقتان سىزدەر ۇستامدى، بايسالدى بولۋلارىڭىز كەرەك.

ۇستامدىلىق پەن دانالىق ءبىلىم ارقىلى كەلەدى. ءبىلىم – اللانىڭ ۇلكەن نىعمەتى. سوندىقتان جاستىق شاقتا بارىنشا ءبىلىم الۋعا ۇمتىلىڭىزدار. سىزدەرگە ايتار اعالىق كەڭەسىم: ەڭ باستىسى، تاۋەلسىزدىگىمىزدىڭ ءقادىرىن ءبىلىپ، قوعامعا پايدالى تۇلعا بولىڭىزدار. جازۋشى شەرحان مۇرتازا ايتقانداي، اۋەلى حالىقتىڭ پايداسىن ويلا، سەنىڭ پايداڭ سونىڭ ىشىندە. اللا تاعالا بارشاڭىزعا جار بولىپ، ەكى دۇنيە باقىتىن ءناسىپ ەتسىن!» دەدى.

ەركىن فورماتتا وتكەن كەزدەسۋ سوڭىندا ستۋدەنتتەر كوكەيىندە جۇرگەن ساۋالدارىن باس مۇفتيگە قويىپ، تۇشىمدى جاۋاپ الدى.