كەشە استانا تورىندەگى بەيبىتشىلىك جانە كەلىسىم سارايىندا ەلوردا جۇرتشىلىعىنىڭ جۇرەگىن ەلجىرەتىپ، جانارىن مولدىرەتكەن رۋحاني ءماۋلىت كەشى بولىپ ءوتتى. استانا قالاسى وكىلدىگىنىڭ ۇيىمداستىرۋىمەن وتكەن «ادامزاتتى ابزالى» اتتى رۋحاني كەشتە سۇيىكتى پايعامبارىمىزعا ﷺ  سانسىز سالاۋاتتار جولدانىپ، ءاز ەلشىنىڭ ﷺ ونەگەلى ءومىرى مەن وسيەتتەرى حالىق جادىندا تاعى ءبىر جاڭعىردى.

ارداقتى اللا ەلشىسىنىڭ ﷺ دۇنيەگە كەلگەن ساتىنەن باستاپ كۇللى الەمدى عالامات مەيىرىم مەن راقىم نۇرى باۋراعانىن بايانداۋدان باستالىپ، كەش بويى ادامزاتتىڭ ابزالى بولعان ۇلى تۇلعانىڭ جان-جاقتى قىرلارى جەتكىزىلىپ وتىردى. كورەرمەن قاۋىمعا كەڭىنەن تانىس نارتاي ساۋدانبەكۇلى مەن قۋاندىق قىستىقباەۆتار كەش تىزگىنىن ۇستاپ، جۇرتشىلىقتى تاعىلىمدى سوزدەرىمەن سۋسىنداتتى. بەلگىلى كومپوزيتور جاكەن وماروۆتىڭ قازاق تىلىندە جازعان ءماۋلىت جىرى دا كورەرمەننىڭ ىستىق ىقىلاسىنا بولەنىپ، سۇيىكتى پايعامبارىمىزعا ﷺ بارشاسى تىك تۇرعان قالپى سالاۋات جولدادى.

قازاقى قارا ولەڭ وقىلىپ، ايتىسكەر اقىندارىمىز باۋىرىن جازعان رۋحاني كەش كورىگىن ەلىمىزگە بەلگىلى «ونەر قىراندارى» تەاترىنىڭ مايتالماندارى ودان ارى قىزدىرا ءتۇستى. كۇلدىرە وتىرىپ كۇرسىنتكەن تەاتر اكتەرلارى «جاڭبىرلى جاس»، «پويىزداعى وقيعا»، «ارداقتى پايعامبار» سەكىلدى ءۇش قويىلىم قويىپ، كورەرمەن كوڭىلىن بوساتتى.

ەلىمىزگە بەلگىل سەرجانالى الىبەك، قۇرماش ماحان سەكىلدى جەزتاڭداي انشىلەرىمىز دە ءماۋلىت كەشىنىڭ ءسانىن كىرگىزىپ، الەمدەردىڭ راببىسىنا ماداق پەن شۇكىر ايتقان تاعىلىمدى اندەرىمەن مەرەكەلىك شارانى ارلەي ءتۇستى.

كەش اياسىندا رەسپۋبليكالىق «ازىرەت سۇلتان» مەشىتى ۇيىمداستىرعان «پايعامبارلار سۇلتانى» جىر ءمۇشايراسىنىڭ قورىتىندىسى جاريالانىپ، جۇزدەن جۇيرىك شىققان جەڭىمپاز اقىن باس ءمۇفتي سەرىك قاجى وراز قولىنان كىشى قاجىلىق سەرتيفيكاتىن الدى.

سونداي-اق، بيىلعى جىلى تۇڭعىش رەت ءماۋلىت مەرەكەسىنىڭ قۇرمەتىنە وراي حالىق اراسىنداعى ۇلگىلى جاندارعا ء«ماۋلىت سىيلىعى» تابىستالىپ، ەلگە سىڭىرگەن ەڭبەكتەرى پاش ەتىلدى. اتاپ ايتقاندا، «ۇلگىلى ۇستاز»، «ونەرتاپقىش جاس عالىم»، «جاناشىر جۇرەك»، «تالىمگەر تۇلعا»، «قامقور وتباسى» نوميناتسيالارى بويىنشا ارنايى «العىس حات» بەرىلىپ، باعالى سىيلىقتارمەن ماراپاتتالدى.

muslim.kz